ბათუმში დამთავრდა საქართველოს ჩემპიონატი ბერძნულ-რომაულ სტილში მოჭიდავე 23-წლამდელებს შორის

ბათუმის სასპორტო სკოლაში გუშინ ფინალური ბლოკით დამთავრდა საქართველოს ჩემპიონატი ბერძნულ-რომაულ სტილში მოჭიდავე 23-წლამდელებს შორის, რომელმაც საინტერესო პაექრობებში ჩაიარა.

გამოვლინდნენ ჩემპიონები 10-ვე წონაში, რომლებმაც, დიდწილად, გაინაღდეს ევროპის თანატოლთა ჩემპიონატში მონაწილეობა.

ნაკრების მთავარ მწვრთნელ სოსო ჯაბიძის თქმით, მათ მხოლოდ იმ შემთხვევაში შეცვლიან, საერთაშორისო ტურნირებზე შედეგს თუ ვერ აჩვენებენ.

ფინალურ ბლოკში რამდენიმე გამორჩეული შეხვედრა ვიხილეთ, თუმცა ერთი მათგანი, უდავოდ, გამორჩეული იყო: აჭარის ნაკრების წევრმა რამაზ ზოიძემ (72) ფინალური ორთაბრძოლა ოზურგეთელ გიორგი ხუჭუასთან 21 წამში ქულებით წმინდად მოიგო: 8:0. შეხვედრა იმდენად სწრაფად დასრულდა, ფინალისტთა სეკუნდანტებმა ხეირიანად სკამზე მოკალათებაც ვერ მოასწრეს.

ზოიძე ამ მოგებისთვის სპეციალური პრიზითაც დაჯილდოვდა. ასეთივე სტილში - ჩაყვანა+სამი დატრიალებით მოიგო ფინალი სამტრედიელმა გიორგი მელიამაც (97) ოზურგეთელ ალექსი ლოდიასთან, თუმცა მას საამისოდ 2 წუთზე მეტი დასჭირდა.

უდავოდ გამორჩეული იყო მძიმე წონის მესამე წრის შეხვედრაც ქუთაისელ ზვიად პატარიძესა და თბილისელ ბექა კანდელაკს შორის, რომელშიც ჩემპიონის საკითხი ირკვეოდა.

კანდელაკმა მედგრად იბრძოლა, მაგრამ პატარიძეც გაზრდილა, ფიზიკურად უფრო მომძლავრებულა და დამაჯერებლად მოიგო: 5:1. თუმცა მან ქულები დგომში მოიპოვა, თორემ პირველ პერიოდში, როცა მეტოქე პასიურობისთვის ქულითაც დასაჯეს და ჩოქბჯენშიც ჩააყენეს, ვერ დაატრიალა.

სამაგიეროდ, მეორეში ჯერ დგომიდან გადააგდო - 3:1, შეხვედრის ბოლოს კი მოძრაობაზე დაიჭირა კანდელაკი და დაბლა ჩააგდო.

ძალიან საინტერესო პაექრობები გამართეს ოზურგეთელმა შოთა ღლონტმა (55) ალექსანდრე ღოღობერიძესთან, აჭარის ნაკრების წევრებმა - ირაკლი შავაძემ (60) ნიკა ბალანჩივაძესთან, ლერი აბულაძემ (63) ირაკლი ნაკაშიასთან.

ირაკლი შავაძე და ლერი აბულაძე თავიდან 1:4 აგებდნენ ფინალში, მაგრამ შეძლეს შეხვედრის შემობრუნება და პირველმა 8:5, მეორემ კი 10:8 მოიგეს. მათი წარმატების ძირითად იარაღადაც ჩოქბჯენში ჩაყვანა და იქ დატრიალება იქცა.

უფროსი ძმის - ლერისგან განსხვავებით, ოთარ აბულაძემ უპრობლემოდ მოუგო ქერიმ მაჩალიკაშვილს. გუშინ დარბაზში მათი მწვრთნელი მამა - ავთანდილ აბულაძე (ოლიმპიური პრიზიორი შმაგი ბოლქვაძეც მისი მოსწავლეა) უბედნიერესი კაცი იყო.

