ბერძენ-რომაელთა ალაფი: ოქრო, ვერცხლი და ოთხი ბრინჯაო

საქართველოს ბერძნულ-რომაულმა ნაკრებმა დაღესტნურ კასპიისკში მიმდინარე ევროპის ჩემპიონატზე ოდნავ გააუარესა პირველი დღის შედეგები:

გუშინ 1 ვერცხლი და 2 ბრინჯაო მოიპოვა. ევროპის ვიცე-ჩემპიონი ოლიმპიური პრიზიორი შმაგი ბოლქვაძე (67) გახდა, მესამე ადგილზე კი დებიუტანტები - დავით ჩხარტიშვილი (60) და იური ლომაძე (72) გავიდნენ.

საბოლოოდ, ბექა როყვასა და ვლადიმერ გეგეშიძის გაწვრთნილმა გუნდმა 6 მედალი მოიპოვა: თითო ოქრო-ვერცხლი და 4 ბრინჯაო. შეგახსენებთ, რომ გუშინწინ ევროპის ჩემპიონის ტიტული რობერტ კობლიაშვილმა (87) მოიპოვა, ბრინჯაოს მედლებს კი კიდევ ერთი დებიუტანტი - ნუგზარ წურწუმია (55) და იაკობ ქაჯაია (130) დაეუფლნენ.

10 წონიდან 6 მედალი - მშვენიერი შედეგია. მით უფრო, რომ ოქროც არის, ხოლო გუნდის კიდევ ერთ წევრს - თორნიკე ძამაშვილს (77) კი მხოლოდ ერთი მოგება დააკლდა ბრინჯაომდე.

მართლაც საოცარი მეტამორფოზაა გუნდისგან, რომელიც არცთუ დიდი ხნის წინათ კრიზისში იყო. წარმატება მით უფრო გასახარია, რომ გუნდში ბევრი დებიუტანტი იყო, რომელთა უმეტესობამ წარმატებით იჭიდავა ანუ თაობათა ცვლა უმტკივნეულოდ მიდის.

გუშინდელი დღიდან ერთადერთი საწუხარი მხოლოდ ბოლქვაძის წაგებაა რუსთა ევროპის ორგზის ჩემპიონსა და მსოფლიოს ორგზის ბრინჯაოს პრიზიორ არტემ სურკოვთან. ჩვენებურმა წინასწარი შეხვედრები საკმაოდ მაღალ დონეზე ჩაატარა, სურკოვმა კი ვერ დატოვა მთლად უნაკლო შთაბეჭდილება. ამის მიუხედავად, ფინალი რუსმა პირწმინდად - 8:0 მოიგო და ბოლქვაძე ვერცხლს დააჯერა.

დამამშვიდებლის ფინალებში ისევ იყოჩაღეს ჩვენმა დებიუტანტებმა. ჩხარტიშვილმა 1:1-ზე მოუგო გერმანელ ეტიენ კინსინგერს, ლომაძემ კი მოლდოველი დანიელ კატარაგა 15:6 გაანადგურა.

ზოგადად, ლომაძემ ძალიან კარგი, ტექნიკური და თვალსასეირო ჭიდაობა აჩვენა და კატარაგა რას გვიქვია, როცა სერბთა მსოფლიოს ვიცე-ჩემპიონი ალექსანდარ მაქსიმოვიჩიც აბზრიალა.

ევროპის ჩემპიონატის მედალოსანთა შორის კიდევ ერთი ქართველია - 97 კილოგრამში ვერცხლი მიხეილ ქაჯაიამ, იაკობ ქაჯაიას ბიძაშვილმა მოიპოვა, ოღონდ ის სერბეთის სახელით გამოდის. ფინალში ის მართლაც უძლეველ სომეხ არტურ ალექსანიანთან დამარცხდა.

ახლა ევროპის ჩემპიონატში ქალების ტურნირი მიმდინარეობს, ხვალიდან კი შეჯიბრებაში თავისუფალი სტილით მოჭიდავეებიც ჩაებმებიან. ჩემპიონატში ჩვენი ნაკრები საბრძოლო შემადგენლობით გამოვა.

საქართველოს ნაკრები. თავისუფალი ჭიდაობა:

57 კგ. ოთარ გოგავა
61 კგ. ბექა ლომთაძე
65 კგ. ვლადიმერ ხინჩეგაშვილი
70 კგ. ზურაბ იაკობიშვილი
74 კგ. ავთანდილ კენჭაძე
79 კგ. ჯუმბერ ყველაშვილი
86 კგ. სანდრო ამინაშვილი
92 კგ. ირაკლი მწითური
97 კგ. ელიზბარ ოდიკაძე
125 კგ. გენო პეტრიაშვილი

ევროპის ჩემპიონატი. ბერძნულ-რომაული ჭიდაობა:

60 კგ.
1. სერგეი ემელინი (რუსეთი); 2. მურად მამადოვი (აზერბაიჯანი); 3. დავით ჩხარტიშვილი (საქართველო), ჯაკოპო სანდრონი (იტალია).

67 კგ.
1. არტემ სურკოვი (რუსეთი); 2. შმაგი ბოლქვაძე (საქართველო); 3. კარენ ასლანიანი (სომხეთი, ენეს ბასარი (თურქეთი).

72 კგ.
1. ადამ კურაკი (რუსეთი); 2. რასულ ჩუნაევი (აზერბაიჯანი); 3. იური ლომაძე (საქართველო), ბალინტ კოპრასი (უნგრეთი).

82 კგ.
1. მაქსიმ მანუკიანი (სომხეთი); 2. ვიკტარ სასუნოუსკი (ბელარუსი); 3. დანიელ ტიხომიროვ ალექსანდროვი (ბულგარეთი), რაფიგ ჰუსეინოვი (აზერბაიჯანი); 8. ზურაბ დათუნაშვილი (საქართველო).

97 კგ.
1. არტურ ალექსანიანი (სომხეთი); 2. მიხეილ ქაჯაია (სერბეთი); 3. მატტი ელიას კუოსმანენი (ფინეთი), ბალაჟ კისი (უნგრეთი); 14. კუკური კირცხალია (საქართველო).

ყოველდღიური სპორტული გაზეთი "ლელო"
347
მკითხველის კომენტარები / 0 /
მსგავსი ამბები
რუბრიკის სხვა სიახლეები