ბათუმის დინამოს გეგმები: ავარიაში მოყოლილი  გომეშისადმი ინტერესს  ადასტურებენ...

ტორპედოდან გეგეჭკორისა და ცინცაძის  დასამატებლად ყველაფერს გავაკეთებთო... 


ბათუმის “დინამო” ბრაზილიური “სან პაულოს” თავდამსხმელ იგორ გომეშთან მოლაპარაკებას ადასტურებს, მაგრამ ჯერ ამ საკითხში კონკრეტული არაფერია - ეს “ლელოსთან” ბათუმელთა სპონსორმა, “ლამინი ჯგუფის” დამფუძნებელმა არჩილ ბერიძემ განაცხადა.

“მოლაპარაკება ბრაზილიელის თაობაზე მის კლუბთან, “სან პაულუსთან” ნამდვილად გვქონდა. ეს ძალიან საინტერესო და ნიჭიერი მოთამაშეა, რომელიც ჩვენს ჩემპიონატს სულ სხვა ინტერესს შემატებდა. მისი კანდიდატურა აგენტმა შემოგვთავაზა, გია გეგუჩაძემ ნახა და ძალიან მოეწონა.

ბრაზილიურ კლუბს გომეშის ტრანსფერის გამოსყიდვა შემდეგი პირობით შევთავაზე - ფეხბურთელის შემდეგი ტრანსფერიდან “სან პაულუ” 50 პროცენტს მიმიღებს. მაგრამ ეს ჯერ ლაპარაკის დონეზეა და ვერ ვიტყვი, რომ საკითხი გადაწყვეტილია”, - ამბობს ბერიძე. 

გომეშის შესაძლო ტრანსფერზე გაზეთი “ლელო” წერდა. 20 წლის ფეხბურთელი “სან პაულოს” ცენტრალური ნახევარმცველი (15 მატჩი, 2 გოლი) და ბრაზილიის 20-წლამდელთა ნაკრების წევრია, რომლის ფორმითაც 10 მატჩი აქვს ჩატარებული, მათ შორის 5 - ოფიციალური. წელს გომეში სამხრეთ ამერიკის 20-წლამდელთა ჩემპიონატშიც მონაწილეობდა და მართლაც ძალიან კარგი ფეხბურთელია. 

მაგრამ ცნობილი გახდა, რომ ბათუმის “დინამოსთვის” საინტერესო 20 წლის ტალანტი რამდენიმე დღის წინ ავტოავარიაში მოყვა და ფატალურ დასასრულს სასწაულით გადაურჩა. სან პაულოს შტატის ქალაქ სან ჟოზეში ერთმანეთს ორი ავტომობილი შეასკდა, გომეშისა საერთოდ ამობრუნდა. თუმცა, ეტყობა, ის ქუდბედიანი დაიბადა, რადგან უვნებლად, ტრავმების გარეშე გადარჩა, ისევე, როგორც მეორე მძღოლი. ბერიძემ კომენტარი ამაზეც გააკეთა: “ეს ამბავი ვიცით, მაგრამ საბედნიეროდ, გომეში გადარჩა და არაფერი სჭირს”.

ვინ იქნება მამუკა კობახიძისა და ლადო დვალიშვილის შემდეგ ბათუმის “დინამოს” მორიგი ახალწვეული? ბათუმელთა გენერალურ სპონსორს, “ლამინი ჯგუფის” დამფუძნებელს ამის თაობაზეც დავეკითხეთ. უპირველესად, დავინტერესდით, რამდენად მართალია, რომ ქუთაისის “ტორპედოდან” ლევან გეგეჭკორისა და მათე ცინცაძის ტრანსფერებს ამზადებენ: 

“ორივე ფეხბურთელის მიმართ დიდი ინტერესი რომ გვაქვს, ეს დასამალი არაა და ვადასტურებ. მთავარია, ისინი ქუთაისის “ტორპედოში” დარჩენას მოისურვებენ თუ არა. ჩვენი ჩემპიონატის მომავლისთვის აჯობებს, რომ ეროვნულ ლიგაში დიდი კონკურენცია იყოს და ასეთი ძლიერი გუნდი შევინარჩუნოთ. მაგრამ ეს თუ ვერ მოხერხდება, ყველაფერს გავაკეთებთ, გეგეჭკორი და ცინცაძე რომ დავიმატოთ”. 

ბერიძის თქმით, იგორ გომეშის გარდა, ინტერესი კიდევ ერთი ბრაზილიელის მიმართ არსებობს, რომელიც ამ სამხრეთამერიკული ქვეყნის ჩემპიონატის მეორე ლიგაში თამაშობს. მაგრამ ესეც ჯერ განხილვის საგანია და ბათუმელთა გენერალურმა სპონსორმა მოთამაშის გვარი ჯერ არ დააკონკრეტა.

ყოველდღიური სპორტული გაზეთი "ლელო"
748
მკითხველის კომენტარები / 0 /
მსგავსი ამბები
რუბრიკის სხვა სიახლეები
;