სიტყვა ძმებზე ჩამოვარდა და უმჩატეს წონაში ერთად ავიდნენ კვარცხლბეკზე აჭარის ნაკრების ტყუპი ძმები - ალექსანდრე და ლევან ღოღობერიძეები, ხოლო 87-ში კიდევ ერთი ტყუპი ძმა, ამჯერად თერჯოლიდან კვარცხლბეკზე იდგა - ლაშა და გიორგი დევიძეები. მათ ერთნაირად იჭიდავეს - ორივე წყვილმა ვერცხლ-ბრინჯაო მოიპოვა. საინტერესოა, რომ ღოღობერიძეები "თავისუფალსაც" ჭიდაობენ.

სოსო ჯაბიძე (23-წლიანთა ნაკრების მთავარი მწვრთნელი): "შეჯიბრებამ საინტერესოდ ჩაიარა. ძირითადად ახალგაზრდული ასაკის ლიდერებმა გაიმარჯვეს, თუმცა იყვნენ ახალი კადრებიც.

ჩემპიონატისგან გათავისუფლებული იყო ოთხი წევრი, რომლებმაც ეროვნულ ჩემპიონატში გაიმარჯვეს და უფროსებში უნდა იჭიდაონ ევროპის ჩემპიონატზე:

ნუგზარ წურწუმია (55), დავით ჩხარტიშვილი (60), ლევან ქავჟარაძე (63) და იური ლომიძე (67). ევროპის ჩემპიონატზე 90 პროცენტით ახლანდელ ჩემპიონებს წავიყვანთ, საერთაშორისო ტურნირებზე უშედეგოდ თუ არ გამოვლენ.

ისინი გამოვლენ საერთაშორისო ტურნირზე ბულგარეთში, მერე შეკრებას გავივლით სოჭში, მერე კი საერთაშორისო კალენდარში შეჯიბრებები ნაკლებადაა, მაგრამ თუ რამეს გამოვძებნით, წავალთ და ასე მოვემზადებით ევროპის ჩემპიონატისთვის".

55 კგ.
1. შოთა ღლონტი (ოზურგეთი); 2. ალექსანდრე ღოღობერიძე (აჭარა); 3. ბექა ადიკაშვილი (გარდაბანი), ლევან ღოღობერიძე (აჭარა).

60 კგ.
1. ირაკლი შავაძე (აჭარა); 2. ბექა ბალანჩივაძე (წყალტუბო); 3. ბაჩუკი შავაძე (აჭარა), გია კუჭავა (ფოთი).

63 კგ.
1. ლერი აბულაძე (აჭარა); 2. ირაკლი ნაკაშია (ხობი); 3. ლაშა ჯანელიძე (წყალტუბო); მამუკა გურული (რუსთავი).

67 კგ.
1. ოთარ აბულაძე (აჭარა); 2. ქერიმ მაჩალიკაშვილი (საგარეჯო); 3. თორნიკე ჭელიძე (აჭარა), გიორგი გუჯაბიძე (ოზურგეთი).

72 კგ.
1. რამაზ ზოიძე (აჭარა); 2. გიორგი ხუჭუა (ოზურგეთი); 3. გიორგი კურტანიძე (გარდაბანი); გოგა პერტახია (ხობი),

77 კგ.
1. ბაკურ გოგოლი (თბილისი); 2. ბექა მამუკაშვილი (გარდაბანი); 3. მინდია ბოლქვაძე, მიხეილ მახარაძე (ორივე აჭარა).

82 კგ.
1. გელა ბოლქვაძე (აჭარა); 2. კონსტანტინე ბარბაქაძე (გარდაბანი); 3. დავით გოგიძე (ქუთაისი), გიორგი ურუშაძე (აჭარა).

87 კგ.
1. გურამ ხეცურიანი (ქუთაისი); 2. ლაშა დევიძე; 3. გიორგი დევიძე (ორივე - თერჯოლა), ვარლამ კვარაცხელია (ხობი).

97 კგ.
1. გიორგი მელია (სამტრედია); ალექსი ლოდია (ოზურგეთი); 3. კახა კალანდაძე (ოზურგეთი), საბა ბუხრიკიძე (აჭარა).

130 კგ.
1. ზვიად პატარიძე (ქუთაისი); 2. ბექა კანდელაკი (თბილისი); 3. სულხან ბუიძე (ქუთაისი).

ყოველდღიური სპორტული გაზეთი "ლელო"
1044
მკითხველის კომენტარები / 0 /
მსგავსი ამბები
რუბრიკის სხვა სიახლეები
;