ბერძნულ-რომაული. ევროპის ჩემპიონატი U23: ჩინებული სტარტი სერბეთში

სერბულ ნოვი სადში გუშინ ევროპის ჩემპიონატი დაიწყო 23-წლამდელ მოჭიდავეთა შორის, რომელიც ბერძენ-რომაელებმა გახსნეს და ჩვენმა ნაკრებმა ჩინებული სტარტი აიღო:

გუშინ შეჯიბრებაში ხუთი წონითი კატეგორიის წარმომადგენლები ჩაებნენ, ხალიჩაზეც ამდენივე ქართველი გავიდა და იმათგან ოთხმა ფინალის საგზური მოიპოვა! თუმცა ურიგოდ არც იმ მეხუთეს უასპარეზია - თანაგუნდელთა მსგავსად, ნახევარფინალში ისიც გავიდა, მაგრამ იქ დამარცხდა, თანაც, თანაბარ ბრძოლაში, 1:1-ზე და დამამშვიდებლის ფინალში გადაერთო.

ამდენად, დღეს საღამოს, ფინალურ ბლოკში ოქროს მედლისთვის ხობელი ნუგზარ წურწუმია (55), ოზურგეთელი ლევან ქავჟარაძე (63), ქუთაისელები - გურამ ხეცურიანი (87) და ზვიად პატარიძე (130) იჭიდავებენ, ხოლო გარდაბნელი ბექა მამუკაშვილი (77) ბრინჯაოს მედლისთვის იბრძოლებს.

ფინალისტთა კვარტეტის ორი წევრისგან ანალოგიურ გამოსვლას ველოდებოდით კიდეც - წურწუმია და პატარიძე 23-წლიანებში ევროპისა და მსოფლიოს შარშანდელი ჩემპიონები არიან; ამასთან, წურწუმია უფროსებში ევროპისა და მსოფლიოს მესამე პრიზიორია და მათგან სხვა შედეგი ერთნიშნად დადებითად არც მიიღებოდა. უტიტულოები და უცნობები არც ქავჟარაძე და ხეცურიანი არიან, თუმცა ისინი ასე გამოკვეთილი ფავორიტები არ არიან და რომც ვერ გასულიყვნენ ფინალში, ამისთვის არავინ გაკილავდათ. არადა, მათაც ივაჟკაცეს და ოდნავ რომ გამართლებოდა, მამუკაშვილსაც ვიხილავდით ფინალში.

წურწუმია შარშან გადმოვიდა ახალგაზრდებიდან უფროსებში და განვლილ სეზონ-ნახევარში „რუსების ექსპერტად“ იქცა - ხობელმა ფალავანმა არც უფროსებში, არც - 23-იანებში არ გაახარა მათი ნაკრების არცერთი წევრი და სადაც შეხვდა, ყველგან შემუსრა. თან, ლამის ყველა ტურნირზე სხვადასხვა რუსთან უწევს პაექრობა, მაგრამ შედეგი უცვლელია - ყოველთვის იმარჯვებს. „ჭიდაობის მაესტრომ“ ტრადიციას არც ახლა უღალატა და ამჯერადაც დაამარცხა მორიგი რუსი, თუმცა ტრადიციას სხვა კუთხითაც უერთგულა და ამჯერადაც ძალიან ლამაზი, ტექნიკური და თვალსასეირო ჭიდაობა გვაჩვენა.

წურწუმიამ სერბულ ხალიჩაზე გუშინ სამი ორთაბრძოლა გამართა და თითქმის ყველა დიდი ანგარიშით მოიგო, ხოლო რომელიც წმინდად ვერ მოიგო, ბლომად ქულები მაინც დააგროვა. მან პირველ შეხვედრაში აზერბაიჯანელ ზეიად ზეინალოვს 5:2 აჯობა, უკრაინელ ვლადისლავ კოროსტელოვს წმინდად, 9:0 მოუგო, ნახევარფინალში კი რუსი ვიქტორ ვედერნიკოვი ასევე სუფთად, 11:2 დაამარცხა.

