ბათუმელებმა რუსეთის პრემიერლიგის გუნდი დაამარცხეს

ბათუმის "დინამო" სეზონისთვის მზადებას აგრძელებს. გუშინ გია გეგუჩაძის გაწვრთნილები ამხანაგურ მატჩში პერმის "ამკარს" შეხვდნენ. ეს გუნდი რუსეთის პრემიერლიგაში მე-13 ადგილზეა.

წინა სპარინგში "დინამო" ტალინის (ესტონეთი) "ლევადიასთან" 0:3 დამარცხდა. ამის ფონზე, გუშინ მოულოდნელი შედეგი დაფიქსირდა.

საინტერესოა, რომ ეს გუნდები ერთმანეთს 2015 წლის მოსამზადებელ შეკრებაზეც შეხვდნენ და მაშინ მატჩი 2:2 დასრულდა. ამჯერად, შეთანხმების მიხედვით, გუნდებმა ორი 40-წუთიანი ტაიმი ითამაშეს.

პირველი ნახევრის მიწურულს პერმელებმა პენალტის შესრულების უფლება მოიპოვეს, მაგრამ რომან ტაკიძემ დარტყმა მოიგერია და ბათუმელები გადაარჩინა.

მეორე ტაიმში კი გეგუჩაძის გაწვრთნილებმა მეტოქის კარის აღება მოახერხეს: 64-ე წუთზე "ამკარს" აჭარელთა ახალწვეულმა გიორგი ჯანელიძემ გაუტანა. ეს იყო მატჩის ერთადერთი გოლი, რომელმაც ბათუმის "დინამოს" რუსეთის პრემიერლიგის გუნდთან გამარჯვება მოუტანა.

და ბოლოს - კლუბის პრესსამსხურის ცნობით, მომავალ სეზონში გუნდს ვაკო თევდორაძე უკაპიტნებს. 24 წლის ნახევარმცველი ბათუმელია და უკვე მეშვიდე წელია, "დინამოს" ფორმით თამაშობს. ამ პერიოდში მან 144 შეხვედრაში მიიღო მონაწილეობა და 12 გოლი გაიტანა.

დინამო (ძირითადი შემადგენლობა): ტაკიძე, ფარტენაძე, ჩალაძე, ჭელიძე, გოგიტიძე, ვარშანიძე, თევდორაძე, ქავთარაძე, ილურიძე, ჯოვინო, კვარაცხელია.

ყოველდღიური სპორტული გაზეთი "ლელო"
328
მკითხველის კომენტარები / 0 /
მსგავსი ამბები
რუბრიკის სხვა სიახლეები