ბერძენ-რომაელებიც უჩემპიონოდ - მხოლოდ 3 მედლით

საქართველოს ბერძნულ-რომაული სტილით მოჭიდავეთა ნაკრებმა 3 მედლით დაამთავრა გამოსვლა ბუქარესტში, ევროპის ჩემპიონატზე.

სამწუხაროდ, თავისუფალი სტილით მოჭიდავეთა გუნდის მსგავსად, გამოსვლა ამათაც ოქროს მედლის გარეშე დაამთავრეს. არადა, ბექა როყვას შეგირდებმა ორი ფინალი იჭიდავეს, თუმცა ორივე წააგეს.

საბოლოოდ ბერძენ-რომაელთა რუმინული მონაგარი 2 ვერცხლი და 1 ბრინჯაოა. ევროპის ვიცე-ჩემპიონები ხულოელი ლაშა გობაძე (82) და წყალტუბოელი მძიმეწონოსანი იაკობ ქაჯაია გახდნენ, ბრინჯაო კი ოზურგეთელმა ლევან ქავჟარაძემ (63) მოიპოვა. დამამშვიდებლის ფინალში იჭიდავა სენაკელმა საჩინო დავითაიამაც (67), თუმცა დამარცხდა და მეხუთე ადგილზე დარჩა. გუნდურ ჩათვლაში ჩვენი ნაკრები მეხუთე ადგილზე გავიდა 71 ქულით.

მსოფლიოს მესამე პრიზიორმა გობაძემ ჩემპიონატი მისთვის ჩვეულ შემტევ სტილში ჩაატარა და ნახევარფინალში ულამაზესი შეხვედრაც აჩუქა ჭიდაობის ქომაგთ, თუმცა პირველ პაექრობაში შედარებით გაუჭირდა მოგება მოლდოველ მიჰაილ ბრადუსთან - 5:4 სძლია. მისი შეხვედრები ერთნაირი სცენარით წარიმართა - თავიდანვე აქტიურად უტევდა და პირველ ქულას მათი პასიურობის ხარჯზე იღებდა, მერე კი ჩოქბჯენიდან გამოუყვანდა ხოლმე წირვას, რაც მისი სტიქიაა. ყოველ შემთხვევაში, ასეთი სცენარით მოუგო რუს ალექსანდრ კომაროვსაც და ფინელ ვილი ტაპიო როპონენს.

გობაძემ კომაროვს აქტიურად შეუტია და მეტოქე გააფრთხილებინა, მერე ჩოქბჯენიდანაც აიტაცა, თუმცა გდებამდე რუსი ფეხის გამოყენებისთვის ორი ქულით დასაჯეს, პირველი პერიოდის დასრულებამდე კი კისრულზე წამოიღო: 5:0 ასე მოიგო ჩვენებურმა პირველი პერიოდი. მეორეში ანგარიში აღარ შეცვლილა, რადგან გობაძეს არა მარტო ილეთები, თავდაცვაც კარგად ეხერხება და საქმე ისე მიიყვანა ბოლომდე, მსაჯები პასიურობაზეც ვერ მიედავნენ, კომაროვს კი ქართველი მწვრთნელების - გოგი კოღუაშვილისა და ლევან კეზევაძის თავგამოდებულმა ქომაგობამაც ვერ უშველა.

ამას მოჰყვა გამარჯვება ნახევარფინალში ფინელ როპონენთან - ვეჭვობთ, ეს შეხვედრა კონტინენტის პირველობის საუკეთესო ნომინაციაზე იქნება წარდგენილი. ყოველ შემთხვევაში, იქ ჩვენებურის მიერ შესრულებული გდებები ჭიდაობის მსოფლიოს გაერთიანებულმა ფედერაციამ დღის საუკეთესო ეპიზოდად უკვე მიიჩნია.

