ბათუმის დინამოს გაძლიერებას არჩილ ბერიძე ზამთარში გეგმავს. კვეკვესკირი? საიდან მოიტანეს?!.

არჩილ ბერიძე უარყოფს გავრცელებულ ინფორმაციას, თითქოს ბათუმის "დინამო" საქართველოს ნაკრების ნახევარმცველ ნიკა კვეკვესკირს იმატებს.

ამ ცნობის თანახმად, ბათუმელები წინასწარ იჭერენ თადარიგს და იმ შემთხვევაში, თუ ევროთასებზე გავლენ, მომავალი სეზონისთვის საგრძნობლად გაძლიერდებიან. ამ კუთხით ერთ-ერთი მთავარი სამიზნე კვეკვესკირია - საქართველოს ნაკრებისა და ყაზახური "ტობოლის" საყრდენი ნახევარმცველი.

ბერიძეს ცოტა განსხვავებული გეგმები აქვს: "კვეკვესკირი? არა, საიდან მოიტანეს?! ნიკა ძალიან კარგი მოთამაშეა და სიამოვნებით დავიმატებდით, მაგრამ ჯერ ასე კონკრეტულად არაფერი შეგვითავაზებია. მე ვთქვი - ზამთარში თუ თავისუფალი აგენტი გახდება, დაველაპარაკებით. ეს იყო და ეს, მეტი არაფერი", - ამბობს ბერიძე.

ბათუმური კლუბის მთავარი სპონსორი გაძლიერების გეგმებზეც გველაპარაკა: "ჯერ სიახლე არაფერია, ტრანსფერებს კი მხოლოდ ზამთარში დავუბრუნდებით. ამ პერიოდისთვის გაძლიერებაზე ნამდვილად ვფიქრობთ. ჩვენი სურვილია, რომ რეალურად მაღალი კლასის მოთამაშეები მოვიყვანოთ, რომლებიც გუნდს საგრძნობლად გააძლიერებენ".

და ბოლოს: მართალია, ბათუმის საკრებულომ აჭარის მთავრობას თავის ბალანსზე არსებული ბათუმის "დინამო" გადასცა, მაგრამ ჯერ კლუბი არჩილ ბერიძის H Group-ის საკუთრება არ გამხდარა. იმედია, ეს საკითხიც მალე მოგვარდება, თორემ გადის ძვირფასი დრო, ამ კაცს კი მშობლიური კუთხის კარგი გუნდით გახარება სურს...

2510
მკითხველის კომენტარები / 0 /
მსგავსი ამბები
რუბრიკის სხვა სიახლეები
;