ვედერნიკოვს მან 11:2 მოუგო, თანაც - პირველივე პერიოდში. დღის ბოლოს ეს შეხვედრა საერთაშორისო ფედერაციამაც გამოარჩია, როგორც საუკეთესო.
ასევე პირველივე პერიოდში, საწყის 2.30 წუთში მოუთავა ხელი უკრაინელსაც (მას შარშანაც მოუგო ამავე შეჯიბრებაზე), ვინც სისწრაფეში დაჯაბნა - ამის დამსახურებით, იოლად ჩაჰყავდა დაბლა, თუმცა ჩოქბჯენიდანაც ატრიალებდა. ფინალში წურწუმია რუმინელ ფლორინ ტიტას შეხვდება, ვინც ლამის სეირნობით მივიდა იქამდე, რადგან ყველა ძლიერი წურწუმიას მხარეს იყო.

„ვები ემრე-ჰამიტ ყაფლანის მემორიალის“ წლევანდელი გამარჯვებული ქავჟარაძე პირველ ორ შეხვედრაში იოლად და ერთნაირი ანგარიშით - 8:0 ვადამდე გაუსწორდა ბულგარელ ნიკალას სულევსა და პოლონელ ცეზარი ბარტოშ ნოვაკს, თუმცა აღსანიშნავია, რომ სულევს ორჯერ გაუკეთა 4-ქულიანი გდება: კისრულით რომ გადმოიღო, მერე ხალიჩიდანაც აიტაცა და მაღალი ტრაექტორიით გადააგდო, ნახევარფინალში კი უნგრელ ერიკ ტორბას 7:2 მოუგო. ფინალში მისი მეტოქე სომეხი სლავიკ გალსტიანი იქნება. მთლიანობაში, ოზურგეთელმა ათლეტმა თავისი საუკეთესო თვისებები წარმოაჩინა და ფრიად ტექნიკურად იჭიდავა.

ხეცურიანმა როგორც უნდა დაასრულოს ხვალინდელი ფინალი, მისთვის ეს საერთაშორისო არენაზე მოპოვებული პირველი მედალი იქნება და - საკმაოდ წონადიც. ნოვი სადში მან ყველაზე ხმაურინი გამარჯვება მეორე პაექრობაში მიითვალა, როცა ბეჭებზე გააკრა თურქი ალი ჯენგიზი. მას სამჯერ გაუკეთა ილეთი დგომიდან, როცა ჯვარედინი მოვლებიდან გადააგდო. ამათგან პირველი ორი 4-ქულიანი იყო, მესამეზე კი ბეჭებზე დააწვინა. ეს მეოთხედფინალში მოხდა, მანამდე კი ქართველმა ათლეტმა 3:1 დაამარცხა ამ ასაკში უკრაინელთა მსოფლიოს შარშანდელი ფინალისტი სემენ ნოვიკოვი, ხოლო ნახევარფინალში 4:0 მოუგო ლიეტუველ მარტინას ნემსევიჩიუსს, დღეს საღამოს კი ფინალში რუს გაზი ხალილოვს დაეჭიდება.

პატარიძეს აჩრდილივით დასდევს თურქი ოსმან ილდირიმი - შარშან ევროპის ჩემპიონატის ფინალშიც მას მოუგო და - მსოფლიოსიც. თანაც, ევროპაზე შედარებით იოლად აჯობა, მსოფლიოზე კი ჩვენებური ნატკენი ფეხით ჭიდაობდა და 0:5 ჩამორჩა, თუმცა მაინც ამოუქაჩა და მოუგო.

ამჯერად ისინი პირველ წრეში შეხვდნენ ერთმანეთს და პატარიძე ამჯერადაც 0:5 ჩამორჩა. თუმცა ილდირიმისთვის სწორედ ბოლო ილეთი გახდა საბედისწერო - კი დაატრიალა ჩვენებური, მაგრამ ამან მოძრაობაზე დაიჭირა, დაუხურა და ბეჭებზე დადო. „ტიტანთა ბრძოლის“ შემდეგ პატარიძემ იოლად დაამარცხა სომეხი დავიდ ოვასაპიანი (4:0) და ესტონელი არტურ ვიტიტინი (9:0). ცხადია, უფრო შთამბეჭდავი ესტონელთან მოგება იყო, სადაც ერთ წუთში პატარიძის მასირებულ შეტევას მეტოქე წრიდან გაექცა და ქართველმა პირველი ქულა ასე მიიღო.

