ბელარუსების მწვრთნელი მიხაილ მარხელი: რა სხვაობაა ძველ "დინამოსა" და დღევანდელ საქართველოს ნაკრებს შორის?


საქართველოს კალათბურთელთა ნაკრებმა თავის ისტორიაში ყველაზე მნიშვნელოვანი საპლეიოფო მატჩები 2009 წელს გამართა. ჯგუფური ეტაპის გადალახვის შემდეგ ორმატჩიან დუელში ბელარუსს დაუპირისპირდა. ეს ბარიერიც დაძლია, ელიტაში მოხვდა და 2011 წელს პირველად ითამაშა ევროპის ჩემპიონატზე...

11 წლის შემდეგ იმავე გზას ადგას საფეხბურთო ნაკრები: ერთა ლიგის ჯგუფში პირველი ადგილი დაიკავა და პლეი ოფში ისიც ბელარუსს ხვდება. 26 მარტს "დინამო არენაზე" როგორც ქართველებისთვის, ასევე ბელარუსებისთვის ისტორიული მატჩი გაიმართება. ჩვენც და ისინიც ევროპის ჩემპიონატთან ასე ახლოს არასდროს ვყოფილვართ...

...ჯერ კიდევ საბჭოთა დროიდან ბელარუსები ქართველებს დიდ პატივს გვცემენ, ისევე, როგორც ქართველები - ბელარუსებს. ბედის ირონიაა, რომ სწორედ ურთიერშეხვედრებში ვარკვევდით 2009 წელს საკალათბურთო ელიტაში გამსვლელის და ახლა - საფეხბურთო ევრო 2021-ის ფინალური ეტაპის საგზურის მფლობელს.

2011 წელს ლიეტუვაში გამართულ ევრობასკეტზე შევხვდი ჟურნალისტ დმიტრი გერჩიკოვს, რომელიც ამჟამად ბელარუსის ფეხბურთის ფედერაციაში მუშაობს და სწორედ მისი დახმარებით ჩავწერეთ ჩვენი მეტოქის მთავარი მწვრთნელის, მიხაილ მარხელის ინტერვიუ.

საუბარი ისტორიით დავიწყეთ. მოგეხსენებათ, ბატონი მარხელი 80-იან წლებში მინსკის "დინამოს" ღირსებას იცავდა და საბჭოთა კავშირის ჩემპიონატის დროს თბილისს ყოველ წელს სტუმრობდა...

"საქართველოში ყოველთვის განსაკუთრებული ატმოსფერო გვხვდებოდა. კალენდარი ისე იყო შედგენილი, რომ თბილისში სეზონის დასაწყისში ჩავდიოდით. ჩვენთვის ეს სასიამოვნო მომენტი და სეზონის პოზიტიური დასაწყისი იყო. საქართველოში რამდენჯერაც უნდა ჩავსულიყავით, ყოველთვის თბილად გვხვდებოდნენ".

საბჭოთა პერიოდში ფეხბურთელები ერთმანეთში ხშირად პოულობდნენ საერთო ენას და ურთიერთობა მეგობრობაშიც გადაიზრდებოდა ხოლმე...

"თბილისის "დინამოსთან" თამაში საბჭოთა კავშირის არსებობის ბოლო წლებში მიწევდა და ქართველებთან დამეგობრება ამიტომაც ვერ მოვახერხე. ფეხბურთელებთან თბილი ურთიერთობა მქონდა, თუმცა ისე არავისთან დავახლოვებულვარ, რომ ხშირად დავურეკო და მოვიკითხო".

ხშირად დასმულა კითხვა - რა საერთოა მაშინდელ თბილისის "დინამოსა" და დღევანდელ საქართველოს ნაკრებს შორის. რა თქმა უნდა, მარხელს ძველი "დინამოს" მატჩებიც ახსოვს, თანამედროვე ნაკრებიც ჰყავს შესწავლილი და საკუთარი მოსაზრებაც აქვს:

"სიმართლე ითქვას, ძველ "დინამოსა" და საქართველოს დღევანდელ ნაკრებს შორის მსგავსება არის. თუმცა ისიც უნდა აღინიშნოს, რომ "დინამოს" აღმავლობის პერიოდში გაცილებით მეტი გამორჩეული ფიგურა ჰყავდა. ბრწყინავდნენ ყიფიანი, დარასელია... ქართველთა დღევანდელი ნაკრები კი უფრო გუნდურად მოქმედებს, არიან მაღალი ინდივიდუალური კლასის შემსრულებლები. მათ დისციპლინაც გამოარჩევთ. ასე რომ, მეტად სერიოზულ მეტოქეს ვეთამაშებით".

[VIDEO] სასიამოვნო ამბავი: საქართველო-ბელარუსის მატჩზე ყველა ბილეთი უკვე გაიყიდა!

