ბასილაშვილის პატარა სასწაული

მსოფლიოს 82-ე ჩოგანმა ნიკოლოზ ბასილაშვილმა მეორე მატჩი ჩაატარა ჰამბურგის ტურნირზე და მეოთხედფინალამდე გააღწია.

მერვედფინალში ქართველმა საათსა და 44 წუთში დაამარცხა ურუგვაელი პაბლო კუევასი - 7:6(6), 6:4.

მიუხედავად იმისა, რომ მატჩში პირველი ბრეიკი კუევასმა შეასრულა და საწყის სეტში 3:1 დაწინაურდა, თითქმის მთელი თამაშის განმავლობაში ბასილაშვილი დომინირებდა. მან 9 ბრეიკ-პოინტი გამოიმუშავა (მეტოქეს სამი ბრეიკ-პოინტი ჰქონდა) და ორჯერ აიღო ურუგვაელის მოწოდება.

პირველ სეტში ნიკამ მეექვსე გეიმში შეძლო უკუბრეიკის შესრულება და ანგარიში გაათანაბრა. 5:4-ზე, ბასილაშვილს ორი სეტბოლი ჰქონდა, მაგრამ შანსები ვერ გამოიყენა და პარტიის ბედი ტაი-ბრეიკმა გაარკვია.

იქ ქართველმა სასწაული მოახდინა - 1:6 ჩამორჩა და კუევასს ხუთმაგი სეტბოლის შანსი მისცა, თუმცა, ხუთივე საფრთხე მოიგერია, ჯამში ზედიზედ შვიდი ქულა აიღო და მე-13 გეიმი 8:6 მოიგო.

მეორე სეტში გადამწყვეტი აღმოჩნდა მეშვიდე გეიმში ბასილაშვილის მიერ შესრულებული ბრეიკი. მომდევნო გეიმში ქართველმა ერთი ბრეიკ-პოინტი მოიგერია და ამის შემდეგ, მესამე მატჩბოლზე შეძლო გამარჯვება.

სხვათა შორის, ამ მოგებით ბასილაშვილმა კუევასს რევანში აუღო 2016 წელს, რიო-დე-ჟანეიროს ოლიმპიადაზე მარცხისთვის. ბასილაშვილის მეტოქე მეოთხედფინალში მესამე ნომრად განთესილი ესპანელი პაბლო კარენიო-ბუსტა იქნება.

ყოველდღიური სპორტული გაზეთი "ლელო"
1440
მკითხველის კომენტარები / 0 /
მსგავსი ამბები
რუბრიკის სხვა სიახლეები
;