ბარსელონადან იუვენტუსში, იუვენტუსიდან ბარსელონაში... ორი საინტერესო ტრანსფერის ამბავი

"ბარსელონამ" გამოაცხადა, რომ "იუვენტუსისგან" მირალემ პიანიჩი იყიდა. კატალონიური გრანდის ოფიციალური საიტი გვამცნობს, რომ 30 წლის ბოსნიელ ნახევარმცველში 60 მილიონი ევრო გადაიხადეს და თუ ფეხბურთელი თავს გამოიჩენს, "ბებერ ქალბატონს" კიდევ 5 მილიონს დაუმატებენ.

პიანიჩი "ბარსელონაში" სეზონის დასრულებისთანავე გადავა და კონტრაქტის თანახმად, "კამპ ნოუზე" 2024 წლის ივნისის ბოლომდე დარჩება. "იუვენტუსმა" კი, თავის მხრივ, "ბარსასგან" ბრაზილიელი არტურ მელო გადაიბირა.

ესეც დაანონსებული ტრანსფერი გახლდათ, უბრალოდ, ოფიციალური დადასტურება აკლდა. და აი, ისიც - "იუვენტუსმა" 23 წლის ნახევარმცველში 72 მილიონი ევრო გაიღო. კონტრაქტი 5-წლიანია. არტური იტალიას სეზონის დასრულებისთანავე მიაშურებს და უარს იტყვის "ბარსასთან" ერთად ჩემპიონთა ლიგის მატჩებში მონაწილეობაზე.

"იუვენტუსში" არტურის ხელფასი წლიურად 7 მილიონი ევრო იქნება, გარდა ბონუსებისა. შეგახსენებთ, რომ "ბლაუგრანას" მაისურით არტურმა 72 მატჩი ჩაატარა, 4 გოლი გაიტანა და 6 საგოლე გადაცემა შეასრულა.

313
მკითხველის კომენტარები / 0 /
მსგავსი ამბები
რუბრიკის სხვა სიახლეები
;