ბერძენ-რომაელთა შემადგენლობა მსოფლიოს ჩემპიონატისთვის ცნობილია

14 სექტემბერს ყაზახეთის დედაქალაქ ნურ სულთანში სტარტს აიღებს მსოფლიოს ჩემპიონატი ჭიდაობაში, რომელიც 22 სექტემბერს დასრულდება.

მასში თავდაპირველად ბერძნულ-რომაული სტილით მოჭიდავეები ჩაებმებიან. იქ საქართველოს ღირსებას ხობელი ევროპისა და მსოფლიოს ბრინჯაოს მედალოსანი ნუგზარ წურწუმია (55), ოზურგეთელები, ევროპის მესამე პრიზიორები დავით ჩხარტიშვილი (60), იური ლომაძე (72) და უფროსებში ევროპის ბრინჯაოს მედალოსანი, ხოლო 23-წლიანებში ევროპის ჩემპიონი ლევან ქავჟარაძე (63);

აჭარის გუნდის წევრები: ოლიმპიური მედალოსანი, ევროპული თამაშების ფინალისტი შმაგი ბოლქვაძე (67), ახალგაზრდებში მსოფლიოს ჩემპიონი გელა ბოლქვაძე (77) და უფროსებში მსოფლიოს ბრინჯაოს მედალოსანი, 23-წლიანებში ევროპის ჩემპიონი ლაშა გობაძე (82), 23-წლიანებში ქუთაისელთა ევროპის ჩემპიონი გურამ ხეცურიანი (87),

ახალგაზრდებში მსოფლიოს ჩემპიონი, სამტრედიელი გიორგი მელია (97) და ევროპისა და ევროპული თამაშების ფინალისტი, 23-წლიანებში ევროპის კიდევ ერთი გამარჯვებული, წყალტუბოელი იაკობ ქაჯაია (130) დაიცავენ. 

ბუნებრივია, მსოფლიოს ჩემპოიონატი ორდღიანი ფორმატით ჩაივლის ანუ პირველ დღეს გაიმართება წინასწარი ეტაპის შეხვედრები ნახევარფინალის ჩათვლით, ფინალები და დამამშვიდებელი წრის პაექრობები კი - მეორე დღეს. 

14 სექტემბერს შეჯიბრებაში 55, 63, 72 და 82 კილოგრამების წარმომადგენლები ჩაებმებიან, რომლებიც მედალოსნებს 15-ში გამოავლენენ. 15-16 სექტემბერს საქმეში 67, 87 და 97 კილოგრამების წარმომადგენლები ჩაებმებიან, ხოლო 16-17 სექტემბერს დარჩენილი სამი წონის - 60, 77 და 130 კილოგრამების ფალავნებს ვიხილავთ. 

მსოფლიოს ჩემპიონატის მნიშვნელობაზე საუბარი თავისთავად ხომ ზედმეტია, მაგრამ წლევანდელი ტურნირის ფასი ათმაგდება, ვინაიდან იქ ტოკიოს 2020 წლის ოლიმპიადის საგზურებიც გაიცემა. ბუნებრივია, მხოლოდ ოლიმპიურ წონით კატეგორიებში, ასეთი კი 10-დან მხოლოდ 6-ია: 60, 67, 77, 87, 97 და 130 კილოგრამები.

ლიცენზიების მოსაპოვებლად აუცილებელია ექვსეულში შესვლა ანუ მსოფლიოზე, მინიმუმ, ბრინჯაოსთვის უნდა იჭიდაო - რომც წააგო, მედალს ვერა, მაგრამ საგზურს მიიღებ. ვინც ყაზახეთში ვერ მოიპოვებს ლიცენზიას, მათ შანსი უკვე გაისად მიეცემათ კონტინენტურ პირველობებსა და საგანგებო სალიცენზიო შეჯიბრებებში. 

ჩვენი ბერძენ-რომაელთა ნაკრები ამჟამად ბორჯომში გადის დასკვნით შეკრებას, დაახლოებით ერთ კვირაში კი ყაზახეთში გაფრინდება. 

ყოველდღიური სპორტული გაზეთი "ლელო"
702
მკითხველის კომენტარები / 0 /
მსგავსი ამბები
რუბრიკის სხვა სიახლეები
;