ბარსამ ჩავის შეცვლის მცდელობაში 300 მილიონი დახარჯა... მაგრამ სად არის შედეგი ?

სამი წელიწადი გავიდა მას მერე, რაც ჩავი ერნანდესმა "ბარსელონა" დატოვა და ყატარში გადაბარგდა. ახლა ნახევარმცველი 38 წლისაა და კარიერის უკანასკნელ თვეებს ითვლის, "ბლაუგრანას" კი ჯერაც ვერ ამოუვსია ის სიცარიელე, რაც ყოფილი კაპიტნის დაკარგვით მიიღო.

ამ ხნის განმავლობაში კლუბმა გააგრძელა ტიტულების მოპოვება, მაგრამ თამაშის სტილი იგივე აღარ არის. არადა, "ბარსა" ბევრს ეცადა - ჩავის სავარაუდო შემცვლელებზე კლუბმა ჯამში 265 მილიონი ევრო დახარჯა და წინ მთელი სატრანსფერო სეზონია.

ანდრეს ინიესტასთან, სერხიო ბუსკეტსთან და ივან რაკიტიჩთან ერთად სათამაშოდ ვინ აღარ სცადა კატალონიურმა გრანდმა - არდა თურანი, ანდრე გომეში, დენის სუარესი, პაულინიო, ფილიპე კოუტინიო და ახლა არტურ მელოც.

ამათგან ყველაზე მეტი პაულინიოსა და კოუტინიოს გამოუვიდათ, თუმცა ჩავის ჩანაცვლება არც ისე იოლია, პაულინიო უკვე ჩინურ სუპერლიგას დაუბრუნდა და "ბარსელონაში" აღარ ირიცხება. არდა თურანმა და ანდრე გომეშმა აშკარად ვერ გაამართლეს, სუარესი ახლაც ცდილობს.

არტურ მელო, რომელიც ახლახან გადმოვიდა "გრემიოდან", მეექვსე ფეხბურთელია, რომელსაც ასე თუ ისე ჩავის პოზიციაზე განიხილავენ, მას ჯერ შანსი არ მისცემია, ყველაფერი წინ აქვს. ბრაზილიელს ჩავის ამსგავსებენ, რადგან ისიც გუნდურ თამაშშია ძლიერი და კარგად ქმნის გუნდისთვის თავისუფალ სივრცეებს, მაგრამ ეს ყველაფერი მან უნდა დაამტკიცოს, რომ "კამპ ნოუზეც" შეუძლია, სადაც გაცილებით მაღალი დონის ფეხბურთია საჭირო, ვიდრე ბრაზილიურ სერია A-ში.

ახლა, როცა არა მარტო ჩავის, არამედ ანდრეს ინიესტას პოზიციაც შესავსებია, "ბარსელონაში" მწვავედ დგას კარგი ნახევარმცველ(ებ)ის შეძენის საკითხი. კლუბის დირექტორები ახალი ფიგურის ძიებაში არიან. გაიჟღერა ადრიენ რაბიოს სახელმა, ასევე ფრენკი დე იონგმა.

დღევანდელი საბაზრო ფასების გათვალისწინებით, რომელზეც არ უნდა შეჩერდეს არჩევანი, "ბარსას" ეს სიამოვნება 30 მილიონ ევროზე ნაკლები არ დაუჯდება - გამოდის, რომ პოსტჩავისეულ ეპოქაში კატალონიელები 300 მილიონ ევროს ხარჯავენ, შედეგი კი ჯერ არ ჩანს...

ყოველდღიური სპორტული გაზეთი "ლელო"
1415
მკითხველის კომენტარები / 0 /
მსგავსი ამბები
რუბრიკის სხვა სიახლეები
;