ბარსელონური მედია რონალდოს წინააღმდეგ: იყო 20 ანალოგიური შემთხვევა...

ჩემპიონთა ლიგის ჯგუფური ეტაპის, ერთი შეხედვით, რიგითი მატჩი კრიშტიანო რონალდოს არასოდეს დაავიწყდება. პორტუგალიელმა ვარსკვლავმა ამ ტურნირში ჩატარებულ 154 მატჩში პირველი წითელი ბარათი მიიღო და ბავშვივით იტირა.

რაც მთავარია, ეს იყო რონალდოს დებიუტი ჩემპიონთა ლიგაზე "იუვენტუსის" მაისურით, თან იმ ფონზე, რომ წინა დღეს ჰეთ თრიკი შეასრულა ლიონელ მესიმ...

მაშ ასე, "მესტალია", 29-ე წუთი. კრიშტიანო ვალენსიელთა მცველ მურილიოს შეეჯახა. ეს უკანასკნელი მინდორზე დაეცა, რის შემდეგაც პორტუგალიელი მას თმებში სწვდა და, როგორც ჩანს, არასასიამოვნო სიტყვებიც უთხრა.

გერმანელმა არბიტრმა ფელიქს ბრიხმა ასისტენტებთან კონსულტაცია გაიარა, რის შემდეგაც რონალდო მინდვრიდან გააძევა.

"არ ვიცი, რატომ მიიღო მსაჯმა ასეთი გადაწყვეტილება. პირველად, კრიშტიანოს მურილიო შეეხო. ეს იყო ჩვეულებრივი ორთაბრძოლა და მეტი არაფერი", - თქვა "იუვეს" ცენტრალურმა მცველმა ლეონარდო ბონუჩიმ.

"ეს ეპიზოდი კიდევ ერთხელ გვარწმუნებს, რომ ვიდეორეფერი ჩემპიონთა ლიგაზე უნდა იყოს. ამას ვერ გავექცევით. ასე რომ ყოფილიყო, მსაჯი ასეთ გადაწყვეტილებას  არ მიიღებდა.

ჩვენთვის ეს იყო ძალიან მძიმე ვერდიქტი. თავისუფლად შეიძლებოდა, წაგვეგო, მაგრამ ხასიათი გამოვავლინეთ. ჩვენ არ წავაგეთ რონალდოს გამო და იმედი მაქვს, არც არასოდეს წავაგებთ!..

ცუდი ისაა, რომ კრიშტიანო ჩემპიონთა ლიგის მომავალ მატჩებში დაგვაკლდება. ის გულმოკლულია და ალბათ ხანგრძლივი დრო დასჭირდება, რათა საბოლოოდ დამშვიდდეს", - თქვა "ბებერი ქალბატონის" დამრიგებელმა მასიმილიანო ალეგრიმ.

ეპიზოდზე კომენტარი გააკეთა ინგლისელმა არბიტრმა მარკ კლატენბურგმა, რომელიც მიიჩნევს, რომ ბრიხმა ამ გადაწყვეტილებით "გადაამლაშა". მისთვის გაუგებარია, რა დაინახა ისეთი დამხმარე არბიტრმა 20 მეტრის დაშორებით, რაც ვერ შენიშნა უფრო ახლოს მყოფმა გერმანელმა რეფერიმ.

რა თქმა უნდა, ბარსელონურმა მედიამ შანსი არ გაუშვა ხელიდან და რონალდოს "უკბინა" - პორტუგალიის ნაკრებსა და "რეალში" მას დაახლოებით 20 ანალოგიური ეპიზოდი ჰქონდა და, ბოლოს და ბოლოს, დაისაჯაო. "ის ამისკენ მიდიოდა", - წერს "ელ მუნდო დეპორტივო".

ყოველდღიური სპორტული გაზეთი "ლელო"
693
მკითხველის კომენტარები / 0 /
მსგავსი ამბები
რუბრიკის სხვა სიახლეები