ბატონო ვაის, სად არიან კვირკველია და ზარანდია?!

საქართველოს ნაკრების მთავარმა მწვრთნელმა ვლადიმირ ვაისმა შემადგენლობა დაასახელა. ჩვენი ქვეყნის უპირველესი გუნდი ევრო 2020-ის საკვალიფიკაციო ეტაპის ბოლო, მე-8 მატჩს შვეიცარიაში გამართავს - 15 ნოემბერს სენტ გალენში ადგილობრივ ნაკრებს შეხვდება, ხოლო 19 ნოემბერს, ხორვატიის ქალაქ პულაში, ამხანაგურად დაუპირისპირდება მსოფლიოს ვიცე-ჩემპიონს...

ფეხბურთის ფედერაციის ვებგვერდის ცნობით, საქართველოს ნაკრები მზადებას 11 ნოემბერს დაიწყებს და 13 ნოემბრის ჩათვლით სენტ გალენის სიახლოვეს, გერმანიის ქალაქ ბად ვიორისჰოფენში იქნება დაბანაკებული. საამისოდ, ვაისმა ნაკრებში 25 ფეხბურთელი გამოიძახა:

მეკარეები - გიორგი ლორია (ანორთოსისი, კვიპროსი), გიორგი მაკარიძე (სეტუბალი, პორტუგალია), ლაზარე კუპატაძე (საბურთალო);

მცველები - ოთარ კაკაბაძე (ლუცერნი, შვეიცარია), გურამ კაშია (სან ხოსე, აშშ), დავით ხოჭოლავა (შახტარი, უკრაინა), გია გრიგალავა (არსენალი, რუსეთი), ჯიმი ტაბიძე (უფა, რუსეთი), გიორგი ნავალოვსკი (დინამო ბთ);

ნახევარმცველები - ჯაბა კანკავა (ტობოლი, ყაზახეთი), ოთარ კიტეიშვილი (შტურმი, ავსტრია), ვაკო გვილია (ლეგია, პოლონეთი), გიორგი აბურჯანია (ტვენტე, ჰოლანდია), ჯანო ანანიძე (სპარტაკი, რუსეთი), მურთაზ დაუშვილი (ანორთოსისი, კვიპროსი), ლევან შენგელია (ქონიასფორი, თურქეთი), გიორგი ხარაიშვილი (გიოტებორგი, შვედეთი), ვაკო ყაზაიშვილი (სან ხოსე, აშშ), ნიკა კვეკვესკირი (ტობოლი, ყაზახეთი), ჯაბა ჯიღაური (დინამო ბთ), გიორგი პაპუნაშვილი (სარაგოსა, ესპანეთი), ზურიკო დავითაშვილი (რუბინი, რუსეთი);

თავდამსხმელები - გიორგი ქვილითაია (გენტი, ბელგია), ელგუჯა ლობჯანიძე (თარაზი, ყაზახეთი), ბაჩანა არაბული (პანიონისი, საბერძნეთი).

ამას გარდა, ცნობილია კიდევ 6 ფეხბურთელის ვინაობა, რომელთაც ვაისი გაფართოებულ შემადგენლობაში განიხილავს: საბა კვირკველია (ლოკომოტივი, რუსეთი), ლაშა პარუნაშვილი (ესბიერგი, დანია), ლუკა ზარანდია (ზულტე ვარეგემი, ბელგია), გიორგი მერებაშვილი (ვისლა პლოცკი, პოლონეთი), ბუდუ ზივზივაძე (მეზოკოვეშდი, უნგრეთი), ლევან კუტალია (დინამო თბ).

ფეხბურთის ფედერაციის ოფიციალური ვებგვერდი გვატყობინებს, რომ ტრავმების გამო ნაკრებს თორნიკე ოქრიაშვილი, საბა ლობჟანიძე და ლაშა დვალი დააკლდებიან.

* * *

გადახედავ სიას და არ შეიძლება, არ გაიფიქრო, რომ სლოვაკი მწვრთნელის განკარგულებაში ამ დროისთვის თითქმის ყველა უძლიერესი ქართველი ფეხბურთელი იქნება.

"თითქმის" - ტყუილად როდი დავწერეთ. არის რამდენიმე მომენტი, სადაც ვაისთან კამათი შეიძლება. იქამდე კი ეროვნული გუნდის დამრიგებელს მადლობა უნდა ვუთხრათ - ისე ჩანს, მის ყურამდე როგორღაც აღწევს ქართული სპორტული მედიის აზრი. რა თქმა უნდა, მწვრთნელი ჟურნალისტების გემოვნებით ვერ ააწყობს ნაკრებს, მაგრამ ისიც კარგია, რომ გრძნობ - იქ, სადაც საჭიროა, შენს აზრს ეცნობიან და, შესაძლოა, რაღაცას ითვალისწინებენ კიდეც...

ჩვენი გაზეთის მომდევნო ნომერში ერთ დიდ პრობლემაზე დავწერთ, ეს პატარა წერილი კი კონკრეტულად შემადგენლობას მიეძღვნება.

კიდევ ერთხელ გადავხედთ სიას და ვერაფრით გამიგია ორი რამ: 1) რატომ არ არის ძირითად სიაში ლუკა ზარანდია; 2) არ მესმის, რატომ ვერ მოხვდა ძირითად გუნდში საბა კვირკველია.

მოდი, ბოლოდან დავიწყებ. რა თქმა უნდა, ვაისს აქვს ძალიან წონადი არგუმენტი - ეს არის კვირკველიას უთამაშებლობაა მოსკოვის "ლოკომოტივში". ეს ყველაფერი გასაგებია, მაგრამ... განა ცოტა უთამაშებელი ფეხბურთელია საქართველოს ნაკრების შემადგენლობაში?!.

სათქმელია ისიც, რომ კვირკველიას მნიშვნელობა დიდია ჩვენი ეროვნული გუნდისთვის. ის დაცვაში ერთგვარ "კედლად" გვესახება. მხოლოდ ის რომ იყოს უთამაშებელი, ხმას არ ამოვიღებდით, მაგრამ...

რაც შეეხება ზარანდიას, ვერაფრით აგვიხსნია ასეთი დამოკიდებულება ამ ფეხბურთელის მიმართ. მას აქვს სათამაშო პრაქტიკა. რა თქმა უნდა, მომავლზეც უნდა ვიფიქროთ. ჩვენი აზრით, ბელარუსის ნაკრებთან შეხვედრაში ძალიან გამოგვადგება ინდივიდუალურად ძლიერი, ასე ვთქვათ, მომტყუებელი მოთამაშე.

ამ შემთხვევაში, შეგნებულად არაფერს დავწერ ხვიჩა კვარაცხელიასა და გიორგი არაბიძეზე. ახალგაზრდულ ნაკრებს ჯერაც აქვს ჯგუფური ეტაპის დაძლევის შანსი და, ალბათ, ეს ბიჭები კონკრეტულ მომენტში გია ცეცაძეს უფრო სჭირდება.

2812
მკითხველის კომენტარები / 0 /
მსგავსი ამბები
რუბრიკის სხვა სიახლეები
;