დიდი იყო იმედი, რომ ის ფინალურ პაექრობასაც ასეთივე აღმავლობით ჩაატარებდა. მით უფრო, იქ არც ისე ძლიერი კონკურენტი ჰყავდა - დანიელთა დაღესტნელი რაიბეკ ბისულთანოვი. 23 წლის დანიელი 23-წლიანებში ევროპის შარშანდელი ჩემპიონი და მსოფლიოს ფინალისტია. სამწუხაროდ, არ გამართლდა ჩვენი მოლოდინი, რომ უფრო გამოცდილი გობაძე მასთან შეხვედრასაც აღმავლობით ჩაატარებდა - ბისულთანოვმა, ცოტა არ იყოს, ძალითაც დაჯაბნა ჩვენებური და ორჯერ გდებაც გაუკეთა მას. გობაძეს მოგვიანებით ორი ქულა კი მისცეს, ხოლო დასაწყისში ქულაც აიღო, მაგრამ საბოლოოდ მაინც ბისულთანოვმა 4:3 იმარჯვა და ევროპის ჩემპიონიც გახდა, გობაძემ კი კარიერაში პირველი ტიტულის მოპოვების შანსი დაკარგა.

ქაჯაია საკვალიფიკაციო ეტაპზე ისვენებდა, მერე კი ორი შეხვედრა მოიგო წმინდად - ფინელ ტუომას ჰაიკი იუჰანი ლაჰტისაც და პოლონელ რაფალ კრაიევსკისაც ერთნაირი ანგარიშით, 9:0 სძლია. ორივე შეხვედრა ერთნაირად წარიმართა - ქაჯაიას მეტოქეები პასიურობისთვის გაუფრთხილეს და ჩოქბჯენშიც ჩაუყენეს, იქიდან კი მანამ ატრიალა ორივე მხარეს, ვიდრე საქმე წმინდა მოგებამდე არ მიიყვანა. პირველი შეხვედრის მოგებას მან 1.04, მეორისას კი 1.06 წუთი მოანდომა.
თუმცა ქაჯაიამ ყველაზე ხმაურიანი გამარჯვება რუსთა მსოფლიოს ჩემპიონსა და ოლიმპიურ პრიზიორ სერგეი სემენოვთან მოიპოვა ნახევარფინალში - 3:2, ვისთანაც პირველი სერიოზული წინააღმდეგობა შეხვდა.

ფინალში გადამწყვეტი ბოლო წუთი აღმოჩნდა, როცა ქაჯაიამ ჯერ დგომში შეკვრიდან გადააგდო ქულაზე და ანგარიში 2:2 გახადა, ეს კი მას აძლევდა ხელს, როგორც ბოლო ქულის მომპოვებელს. თუმცა შეტევა მაინც გააგრძელა და ბოლოს წრიდანაც გაიყვანა მეტოქე: 3:2.
ფინალში ქაჯაიას მეტოქე თურქთა უძლეველი ათლეტი, ოლიმპიური ვერცხლ-ბრინჯაოს მფლობელი და მსოფლიოს სამგზის ჩემპიონი რიზა კაიაალპი იყო, ვინც მეცხრედ გახდა ევროპის ჩემპიონი. ქაჯაია მასთან 0:3 დამარცხდა. ქართველისთვის ეს ზედიზედ მეორე ევროპული მედალია - შარშან მესამეზე გავიდა, ახლა კი ერთი ნაბიჯი გადადგა წინ.

ქავჟარაძე ერთი თვის წინ 23-წლიანებში გახდა ევროპის ჩემპიონი, ახლა კი ეროვნულ ნაკრებში მოიპოვა პირველი მედალი. საკვალიფიკაციოში ისიც ისვენებდა, მეოთხედფინალში კი ძალზე იოლად, 10:0 მოუგო უნგრელ ბენცე კოვაჩს. ნახევარფინალში ის რუსთა მომავალ გამარჯვებულთან, მსოფლიოს მოქმედ ჩემპიონსა და ევროპული თამაშების გამარჯვებულ სტეფან მარანიანთან დამარცხდა - 3:11, ბრინჯაოსთვის პაექრობაში 5:2 აჯობა პოლონელ მიხალ იაცეკ ტრაჟს.
ქავჟარაძემ თავიდანვე აქტიურად, მისთვის დამახასიათებელ შემტევ სტილში შეუტია პოლონელს და შეხვედრა გამარჯვებამდე მიიყვანა - 5:2.

ნახევარფინალში საჩინო დავითაიაც გავიდა, რომელმაც თავდაპირველად ფრანგ იასინ ოზაის 6:4 მოუგო, გერმანელ ერიკ ვაისს კი წმინდად, 9:0 აჯობა. უკრაინელ ფარვიზ ნასიბოვს დაძაბულ ბრძოლაში 2:1 მოუგო, მაგრამ ნახევარფინალში დამარცხდა თურქთა მომავალ ჩემპიონ ატაკან იუკსელთან. სამწუხაროდ, ჩვენებური დამამშვიდებლის ფინალშიც დამარცხდა რუსთა ევროპისა და მსოფლიოს შარშანდელ ჩემპიონ არტემ სურკოვთან: 1:2.

