ბელგია მესამეა - აზარმა დახურა!

ბელგია - ინგლისი 2:0
1:0 მუნიე (4), 2:0 აზარი (82)
14.07. სანკტ პეტერბურგი. სანკტ პეტერბურგ სტედიუმი.
ბელგია (3-4-3): კურტუა - ალდერვეირელდი, კომპანი, ვერტონგენი - მუნიე, ტილემანსი (78. დემბელე), ვიტსელი, ჩადლი (32. ვერმაელენი) - დე ბრუინი, ლუკაკუ (60. მერტენსი), ე. აზარი
მთავარი მწვრთნელი: რობერტო მარტინესი
ინგლისი (3-5-2): პიკფორდი - ჯონსი, სტოუნსი, მაგუაირი -ბ ტრიპიერი, ლოფტუს-ჩიკი (84.ალი), დაიერი, დელფი, როუზი (46. ლინგარდი) - სტერლინგი (46. რაშფორდი), კეინი
მთავარი მწვრთნელი: გარეთ საუთგეიტი
გაფრთხილება: სტოუნზი (52), მაგუაირი (62), ვიტსელი (90)
არბიტრი: ალირეზა ფაგანი (ირანი)

ბელგიის ნაკრები მსოფლიოს ჩემპიონატის ბრინჯაოს მედლების მფლობელია. რობერტო მარტინესის გაწვრთნილმა გუნდმა მეორედაც მოუგოინგლისს. გარეთ საუთგეიტის ბიჭები კი მუნდიალს თავაწეულები ტოვებენ, რაკი ინგლისისათვის მეოთხე ადგილიც კი წარმატებაა.

თამაში ცალი ფეხით
ბელგიამ აშკარად აჯობა ინგლისს. ამ დროისათვის ბენულუქსელებს უკეთესი გუნდი ჰყავთ. ეს დამტკიცბდა ჯგუფური ეტაპის შეხვედრაში და ახლაც. მწვრთნელებმა მიმართეს ექსპერიმენტებს. თავი კი არცერთ ნაკრებს მოუკლავს. თამამად შეგვიძლია ვთქვათ, რომ ეს იყო თამაში "ცალი ფეხით".
მარტინესის გუნდმა ორი მშვენიერი გოლი შეაგდო. ჯერ იყო და ნასერ ჩადლის გადაცემას ცენტრალური თავდამსხმელივით ჩაუწვა მეტოქის კარის წინ მარტო მყოფი ტომას მუნიე და ისე შეაგდო. მერე კი ედენ აზარი გაიყვანა მეკარესთან პირისპირ კევინ დე ბრუინმა და "ჩელსის" ვარსკვლავმაც წერილი დასვა.

გამარჯვება კლასის ხარჯზე
ბურთი უფრო ინგლისს ეჭირა, მაგრამ ბელგიელებმა სწრაფი კონტრშეტევებიტა და უკეთესი ტექნიკით იმარჯვეს. ინგლისელებისათვის თითქოს სულერთი იყო ამ შეხვედრის შედეგი. მათ თამაშში არ იგრძნობოდა ძველი ნაპერწკალი და ჟინი.

ინგლისი არც წინა შეხვედრებში ჰქონდა უმაღლესი კლასი, მაგრამ ფონს დიდი მომდომებით გადიოდა. გარდა ამისა, ბელგიელებმა თითქმის მთლიანად გამორთეს თამაშიდან მოწინააღმდეგის ყველაზე სახიფათო იარაღი ჰარი კეინი.

ყველა მოქმედებაში იგრძნობოდა, რომ ბელგიელ ვარსკვლავებს გაცილებით მეტი სათამაშო კლასი ჰქონდათ, ვიდრე მათ მეტოქეებს. გარდა ამისა, იყო ერთი მეტად მნიშვნელოვანი ფაქტორიც.

რატომ მოიქცა ასე გარეთ საუთგეიტი?
საჭიროა თუ არა მსოფლიოს ჩემპიონატზე მატჩი მესამე ადგილისათვის? ამ კითხვას ძალიან ბევრი სვამდა ადრეც და სვამს ახლაც. ყოველ შემთხვევაში ის იმართება და ალბათ, სასურველია, რომ გუნდები მას მეტი სერიოზულობით მიუდგნენ.

მაგალითად, ძალიან გასაკვირია, რატომ მოიქცა ასე გარეთ საუთგეიტი და რატომ გადაახალისა შემადგენლობა. არ გვგონია, მსოფლიო ფეხბურთის ისტორიიდან რამე გამოგვპარვოდა და ინგლისის ნაკრები განებივრებული იყოს მსოფლიოს ჩემპიონატზე თუნდაც მესამე ადგილებითა და ბრინჯაოს მედლებით.

ფაქტია, ინგლისელმა სამარქაფოებმა ბევრი ვერაფერი გააკეთეს, განსხვავებით ბელგიელი იური ტილემანსისაგან, ვინც სავსებით სამართლიანადაა მიჩნეული ევროპული ფეხბურთის ამომავალ ვარსკვლავად.

ვერავინ იტყვის, ინგლისს ძირითადი შემადგენლობით რომ ეთამაშა, ის ამ შეხვედრაში აუცილებლად მოიგებდაო, მაგრამ უფრო მეტ წინააღმდეგობას რომ გაუწევდა ბელგიას, ეს ფაქტია. ამასთან ერთად, ნებისმიერი ნაკრებისათვის ღირსების საქმე უნდა იყოს მუნდიალზე ბოლო მატჩის წარმატებით ჩატარება.
ყატარში გასამართ მსოფლიოს ჩემპიონატამდე მთელი ოთხი წელია, მაგრამ აქედანვე შეიძლება იმის თქმა, რომ ბელგიაცა და ინგლისიც მომავალ მუნდიალზე ძალიან ანგარიშგასაწევ გუნდებს ჩაიყვანენ და ისინი იქაც ფავორიტებად უნდა მოვიაზროთ.

ყოველდღიური სპორტული გაზეთი "ლელო"
1143
მკითხველის კომენტარები / 0 /
;