ბანკის მენეჯერობიდან ჩელსის მწვრთნელობამდე - ვინ არის არისტოკრატთა თავკაცი?

როგორც იქნა, "ჩელსიმ" სამწვრთნელო საკითხი მოაგვარა. ანტონიო კონტეს ნაცვლად გუნდი მაურიციო სარიმ ჩაიბარა, ვისაც ლონდონელი გულშემატკივრები ძალიან დიდ იმედებს უკავშირებენ. რომან აბრამოვიჩის ერაში სარი "არისტოკრატების" მე-14 მწვრთნელი გახდა. ის პირველად მოსინჯავს ძალებს პრემიერლიგაში და, რა თქმა უნდა, ეს მისთვის ძალიან დიდი გამოწვევაა...

აღმავლობა

მაურიციო სარის სამუშაო გამოცდილება მნიშვნელოვნად განსხვავდება იმ 13 მწვრთნელის მიერ განვლილი გზისგან, რომელიც რომან აბრამოვიჩის წინა რჩეულებმა გაიარეს. 10 წლის განმავლობაში ის სამოყვარულო დონეზე მუშაობასაც არ თაკილობდა. ასევე საკვანძო თანამდებობა ეჭირა იტალიისა და, საერთოდ, მსოფლიოს ერთ-ერთ უძველეს ბანკში.

2000-იანი წლების შუა პერიოდში სარიმ საბანკო კარიერა გვერდზე გადადო და იტალიის რანგით მეექვსე ლიგის ბინადარ "სანჯოვანეზეში" მივიდა მწვრთნელად. მერე იყო პროფესიული დონე - "პესკარა" და "ემპოლი" სერია B-ში. სწორედ "ემპოლიში" გაიცნო ის იტალიურმა საფეხბურთო თემმა.

2003-12 წლებში სარი მთლიანობაში 12 კლუბს წვრთნიდა. "მწვრთნელი თევზივითაა. როცა საფრთხეს გრძნობს, მიცურავს", - ეს სწორედ სარის სიტყვებია და ამით მან მიანიშნა, რომ მწვრთნელისთვის სამუშაო ადგილის ცვლა ჩვეულებრივი ამბავია.

მან განსაკუთრებით ნაყოფიერად იმუშავა "ემპოლიში", რომელთან ერთადაც სერია A-ში გადასასვლელ პლეი ოფს უწია, მაგრამ "ლივორნოსთან" დამარცხდა. მომდევნო სეზონში "ემპოლი" უკვე ყოველგვარი პლეი ოფის გარეშე აღზევდა იტალიურ ელიტაში და სარის კარიერაში ცვლილების დროც დადგა.

მან თავისი მშობლიური ქალაქის კლუბს - "ნაპოლის" მიაშურა. თავიდან ერთწლიანი კონტრაქტი შესთავაზეს. მალე ის აურელიო დე ლაურენტისის საყვარელი მწვრთნელი გახდა. სარიმ მეორე ადგილზე გაიყვანა "ნაპოლი" და ევროპულ საკლუბო ფეხბურთს დაუბრუნა.

მისი ფეხბურთი

"ჩვენ დღეს ძლიერ მეტოქესთან წავაგეთ. მათი ფეხბურთი არის ზუსტად ის, რომელიც ასე ძალიან მიყვარს", - თქვა "ნაპოლის" მთავარმა მწვრთნელმა მას შემდეგ, რაც მისი გაწვრთნილი გუნდი ჩემპიონთა ლიგაში პეპ გვარდიოლას "მანჩესტერ სიტისთან" დამარცხდა. აქედან ცხადი ხდება, თუ როგორი ფეხბურთი ხიბლავს აბრამოვიჩის მე-14 რჩეულს.

"ბარსელონასა" და "სიტის" შემდეგ, ალბათ, არავის უთამაშია ასეთი მაღალი პრესინგი. გარდა ამისა, აღტაცებას იწვევდა გუნდის უაღრესად შემტევი სტილი და 4-3-3 ტაქტიკური სქემა, რომელიც არც არასოდეს ირღვეოდა.

"ნაპოლის" ფეხბურთი არ არის ამქვეყნიური ფეხბურთი. ისინი, უბრალოდ, დიდებულები არიან. ქარიშხლისებური შეტევა აქვთ", - კომპლიმენტითვე უპასუხა გვარდიოლამ სარის.

სავარჯიშო მეთოდები

მას შეუძლია, მთელი დღის განმავლობაში იყოს მინდორზე. უდიდეს ყურადღებას უთმობს ტაქტიკას. ტაქტიკურად სუსტი ფეხბურთელის ადგილი სარის გუნდში არ არის. გარდა ამისა, მას უყვარს მრავალფეროვნება.

ყოვლისმცოდნე იტალიელმა ჟურნალისტებმა გამოჩხრიკეს, რომ "სანჯოვანეზეში" მუშაობის დროს მან ვარჯიშის 33 სხვადასხვა მეთოდი გამოიყენა ერთი წვრთნის განმავლობაში. ის თავისუფლებას არ ამადლის ფეხბურთელებს. წყვეტს ხოლმე ვარჯიშს და საშუალებას აძლევს მათ... "ესპრესო" დალიონ.

სარისთვის არ არსებობს შეუცვლელი ფეხბურთელი. როცა თავის დროზე "ნაპოლი" სეზონში 38 გოლის გამტანმა გონსალო იგუაინმა დატოვა, ბევრმა მიიჩნია, რომ ნეაპოლელებს ძალიან გაუჭირდებოდათ, მაგრამ... სარიმ იპოვა გამოსავალი, ცენტრფორვარდად დააყენა დრის მერტენსი, რომელმაც იმ სეზონში 34 გოლი მიითვალა.

სიგარეტი და ურთიერთობა
ჟურნალისტებთან

ის არად დაგიდევთ ბოლოდროინდელ აკრძალვებს და ძველებურად ბევრს ეწევა. როგორც ამბობენ, ხშირად მას დღეში 5 კოლოფიც კი არ ჰყოფნის. ეწევა თამაშის დროსაც, თუ საამისო საშუალება გაუჩნდება.

მას მაინცდამაინც არ უყვარს ჟურნალისტები და ხშირად ისეც მომხდარა, რომ მათთან ბილწსიტყვაობაშიც ყოფილა შემჩნეული. რას ვიზამთ, კაცია და ბუნება...

რა ელის სარის ჩელსიში?

ფაქტია, სარიმ "ჩელსი" უნდა შეცვალოს. მისი ხელმძღვანელობით ლონდონური კლუბი უფრო შემტევი უნდა გახდეს. სწორედ აბრამოვიჩისა და ბევრი ქომაგისთვის მიუღებელი სათამაშო სტილი გახდა სარის თანამემამულე ანტონიო კონტეს შეცვლის მიზეზი.

რა თქმა უნდა, სარის ეს შეუძლია, მაგრამ აქვე ჩნდება ერთი მნიშვნელოვანი სირთულე. მას მთელი კარიერის განმავლობაში არასოდეს გაუწვრთნია კლასიკური გრანდი და არც ამდენ ვარსკვლავთან უმუშავია.

მაგრამ ოდესღაც მწვრთნელის ცხოვრებაში ყველაფერი პირველად ხდება. აქედან გამომდინარე, დაუძლეველი დაბრკოლება ალბათ არ არსებობს...

ყოველდღიური სპორტული გაზეთი "ლელო"
2393
მკითხველის კომენტარები / 0 /
მსგავსი ამბები
რუბრიკის სხვა სიახლეები
;