სამწუხაროდ, ამჯერად უმედლოდ დარჩა ევროპისა და მსოფლიოს შარშანდელი მესამე პრიზიორი ნუგზარ წურწუმია (55). მან სომეხ რუდიკ მკრტიჩიანთან 5:2 მოგების შემდეგ ისევ აზერბაიჯანელ ელდანიზ აზიზლისთან წააგო, ვისთანაც შარშან მსოფლიოზეც დამარცხდა და ევროპაზეც. ამჯერად ჩვენებურმა 0:9 წააგო, შემდეგ კი აზიზლიც დამარცხდა რუსთა მომავალ ჩემპიონ ვიტალი კაბალოევთან და წურწუმიაც გავარდა. არადა, მან შარშან კაბალოევს მოუგო.

უფრო მოულოდნელი იყო ევროპის მოქმედი ჩემპიონისა და მსოფლიოს ორგზის პრიზიორ რობერტ კობლიაშვილის (87) გამოსვლა - საკვალიფიკაციო ეტაპზევე 3:4 წააგო პოლონელ თადეუშ მიჰალიკთან. ასევე მოულოდნელი იყო რამაზ ზოიძის (72) მარცხიც პირველივე წრეში პოლონელ მათეუშ ბერნატეკთან - 5:14 და მერე არც მას მიეცა სანუგეშოში გადასვლის შანსი. რამაზ სურმანიძეც (60) პირველივე შეხვედრაში დამარცხდა ბულგარელ ავგუსტინ სპასოვთან 3:7 და ისიც გამოვარდა ჩემპიონატიდან. დებიუტანტმა ბექა მამუკაშვილმა (77) ავსტრიელ მიჰაელ ვაგნერს 6:5 კი მოუგო, მაგრამ მერე 2:7 დამარცხდა პოლონელ ედგარ ბაბაინთან. გიორგი მელიაც (97) პირველივე შეხვედრიდან გამოვარდა თურქ ფატიჰ ბასკოისთან შეხვედრაში - 3:7.

55 კგ.
1. ვიტალი კაბალოევი (რუსეთი); 2. ფლორინ ტიტა (რუმინეთი); 3. ფაბიან ბერნჰარდ შმიტი (გერმანია), ელდანიზ აზიზლი (აზერბაიჯანი); 8. ნუგზარ წურწუმია (საქართველო).

60 კგ.
1. ვიქტორ ჩობანუ (მოლდოვა); 2. სერგეი ემელინი (რუსეთი); 3. ლენურ ტემიროვი (უკრაინა), კერემ კამალი (თურქეთი); 15. რამაზ სურმანიძე (საქართველო).

72 კგ.
1. აბუიაზიგ მანციგოვი (რუსეთი); 2. ჯენგიზ არსლანი (თურქეთი); 3. აიკ მნაცაკანიანი (ბულგარეთი), დომინიკ ეტლინგერი (ხორვატია); 11. რამაზ ზოიძე (საქართველო).

77 კგ.
1. რომან ვლასოვი (რუსეთი); 2. როლანდ შვარცი (გერმანია); 3. ვიქტორ ნემესი (სერბეთი), არსენ ჯულფალაკიანი (სომხეთი); 11. ბექა მამუკაშვილი (საქართველო).

87 კგ.
1. ჟან ბელენიუკი (უკრაინა); 2. ისლამ აბასოვი (აზერბაიჯანი); 3. ერიკ ჟილვასი (უნგრეთი), დენის კუდლა (გერმანია); 17. რობერტ კობლიაშვილი (საქართველო).

97 კგ.
1. მუსა ევლოევი (რუსეთი); 2. კირილ მილოვი (ბულგარეთი); 3. დაიგორო ტიმონჩინი (იტალია), მატტი ელიას კუოსმანენი (ფინეთი); 17. გიორგი მელია (საქართველო).

ყოველდღიური სპორტული გაზეთი "ლელო"
388
მკითხველის კომენტარები / 0 /
მსგავსი ამბები
რუბრიკის სხვა სიახლეები
;