მალევე ვიტიტინი პასიურობისთვის კიდევ ერთი ქულით დასაჯეს, პატარიძემ კი ჩოქბჯენში ჩააყანებინა და დაატრიალა კიდეც: 4:0. დარჩენილ დროში ესტონელი კიდევ ორჯერ გაიქცა გარეთ, მესამე გაქცევისას კი პატარიძემ ორქულიანზე გადააგდო და 9:0 დააფიქსირა. ის ფინალში რუმინელ ლენარდ იშტვან ბერეის შეხვდება.

მამუკაშვილმა ჩემპიონატში გამოსვლა „ტუშეთი“ დაიწყო - შვედეთის სახელით მოჭიდავე ხალიდ ქერჩიევს ისედაც 3:1 უგებდა, როცა ბეჭებზე დააწვინა. მეოთხედფინალში ბელარუს ანტონ სახნოს 1:1-ზე, ბოლო ქულის წესით მოუგო, მაგრამ ნახევარფინალში სწორედ ამ ანგარიშით და ამ წესით თვითონ დამარცხდა რუს ისლამ ოპიევთან. რუსებს სხვა ფინალისტი არც ჰყავთ, ჩვენებურის მეტოქე კი ბრინჯაოსთვის პაექრობაში ხვალ გაირკვევა.

გუშინვე ჩატარდა დარჩენილი ხუთი წონის წილისყრა, რომლებიც დღეს ჩაატარებენ წინასწარი ეტაპის შეხვედრებს, და გაირკვა ჩვენებურთა მეტოქეები.
ოზურგეთელი ირაკლი ძიმისტარაშვილი (60) საკვალიფიკაციო ეტაპზე ბელარუს იჰარ დროზდს შეხვდება, ამათში მოგებულს კი შვედი არდიტ ფაზლჯიჯა ელოდება.

ჩვენებურის მხარეს არიან რუსი და თურქი მეტოქეებიც. საკვალიფიკაციოდან იწყებს ასპარეზობას გარდაბნელი გიორგი კურტანიძეც (67) - მათეუშ რადოსლავ ჟევჩუკს ხვდება, მოგების შემთხვევაში კი მოლდოველ ვალენტინ პეტიჩსა და რუს ალენ მირზოაინს შორის უძლიერესი ელოდება. ჩვენი გუნდის კიდევ ერთი ლიდერი, ასაკობრივ ნაკრებებში ევროპისა და მსოფლიოს მრავალგზის ჩემპიონი, ამ ასაკში ევროპის შარშანდელი ჩემპიონი და მსოფლიოს ფინალისტი რამაზ ზოიძე (72) პირველ წრეში თავისუფალია, მეორეში კი თურქ არსლან ჯენგიზს დაეჭიდება. ისინი შარშან 23-იანებში ევროპაზეც ფინალში შეხვდნენ ერთმანეთს და მსოფლიოზეც - პირველად ჩვენმა ათლეტმა მოიგო, მეორედ - თურქმა. ვნახოთ, რა იქნება ამჯერად.

გარდაბნელი აივენგო რიკაძე (82) საკვალიფიკაციოში თურქ ჰასან ბასრი ილდირიმს ხვდება, ხოლო ახალგაზრდებში მსოფლიოს ჩემპიონი, 23-იანებში კი მსოფლიოს შარშანდელი მესამე პრიზიორი, სამტრედიელი გიორგი მელია (97) იმავე ეტაპზე ბერძენ მიხაილ იოსიფიდისს დაეჭიდება.

ყოველდღიური სპორტული გაზეთი "ლელო"
985
მკითხველის კომენტარები / 0 /
მსგავსი ამბები
რუბრიკის სხვა სიახლეები
;