ბათუმის "დინამო" სეზონს რადიკალური ცვლილებებით შეხვდება

2018 წლის საფეხბურთო სეზონის დაწყებას ბათუმის "დინამო" რადიკალური ცვლილებებით შეხვდება.

უკვე ოფიციალურად დადასტურდა, რომ გუნდის მთავარი მწვრთნელის პოსტს გია გეგუჩაძე დაიკავებს. ეს ამბავი 52 წლის სპეციალისტმა "ლელოს" თავად დაუდასტურა.

ცხადია, საინტერესოა, რა ბედი ელით გუნდის ამჟამინდელ ხელმძღვანელებს. დადასტურებულად შეგვიძლია ვთქვათ, რომ გუნდში დარჩება ასლან ბალაძე, რომელსაც ბათუმის "დინამო" ოქტომბერში ჩააბარეს, უკრაინელი სპეციალისტის, კონსტანტინ ფროლოვის დათხოვნის შემდეგ.

იმ პერიოდში გუნდი უკიდურესად მძიმე მდგომარეობაში იყო. მაგრამ დანიშვნა უკვე დაგვიანებული იყო და დაღმასვლით წასული გუნდის შეჩერება ბალაძემ ვეღარ შეძლო და "დინამო" ეროვნული ლიგიდან გავარდა. როგორც ცნობილია, ბალაძე "დინამოს" სპორტულ დირექტორად იმუშავებს.

ჯერ უცნობია, რა როლში იმუშავებს მალხაზ მახარაძე, რომელიც აქამდე სპორტული დირექტორი გახლდათ. ჯერ გადაწყვეტილი მხოლოდ ის არის, რომ იქნებიან გეგუჩაძე და ბალაძე. დიდი ალბათობით, მახარაძე კლუბს მომავალშიც დაეხმარება.

ბევრი რამ არის დამოკიდებული იმაზე, თუ როდის გაიმართება ტენდერი ბათუმური კლუბის გასხვისებაზე. ეს ჯერ უცნობია. მაგრამ აჭარაში ფეხბურთისკენ რომ მოტრიალდნენ, ამაზე ბევრი რამ მიუთითებს.

თუნდაც ის ფაქტი, რომ ბათუმის "დინამოს" გასხვისება იგეგემება, კლუბს ეს უნდა წაადგეს. გარდა ამისა, უკვე გამოცხადებულია ტენდერი, რომლის მიხედვითაც ბათუმის "დინამოს" მაღალი სტანდარტების, უეფას მე-4 კატეგორიის სტადიონს 2020 წლისთვის აუშენებენ.

რაც შეეხება საკადრო სიახლეებს, ჯერ მხოლოდ წასულების გვარებია ცნობილი. ახალწვეულთა ვინაობა კი გეგუჩაძესთან კონტრაქტის გაფორმების შემდეგ გაირკვევა.

ყოველდღიური სპორტული გაზეთი "ლელო"
1472
მკითხველის კომენტარები / 1 /
OTAR
1
TBILIS DINAMOS ,KUTAIS TORPEDO XVES XAVS PATRONI,BATUMIS DINAMOM RA DASHAVA...
მსგავსი ამბები
რუბრიკის სხვა სიახლეები
;