ბაშო ტოჩინოშინის გარეშე?

13 იანვარს 2019 წლის პირველი სუპერტურნირი, ჰაცუ ბაშო, შესაძლოა, ქართველი ოძეკი ტოჩინოშინის (ლევან გორგაძე) გარეშე გაიმართოს.

მან ვარჯიშისას მარჯვენა ბარძაყის კუნთი დაიზიანა. მართალია, ტესტმა აჩვენა, რომ კუნთი გაწყვეტილი არ არის, მაგრამ სუმოისტი ბაშოზე გამოსვლის გადაწყვეტილებას უახლოეს 2-3 დღეში კლუბის პრეზიდენტთან კონსულტაციის შემდეგ მიიღებს.

„თავიდან ძალიან შევწუხდი ამის გამო, თუმცა ახლა უკეთესობას ვგრძნობ და გამოსვლის სურვილიც მაქვს. სიტუაციას ჩემი კლუბის პრეზიდენტთან ერთად განვიხილავ და გადაწყვეტილებას ისე მივიღებ“, - განუცხადა ტოჩინოშინმა იაპონურ მედიას.

შეგახსენებთ, რომ წლის პირველი ბაშო ტოკიოში 13-27 იანვარს გაიმართება და თუ მასზე ტოჩინოშინი ვერ გამოვა, მარტის ბაშოზე მას ოძეკის ტიტულის დაცვა მოუწევს. 2018 წელს სწორედ იანვრის ბაშოს მოგებით შევიდა ლევან გორგაძე სუმოს ისტორიაში, როგორც მხოლოდ მესამე ევროპელი და პირველი ქართველი, ვინც იაპონიის იმპერატორის თასი მოიგო.

ყოველდღიური სპორტული გაზეთი "ლელო"
2035
მკითხველის კომენტარები / 0 /
მსგავსი ამბები
რუბრიკის სხვა სიახლეები
;