ბათუმის დინამოს სპონსორი არჩილ ბერიძე: ყველა ლიდერი თუ გავყიდეთ, გულშემატკივარს რა პასუხს გავცემთ?

ბათუმის “დინამო” გაბრიელ რამოსის უკრაინულ კლუბში გაყიდვას არ აპირებს. ეს “ლელოსთან” აჭარული კლუბის სპონსორმა არჩილ ბერიძემ თქვა.
ლვოვის “კარპატი” და ლუგანსკის “ზორია” უარყოფენ ინფორმაციას, რომლის თანახმადაც, ბათუმის “დინამოს”, რამოსის საფასურად, 300 ათასს სთავაზობენ. 

არჩილ ბერიძესთან ინტერვიუ სწორედ ამ კითხვით დავიწყეთ და სხვა მნიშვნელოვან თემებსაც შევეხეთ...

- ბოლო დროს გავრცელებული ცნობებით, გაბრიელ რამოსს უკრაინული კლუბები იწვევს...

- ეს ინფორმაცია ნაწილობრივ მართალია - ჩვენი ბრაზილიელი ლეგიონერის, გაბრიელ რამოსის გადაბირება, უკრაინული კლუბების გარდა, კიდევ ბევრს სურდა. მაგრამ პირდაპირ გეტყვით - ეს ტრანსფერი არ შედგება.

- უკრაინელთა პირობები მიუღებელია?

- არა, უბრალოდ, ეს არ განხორციელდება. ბრაზილიელ ლეგიონერს ჩვენთან კონტრაქტი 2021 წლამდე აკავშირებს და არც მის გაშვებას ვაპირებთ, არც ჯოვინოსი.

- გავიგეთ, რომ პრაღის “სლავიას” ჯოვინო ფლამარიონის გაყიდვასა და 400 ათას ევროზე უარი უთხარით, ხოლო უკრაინელებს რამოსში - 300 ათასზე. კლუბს შემოსავლის გაზრდა არ უნდა?

- სხვათა შორის, მარტო მათ მიმართ არ არის ინტერესი, ხოლო ბიუჯეტის შევსება ყველა კლუბის სურვილია. მაგრამ მეორე მხარეცაა - ყველა ლიდერი ასე თუ გავყიდეთ, ბათუმელ გულშემატკივარს რა პასუხს გავცემთ? ხალხი სტადიონზე სიხარულისთვის მოდის და უპასუხისმგებლოდ არ უნდა მოვექცეთ. ასე რომ, ლიდერების გაყიდვა განხილვას არ ექვემდებარება, სანამ ბათუმის “დინამო” საქართველოს ჩემპიონი არ გახდება და ევროპაზე არ ითამაშებს. 

- ამას დრო დასჭირდება...

- რა თქმა უნდა, და ამისთვის მზად ვართ! ერთი წელი დაგვჭირდება, ორი თუ სამი, არ აქვს მნიშვნელობა, ჩვენ ლიდერებს არ შეველევით, გუნდის ბირთვს შევინარჩუნებთ და მოთამაშეებს არათუ გავყიდით, პირიქით, აქეთ დავიმატებთ. 

- ბათუმის “დინამოს” შესაძლო ტრანსფერებზე დიდი მითქმა-მოთქმაა. ამ მიმართულებით კონკრეტული ნაბიჯები გადაიდგა?

- მოლაპარაკება ბრაზილიის 19-წლამდელთა ნაკრების წევრთან დავიწყეთ. ჯოვინო ფლამარიონი, გაბრიელ რამოსი და ალეფ სანტოსი სწორედ მისმა მენეჯერმა ჩამოგვიყვანა, რომელიც დიდი ხანია, “დინამოსთან” თანამშრომლობს. 

- არა მგონია, ამას დასჯერდეთ...

- ერთი კონკრეტული ამბავიც შემიძლია გითხრათ, რომ ზაფხულში ბათუმის “დინამომ” პირველი ტრანსფერი განახორციელა - ჩვენთან გადმოვიდა მამუკა კობახიძე, რომელსაც საქართველოს ნაკრებშიც უთამაშია, ბოლოს კი ქუთაისის “ტორპედოში” გამოდიოდა.

- ის ხომ ქუთაისის “ტორპედოში” რჩებოდა? მან მაისში ბათუმის “დინამოში” გადასვლასთან დაკავშირებით გავრცლებული ინფორმაცია უარყო...

- ფაქტია, რომ ის კარიერას ბათუმის “დინამოში” გააგრძელებს.

- ეს მხოლოდ სიტყვიერი შეთანხმებაა?

- არა მხოლოდ, უკვე კონტრაქტიც გავაფორმეთ.

- რა ვადით?

- ხელშეკრულება ორწელიწად-ნახევარზეა გათვლილი. ჩვენ გვინდა სერიოზულად გაძლიერებული ბათუმის “დინამო”, რომელიც ევროპაშიც ღირსეულად ითამაშებს, საამისოდ კი თადარიგი აქედანვე უნდა დავიჭიროთ. გია გეგუჩაძე გუნდს აშენებს და ამაში ხელი უნდა შევუწყოთ. რა თქმა უნდა, სხვების დამატებაც გვსურს, მაგრამ ჯერ მათ გვარებს ვერ გეტყვით...

სხვათა შორის, გიას სერბი ფიზმომზადების მწვრთნელი დაეხმარება, რომელსაც თავისი ქვეყნის ეროვნული ნაკრების დონეზე უმუშავია. ჩვენს ფეხბურთში ამ კუთხით სერიოზული პრობლემებია და თავადაც მიხვდებით, ეს საკითხი თანამედროვე ფეხბურთში რამდენად მნიშვნელოვანია. ამით ბათუმის “დინამო” წინსვლას იმედოვნებს. 

- კლუბის თქვენს საკუთრებაში გადასვლასთან დაკავშირებით ნაბიჯი უკვე გადაიდგა - ბათუმის საკრებულომ “დინამო” აჭარის მთავრობას გადასცა, რომელიც პირდაპირი წესით კლუბს თქვენ გადმოგცემთ. მაგრამ როდის მოხდება ეს და ამ კუთხით სიახლე თუ არის?

- იურიდიული მხარე გვარდება, თორემ საკითხი, ფაქტობრივად, გადაწყვეტილია. მაგრამ ეს არ უშლის ხელს გუნდის მომზადებას, დაკომპლექტებას და ჩემპიონატში წარმატებულად გამოსვლას.

- არც თქვენ გიშლით ხელს?

- რა თქმა უნდა, არც მე მიშლის. ვიქნები თუ არა მისი მეპატრონე, ეს მეასეხარისხოვანი საკითხია. ადრეც ვთქვი და ახლაც გავიმეორებ - ბათუმის “დინამო” ჩემთვის ძვირფასი გუნდია და მას გვერდში ამიტომაც დავუდექი. მაგრამ, როცა გადმომეცემა, მერე უფრო თამამად მივხედავ.

ყოველდღიური სპორტული გაზეთი "ლელო"
6868
მკითხველის კომენტარები / 3 /
omari beridze
0
ნამდვილი ბათუმელი! გაიხარე და წარმატებები!! ჩვენ, ქომაგები, თქვენს გვერდით გვიგულე!!!
les
0
კარგი კაცი
მსგავსი ამბები
რუბრიკის სხვა სიახლეები
;