ბასილაშვილმა ჰამბურგი მოგებით დაიწყო, მომდევნო მეტოქე არგენტინელი ლონდეროა...

სტარტი აიღო ჰამბურგის ATP-ის 500-იანი რეიტინგის ტურნირმა, რომელშიც ქართველი ნიკოლოზ ბასილაშვილი (ATP: 25) პირველ წრეში 26 წლის კოლუმბიელ ATP რეიტინგის 87-ე ნომერ უგო დელიენს დაუპირისპირდა.

აღსანიშნავია რომ, გასულ წელს ეს ტურნირი სწორედ ნიკოლოზ ბასილაშვილმა მოიგო და ამჯერად მას შარშანდელი სარეიტინგო ქულების დაცვა უწევს.

კოლუმბიელთან მატჩში თავიდან თანაბარი ორთაბრძოლა იყო, მეტოქეები საკუთარ მოწოდებებს იგერიებდნენ, თუმცა სეტის შუაწელში ქართველმა შეძლო ერთი ბრეიკ პოინტის აღება და შემდეგ უკვე სეტიც გამარჯვებით დაასრულა - 6:4.

მეორე სეტი ქართველის ბრეიკით დაიწყო, რასაც კოლუმბიელმა უკუბრეიკით უპასუხა, თუმცა ქართველმა მაინც იძალა, და საბოლოოდ 1 საათი და 8 წუთი დასჭირდა შეხვედრის მოსაგებად 6:4, 6:3.

მეორე წრეში ნიკოლოზის მეტოქეს 20 წლის ესპანელი ალეხანდრო დავიდოვიჩ-ფოკინასა (ATP რეიტინგი: 127) და 25 წლის არგენტინელი ხუან ლონდეროს (ATP: 56) მატჩი უნდა გაერკვია. როგორც მოსალოდნელი იყო, არგენტინელმა იოლად ორ სეტში 6:3, 6:2 აჯობა ახალგაზრდა ესპანელს და 24 ივლისს 1/8 ფინალში ბასილაშვილს შეხვდება.

აღსანიშნავია, რომ ლონდეროს ბასილაშვილი ცოტა ხნის წინ, საფრანგეთის ღია პირველობაზე შეხვდა და მაშინ არგენტინელმა იოლად 6:4, 6:1, 6:3 დაამარცხა ქართველი ჩორბურთელი. ასე რომ ხვალ ბასილაშვილს საფრანგეთში განცდილი მარცხისთვის რევანშის შანსი ექნება.

ყოველდღიური სპორტული გაზეთი "ლელო"
544
მკითხველის კომენტარები / 0 /
მსგავსი ამბები
რუბრიკის სხვა სიახლეები
;