ხუთი ქართველი, რომლებმაც მსოფლიოზე სხვა ქვეყნის დროშით მედლები მოიპოვეს

1 ოქროს, 2 ვერცხლის და 2 ბრინჯაოს მედალი – ასეთია უცხოეთში გადახვეწილი ქართველების მონაპოვარი მსოფლიოს 2018 წლის ჩემპიონატზე ძიუდოში.
ასეთი დონის შეჯიბრებაზე ნებისმიერი სინჯის მედლის მოპოვება მნიშვნელოვანია, თანაც არაერთი ქვეყნის ძიუდოს გუნდს ხომ უბრალოდ ენატრება ერთი მედალიც კი მსოფლიოზე.

ქართული ძიუდოს სკოლა საყოველთაოდ აღიარებულია, შესაბამისად მისგან ყველა და პირველ ყოვლისა ჩვენ მუდამ მსუყე შედეგს ველით. ბაქოში ახლახანს დასრულებულ მსოფლიოს ჩემპიონატზე (ინდივიდუალურ შეჯიბრებაზე) ჩვენი ქვეყნის ნაკრებმა სამივე სინჯის თითო მედალი იკმარა.
"იკმარაო" იმიტომ ვამბობთ ამასთან შედარებით საქართველოდან სხვა ქვეყანაში გადასული და იქაური დროშიც ქვეშ მოასპარეზე ძიუდოისტთა მედლების კრებითი ოდენობა რომ აჭარბებს ხუთჯვრიანი დროშის ქვეშ მოასპარეზეთა შედეგს.

რატომ ან როგორ მოხდა ეს ვფიქრობთ სხვა წერილის თემაა. აქ კი გვინდა უბრალოდ იმ სპორტსმენების შესახებ მოგითხროთ, რომლებსაც ხშირად ჩვენი ძიუდოს "მამლუქების" თიკუნითაც ვახსენებთ.

ბაქოს არენაზე "მამლუქთა" შორის ყველა წარმატებული ნიკოლოზ შერაზადიშვილი აღმოჩნდა. ესპანეთის ნაკრების 22 წლის ქართველი ფალავანისთვის ეს კარიერაში ყველაზე დიდი ტიტულია. აქამდე ნიკას ევროპის ჩემპიონატის ბრინჯაოს მედალი ჰქონდა დაუფლებული. შერაზადიშვილი დამსახურებული ჩემპიონია, რადგან ბაქოში 90 კგ-ში მასზე უკეთ მართლაც არავინ გამოსულა – ჰოდა, ოქროც ალალი იყო ესპანელთა ქართველ ოქროს ბიჭზე!

აზერბაიჯანის დედაქალაქში უცხოეთის ნაკრების ორმა ქართველმა წევრმა შეძლო ვერცხლის მედლის მოპოვება და ნიშანდობლივია, რომ ორივე გორელია.

ამ ქალაქის მკვიდრი გახლავთ 29 წლის რობერტ მშვიდობაძე (60 კგ), რომელსაც უმაღლეს ტიტულამდე ერთი ნაბიჯი მსოფლიოს სამგზის ჩემპიონ ტაკატოსთან მარცხის გამო დააკლდა. აღსანიშნავია, რომ მშვიდობაძემ ნახევარფინალში ჩვენი ნაკრების წევრი ამირან პაპინაშვილი დაამარცხა. რობერტმა გორის ძიუდოს სკოლაში დაიწყო ძიუდოისტის კარიერა, თუმცა ადრეულ ეტაპზევე წავიდა რუსეთში. ამ ნაკრების რიგებში ასპარეზობისას მშვიდობაძემ შარშან ევროპის ჩემპიონის წოდებაც მიიღო.

კიდევ ერთი ვერცხლის პრიზიორი 26 წლის უტა კოკაური გორის რაიონის სოფელ ვარიანიდანაა. იქიდან, საიდანაც ჩვენი მსოფლიოს ჩემპიონი კრივში გიორგი კანდელაკი. ზემოთ მშვიდობაძის საქართველოდან კარიერის ადრეულ ეტაპზევე გადასვლა ვახსენეთ... იგივეს ვერ ვიტყვით უტაზე – კოკაურმა ვიდრე აზერბაიჯანში წავიდოდა საქართველოს ახალგაზრდულ ჩემპიონატებზე ძიუდოში ზედიზედ სამჯერ შეძლო კვარცხლბეკის უმაღლეს საფეხურზე ასვლა. მას წარმატებები ჰქონდა სამბოშიც.

აზერბაიჯანში გადასული რომ იყო უტა და ზაფხულში შინ ჩამოვიდოდა მაშინაც ასპარეზობდა ნახერხმოყრილ არენაზე ქართული საფალავნო ჩოხით. გაზეთ "ლელოში" ქართული ჭიდაობის ტურნირებზე სოფლებში მისი გამოსვლა არაერთხელ გაგვიშუქებია.

ახალგაზრდებიდან დიდებში ტრიუმფით გადასული კოკაური სამწუხაროდ ჩვენი ქვეყნის მთავარ ნაკრებში ვეღარ ხვდებოდა. ახალგაზრდა ფალავანს გაუჭირდა გამოცდილ და ტიტულოვან ადამ ოქრუაშვილთან კონკურენცია და მერე აზერბაიჯანელთა მიპატიჟებასაც დათანხმდა.

ბრინჯაოს ორი მედლიდან ერთი მსოფლიოს ჩემპიონის, უკრაინის ნაკრების წევრის გიორგი ზანთარაიას (66 კგ) ანგარიშზეა. 30 წლის ზანთარაიამ ჯერ კიდევ 2009 წელს შეძლო მსოფლიოს უმნიშვნელოვანეს შეჯიბრებაზე ოქროს მედლის დასაკუთრება. გიორგი ამ წონაში გამორჩეულ ფავორიტთან იაპონელ ჰიუფმი აბესთან დამარცხდა, რომელიც ზედიზედ მეორედ შეწვდა ყველასათვის სანუკვარ ოქროს მედალს პლანეტის ჩემპიონატზე.

ზანთარაიას თუ მთელი კარიერა უკრაინაში აქვს გატარებული, 25 წლის ვანო რევაზიშვილი, ვინც ამჟამად თურქეთის ნაკრების წევრია და ვედათ ალბაირაქის სახელით გამოდის, ადრე საბერძნეთის ნაკრების წევრი იყო და რომან მასტოპულოსი გახლდათ. ალბაირაქი ბაქოში 81 კგ-ში გამოდიოდა. ის შეჯიბრების ბრინჯაოს მედლის მფლობელი გახდა. მნიშვნელოვანი ისიცაა, რომ მან ეს მედალი ქართველი მწვრთნელის ხელმძღვანელობით მოიპოვა, თურქეთის ნაკრებს ხომ ქართველი მწვრთნელი ირაკლი უზნაძე თავკაცობს...

4474
მკითხველის კომენტარები / 5 /
სიო
0
ფრანიო–ს ნეტა რატომ წაიყვანეს საქართველოდან მშობლებმა მოზარდობის ასაკში? ... მათში ნიჭი დაინახეს და უფრო მეტი განვითარება ჭირდებოდათ რასაც საქართველო ვერ მიცემდა.... სხვაც ბევრი იყო მათთსავით ნიჭიერი მაგრამ დაიკარგნენ ვერ განვითარდნენ გულდასაწყვეტია.....
მიმი
0
(ფრანიო) ვისა აქვს უფლება აზრის გამოხატვა ამიკრძალოს ... კორექტულაც ცოტა......
მსგავსი ამბები
რუბრიკის სხვა სიახლეები
;