ბათუმის დინამომ და გია გეგუჩაძემ სეზონი მოგებით დაიწყეს

ბათუმის "დინამომ" და გია გეგუჩაძემ სეზონი მოგებით დაიწყეს. ეროვნულ ლიგა 2-ში დაქვეითებულმა აჭარულმა გუნდმა პირველი საკონტროლო მატჩი ბათუმის "რაგბი არენაზე" გამართა და ფოთის "კოლხეთი" 3:1 დაამარცხა.

პირველი ტაიმი უგოლოდ დასრულდა. ანგარიში მეორე ტაიმში ფოთელთა ფეხბურთელმა შუბითიძემ გახსნა. მაგრამ ერთ წუთში ბათუმელმა ნახევარცველმა გიორგი დევაძემ წონასწორობა აღადგინა, ხოლო 88-ე წუთზე კი ფოთელთა კაპიტანმა ლაშა გოგონაიამ ბურთი საკუთარ კარში ჩაჭრა და მატჩი ბათუმელთა გამარჯვებით დასრულდა.

დინამო: შოვნაძე, გოგიტიძე, ჭელიძე, ფარტენაძე, ჩალაძე ვარშანიძე, დეკანოიძე, ჯანელიძე, თევდორაძე, ქავთარაძე, კვარაცხელია; შეცვლაზე: ალავიძე, სამსონია, ჯოვინო, კეკუა, მაისაია, ქუთელია, გაგოშიძე, დევაძე, აბუსელიძე, ტროფიმოვი.

კოლხეთი: ჯომიდავა, კილასონია, გოგონაია, ბ. მახარაძე, ჩმირიკოვი, დანილოვი, ქურდაძე, სილიჩი, ისმაილი, ნონდი, ტყემალაძე; შეცვლაზე: ხოფერია, კაკულია, შუბითიძე, ჭიჭეიშვილი, მაჩარია, ლ. მახარაძე, ერემეევი, ჭეიშვილი, ტერპიშნი.

გავაგრძელოთ "კოლხეთის" თემით. ფოთელები ახალი მთავარი მწვრთნელის, კონსტანტინ გალკინის ხელმძღვანელობით ბათუმში ემზადებიან.

შემადგენლობიდანაც ნახავდით - "კოლხეთში" რამდენიმე ახალი ფეხბურთელია. სეზონის პირველ საკონტროლო მატჩში ფოთელთა ფორმა მოირგეს ბათუმის "დინამოს" ყოფილმა კაპიტანმა ბექა მახარაძემ, ლანჩხუთის "გურიას" საყრდენმა ვაკო ტყემალაძემ და "გაგრას" საყრდენმა ნახევარმცველმა გიორგი ქურდაძემ.

"კოლხეთში" რამდენიმე ლეგიონერიც გამოჩნდა: მაგალითად, ისმაილი, სილიჩი და ტერპიშნი. უფრო მეტი ინფორმაცია დანარჩენ სამეულზე შევიტყვეთ.
ოლეგ ჩმირიკოვი, 21 წლის ბელარუსი მცველი, "გომელის" ძირითად შემადგენლობაში თამაშობდა. იყო ბელარუსის 17, 19 და 21-წლამდელთა ნაკრების წევრი.

2016 წელს პირველი ლიგის გამარჯვებული გახდა. მაგრამ პრემიერლიგაში გადასული გუნდის სასტარტოში ადგილი დაკარგა და იჯარით ბობრუისკის "ბელშინაში" წავიდა. 2017 წლის 26 მარტს ჩმირიკოვს დებიუტი ჰქონდა ბელარუსის ახალგაზრდულ ნაკრებში (სულ 2 მატჩი ჩაატარა).

შემტევი ნახევარმცველი რომან ერემეევი თავდასხმაშიც თამაშობს. 25 წლის ფეხბურთელმა, 2011-14 წლებში, მოსკოვის "დინამოს" დუბლშემადგენლობაში 40 მატჩი ჩაატარა, იყო ამ გუნდის კაპიტანიც, მაგრამ მთავარ გუნდში ვერ დაწინაურდა და კარიერა დაბალი ლიგის კლუბებში, კერძოდ, ლიპეცკის "მეტალურგში", ასტრახანის "ვოლგარსა" და ნიჟნი ნოვგოროდის "ოლიმპიეცში" გააგრძელა, სადაც მას სწორედ გალკინი ავარჯიშებდა.

სერგეი დანილოვი 29 წლის ნახევარმცველია. ის რუსეთის რანგით მესამე ლიგის კლუბ "სიზრანი 2013-ში" (სამარის ოლქი) თამაშობდა. მანამდე, 2012 წელს, "უფაში" ირიცხებოდა, რომელიც იმ პერიოდში რუსეთის პირველ ლიგაში თამაშობდა. 2014 წელს, ამავე ლიგაში დაწინაურებულ "ტიუმენში" მიიწვიეს, 2014-17 წლებში კი იჟევსკის "ზენიტის" ღირსებას იცავდა.

"სიზრანი 2013-ის" ვებგვერდისთვის მიცემულ ინტერვიუში დანილოვმა დაადასტურა, რომ კარიერას საქართველოში გააგრძელებს და რომ "კოლხეთთან" ერთწლიანი კონტრაქტი გააფორმა.

"ქართულ კლუბ "კოლხეთში 1913-ში" გადასვლა ჩემთვის არის უნიკალური შესაძლებლობა, რომ გავიზარდო და განვვითარდე. ეს წინ გადადგმული ნაბიჯია", - ამბობს დანილოვი.

ყოველდღიური სპორტული გაზეთი "ლელო"
1930
მკითხველის კომენტარები / 0 /
მსგავსი ამბები
რუბრიკის სხვა სიახლეები
;