ბედი ფეხბურთელისა... ხომ იცით, ჩვენთან როგორც ხდება

დღეს იმ ორ ახალგაზრდაზე მოგითხრობთ, სულ რაღაც 4-5 წლის წინ საქართველოს ასაკობრივ ნაკრებებში რომ თამაშობდა და საკმაოდ დიდ იმედებსაც იძლეოდა, მაგრამ ტრავმებმა ორივე ელიტის მიღმა დატოვა. იმედია, ჩრდილში მხოლოდ დროებით არიან, რადგან საქართველოს დასაკარგი ფეხბურთელები არ ჰყავს...

ქართველი საფრანგეთში

პირველი ბუბა რუხაძე გახლავთ, რომელიც თბილისის "ოლიმპიკის" აღზრდილია. 25 წლის თავდამსხმელმა კარიერა "დინამოს" აკადემიაში გააგრძელა, შემდეგ კი "ცხინვალში" მოხვდა, საიდანაც "დინამო 2-ში" მიიწვიეს. 2015 წელს ბუბა ისევ "ცხინვალში" დაბრუნდა და მას შემდეგ საქართველოს უმაღლეს ლიგაში აღარ გამოჩენილა.

როგორც გავარკვიეთ, ეს ბიჭი საფრანგეთის ნასიონალ 2-ში (რანგით მე-4 ლიგა) B ჯგუფის "ანსიში" თამაშობს. სწრაფი თავდამსხმელი გიორგი დევდარიანისა და ოთარ კორღალიძის 19-წლამდელთა ნაკრების წევრი და ერთ-ერთი საკვანძო მოთამაშე გახლდათ.

მასზე დიდ იმედებს ამყარებდნენ. მაგრამ ტრავმის გამო ფორმიდან ამოვარდა და სამწუხაროდ, მერე როგორც ხდება, ის მიიღო - ობოლი ბიჭი დაივიწყეს და მისთვის ერთადერთი გამოსავალი საფრანგეთის დაბალი ლიგის გუნდში თამაში გახდა. თუმცა, ამჟამად "ანსი" ნასიონალ 2-ის ლიდერებშია, რანგით მე-3 ლიგაში გადასვლის რეალური კანდიდატია.

ბუბა რუხაძე უდავოდ საინტერესო ფეხბურთელია. ის იყო საქართველოს 19-წლამდელთა ნაკრების ერთ-ერთი საკვანძო ფიგურა მაშინ, როცა გუნდში თამაშობდნენ გიორგი პაპავა, ლაშა პარუნაშვილი, ნიკა სანდოხაძე, ბუდუ ზივზივაძე, ნიკა კაჭარავა, გიორგი ჭანტურია, ვაკო ყაზაიშვილი, მერაბ გიგაური და დავით სხირტლაძე.

ის უკვე ორი წელია საფრანგეთში თამაშობს და ეროვნული ლიგის მოღონიერებაზე თუ ვფიქრობთ, ეს, უპირველეს ყოვლისა, ასეთი ფეხბურთელების დაბრუნებით უნდა დავიწყოთ. წესით, რუხაძე ჩვენი გუნდებისთვის საინტერესო მოთამაშე უნდა იყოს...

ასაკობრივიდან მესამე ლიგაში

მეორე მოთამაშეც ასაკობრივი ნაკრების წევრი იყო - 19-წლამდელთა და ახალგაზრდული ნაკრების მარჯვენა მცველი ზურაბ გელაშვილი. ეს ბიჭი გიორგი დევდარიანის იმ ნაკრების ძირითადი შემადგენლობის წევრი იყო, რომელიც თბილისში გამართული შესარჩევი ეტაპიდან ელიტრაუნდში მოხვდა.

მაშინ ამ გუნდის წევრები იყვნენ ოთარ გოშაძე, გიორგი თევზაძე, ჯიმი ტაბიძე, ოთარ კიტეიშვილი, ლუკა ზარანდია, გიორგი არაბიძე, გიორგი ხარაიშვილი, გიორგი ბერიძე, რომან ჭანტურია... მაგრამ ტრავმის გამო ვერ ითამაშა და სწორედ მაშინ გადაწყვიტა დევდარიანმა შემტევი ნახევარმცველის, აკაკი შულაიას მარჯვენა მცველად დაყენება.

გელაშვილი ჯერ ქუთაისის "ტორპედოს" მოთამაშე იყო, საიდანაც რუსთავის "მეტალურგში" გადავიდა, ამის შემდეგ კი ჯერ ლანჩხუთის "გურიაში" აღმოჩნდა, მერე ორი წელი "ზუგდიდში" გაატარა და წელს ისევ "გურიას" დაუბრუნდა.

"2016 წელს ლანჩხუთის "გურიაში" ვიყავი, უმაღლეს ლიგაში ვითამაშე და გავვარდით. მაშინ დიდი შეცდომა დავუშვი. 2017 წლის იანვარში სერიოზული არაფერი გამოჩნდა და მესამე ლიგაში, კერძოდ, თერჯოლის "საპოვნელაში" გადავედი, რომელიც შარშან დაიშალა - ანუ უმაღლესიდან ეგრევე მესამე ლიგაში.

იქედან კი მთავარ ლიგაში დაბრუნება გამიჭირდა, რადგან სამი თამაშის შემდეგ კუნთი გამიწყდა და ზაფხულამდე დავისვენე. სანამ ვარჯიში დავიწყე, ფორმაში შევედი და ავთამაშდი, დროც გავიდა... სხვას ვერაფერს დავაბრალებ, თავად გავაკეთე არასწორი არჩევანი", - ამბობს გელაშვილი.

22 წლის მცველი იმედოვნებს, რომ ჩავარდნას წარსულს ჩააბარებს: "ლანჩხუთის "გურიაში" წელს დავბრუნდი. შარშან ცოტა ხნით "ზუგდიდში" გადავედი და ისიც მესამე ლიგაში გავარდა. ამ ლიგაში თამაში არ მინდოდა, იმედი მქონდა, რომ რამე გამოჩნდებოდა. მაგრამ არავინ დამიკავშირდა და "გურიაში" ჩავირიცხე.

ისე გაჩერებას, თამაში და ვარჯიში მირჩევნია. მოკლედ, კარიერა ტრავმის გამო ამერია, მერე ამ მდგომარეობიდან დროულად ვერ გამოვედი და ხომ იცით, საქართველოში როგორც ხდება.

ერთი რომ აგერევა საქმე და ფეხი გადაგიბრუნდება, მერე აქედან გამოსვლა რთულია. მეც მინდოდა, რომ უკეთეს ლიგაში ვყოფილიყავი, მაგრამ ყველას ავიწყდები და ეგრევე ჩამოგწერენ ხოლმე. ეროვნული ლიგა 2-ის ერთ-ერთ გუნდში გვიან გაიგეს, უგუნდოდ რომ ვიყავი.

დაინტერესდნენ, მაგრამ ჩემამდე გამოცდილ მცველთან დაილაპარაკეს და მე ვეღარ წავედი. ახლა გუნდში დავით ყენია მოვიდა და "გურია" დალაგდა.

ზაფხულამდე აქ ვითამაშებ, ფორმაში შევალ და იმედია, მერე ეროვნულ ლიგაში დაბრუნებას მოვახერხებ. რა დროს უიმედობაა, ჯერ 22 წლის ვარ და ჩავარდნის მიუხედავად, მჯერა, მინიმუმ, საქართველოს ეროვნულ ლიგაში თამაშს მაინც შევძლებ".

1620
მკითხველის კომენტარები / 0 /
მსგავსი ამბები
რუბრიკის სხვა სიახლეები
;