ბათუმის 'დინამოში' მეხუთე ახალწვეულია

ბათუმის „დინამოს“ გიორგი გადრანი შეემატა. გია გეგუჩაძის გუნდის კიდევ ერთი ახალწვეული 24 წლის მცველია, რომელიც თამაშობდა „გაგრაში“, საიდანაც უკრაინაში გადავიდა და „დესნაში“ გამოდიოდა, მერე კი - ოდესის „ჩერნომორეცსა“ და თბილისის „დინამოში“. გასული სეზონის მეორე ნახევარი კი გორის „დილაში“ გაატარა.

გადრანი ბათუმის „დინამოს“ მეხუთე ახალი ფეხბურთელია. მანამდე, გეგუჩაძემ გუნდში მიიწვია ნახევარმცველი გიული მანჯგალაძე (ლატვიური „ვენტსპილსის“ ღირსებას იცავდა), მარჯვენა მცველი კიჭი მელიავა (მარტვილის „მერანი“) და „გაგრას“ ფეხბურთელები - რატი ცაცკრიალაშვილი და თორნიკე გაფრინდაშვილი.
გუნდი ჯერ ოფიციალურად მხოლოდ გიორგი განუგრავამ დატოვა. მაგრამ მოსალოდნელია, რომ მოთამაშეთა ნაწილს „შუქურაში“ იჯარით გაუშვებენ. ეს ამბავი ქობულეთელთა ოფიციალურმა გვერდმა გაავრცელა.

ბათუმის „დინამოდან“ „შუქურაში“ იჯარით რამდენიმე ფეხბურთელი ითამაშებს, რომელთა ვინაობაც უახლოეს დღეებში გახდება ცნობილი.

ქობულეთის „შუქურამ“ სეზონისთვის მზადება დაიწყო და თბილისში ვარჯიშობს. კლუბის პრესსამსახურმა საკადრო სიახლეები გაავრცელა და ცნობილი გახდა, რომ მეკარეების მწვრთნელად ბათუმის „დინამოდან“ იური მამინაშვილი მიიწვიეს.

გუნდის მთავარი მწვრთნელის პოსტზე კვლავ თენგიზ კობიაშვილი იმუშავებს, რომელმაც გუნდი მაისში ჩაიბარა და შეუძლებელი შეძლო - გასავარდნად განწირული გუნდი პლეი აუტის გარეშე დარჩა ეროვნულ ლიგაში 2-ში.

სამივე ლეგიონერთან (ფელიპე ნუნიეში, ჯეფერსონ ჯერალდო, დოს რეის რამოსი) დარჩენაზე მოლაპარაკება მიმდინარეობს, მაგრამ ეს საკითხი ჯერ გადაწყვეტილი არ არის. თუმცა, ცნობილია, რომ წამყვანი მოთამაშეები ახალ სეზონშიც „შუქურაში“ ითამაშებენ. კლუბის ხელმძღვანელებმა ბირთვის შენარჩუნება მოახერხეს.

ყოველდღიური სპორტული გაზეთი "ლელო"
1242
მკითხველის კომენტარები / 0 /
მსგავსი ამბები
რუბრიკის სხვა სიახლეები
;