საინტერესოა, ბელარუსის ნაკრების მწვრთნელი საქართველოში თუ ხედავს ფეხბურთელს, რომელსაც სხვებისგან განსხვავებით დიდ ყურადღებას დაუთმობს.

"საქართველოს ნაკრებში ყველა მოთამაშეს განსაკუთრებულ ყურადღებას დავუთმობთ. თითოეულ ფეხბურთელს სათანადოდ შევისწავლით. ეს ჩვეულებრივი ამბავია. თუმცა, ჯერჯერობით, საქართველოს ნაკრების შემადგენლობა არ გამოცხადებულა. ჩვენც ველით და ვემზადებით მოვლენების ნებისმიერი კუთხით განვითარებისთვის".

ახლა ბელარუსის ნაკრებზე. ჩვენმა მეტოქემ ორი საწვრთნელი მატჩი გამართა - უზბეკეთსა და ბულგარეთს ერთნაირი ანგარიშით, 1:0 სძლია. მარხელი თამაშებით კმაყოფილია:

"ჩვენი ნაკრებისთვის ეს ორი მატჩი ძალიან საჭირო იყო. მოხარული ვარ, რომ თამაშები შედგა. ვთვლი, რომ ის ამოცანები, რომლებიც შეკრების წინ დავისახეთ, სრულფასოვნად შევასრულეთ. ჩვენთვის მნიშვნელოვანი იყო, ნაკრების ფეხბურთელებს ერთად ევარჯიშათ. შეკრების მსვლელობისას გამართული საკონტროლო შეხვედრები ძალიან სასარგებლო იყო. დავინახეთ ბევრი უარყოფითი და დადებითი ნიუანსი. მეორე მატჩი ბულგარეთთან გავმართეთ. ამ შეხვედრაში გამოვცადეთ ბელარუსის ნაკრების უახლოესი რეზერვი. შეიძლება ზოგიერთ კომპონეტში მეტოქეს ჩამოვრჩებოდით, მაგრამ სათამაშო მომენტებში, მონდომებაში ნამდვილად არ ვიყავით უკან."

ქართველთა დღევანდელი ნაკრები კი უფრო გუნდურად მოქმედებს, არიან მაღალი ინდივიდუალური კლასის შემსრულებლები. მათ დისციპლინაც გამოარჩევთ 

ბელარუსის ნაკრებმა ამ ამხანაგურ მატჩებშიც თითო გოლი გაიტანა, ერთა ლიგის ჯგუფშიც არ ჰქონდა მაღალშედეგიანი შეხვედრები. მეტოქე გუნდის მწვრთნელს ვკითხეთ, მიიჩნევს თუ არა დაბალშედეგიანობას გუნდის ერთ-ერთ მთავარ პრობლემად.

"რა თქმა უნდა, ყველას უნდა მეტის გატანა, თუმცა უნდა გავითვალისწინოთ, ვის წინააღმდეგ გვიწევდა თამაში. ვფიქრობ, საგოლე მომენტების რეალიზაცია გამოსწორებადი საქმეა და ვიმედოვნებთ, ეს კომპონენტი ჩვენს თამაშში გაუმჯობესდება".

ბოლოს მთავრობისა და ფეხბურთის ფედერაციის მიდგომაზე. საინტერესოა, ბელარუსის ფეხბურთის ფედერაცია საქართველოსთან მოგების შემთხვევაში პრემიას გამოუწერს გუნდს თუ საბოლოოდ, პლეი ოფის მოგებაზეა გათვალისწინებული ფეხბურთელების წახალისება?

"ამ თემაზე ბევრ ლაპარაკს მოვერიდები. შიდა საქმეა და ჯერ არაფერია კონკრეტულად ნათქვამი. ალბათ, გამოაცხადებენ, თუმცა წინასწარ ვერაფერს ვიტყვი".

ჩვენ კი ისღა დაგვრჩენია, ბელარუსისა და საქართველოს ნაკრებთა მწვრთნელებს ვუსურვოთ, 26 მარტს დაგეგმილი მატჩი შედგეს. ბოლო დროს ისეთი პანიკაა, არ არის გამორიცხული, 55 ათასამდე გულშემატკივარს, რომლებმაც თამაშის ბილეთები იყიდეს, გამოუცხადონ - კორონავირუსის გამო თამაში ცარიელი ტრიბუნების წინ გაიმართებაო. სპორტი ხომ გულშემატკივრის გარეშე წარმოუდგენელია!..

4049
მკითხველის კომენტარები / 2 /
ბიჯოს
2
ყველა ბილეთი რომ გაყიდულია ეგ იმას არ ნიშნავს რომ სტადონი გაივსება!ე.ი. გადამყიდველებმა მაგრად იმუშავეს!
ზურა333
12
მე მგონია რომ ბელორუსთან თამაშიც და ფინალიც უნდა გადადონ 1 თვით და მანამდე კორონაც გაქრება !
მსგავსი ამბები
რუბრიკის სხვა სიახლეები
;