ბერძნულ-რომაული. ნუგზარ წურწუმიას კისრული წლის ყველაზე ეფექტური გდებაა! [VIDEO]

ბერძნულ-რომაულად მოჭიდავე ხობელი ნუგზარ წურწუმიასთვის (55) მიმდინარე სპორტული სეზონი ფრიად წარმატებული აღმოჩნდა.

 ახალგაზრდებიდან ეროვნულ ნაკრებში გადმოსვლისთანავე დებიუტანტმა უფროსებში ევროპის ჩემპიონატზეც ბრინჯაოს მედალი მოიპოვა და მსოფლიოსაზეც, პარალელურად კი 23-წლიანთა შორის ევროპისა და მსოფლიოს ჩემპიონი გახდა.

დებიუტანტისთვის ეს ძალიან კარგი შედეგია და მის უჩვეულოდ დიდ ტალანტზე მიუთითებს, თუმცა ხობელმა ათლეტმა საჭიდაო სამყაროს თავი ძალიან ლამაზი სტილით და ტექნიკური ჭიდაობითაც დაამახსოვრა.

ამ დღეებში მან კიდევ ერთი აღიარება მოიპოვა სწორედ ამ უჩვეულოდ ლამაზი ილეთების გამო - ჭიდაობის გაერთიანებულმა მსოფლიოს ფედერაციამ მსოფლიოს ჩემპიონატზე ბრინჯაოს მედლისთვის გამართულ შეხვედრაში ჩინელ ლიგუო ჩაოსთან შესრულებული ჩახტომითი კისრული თავისი ეფექტურობის გამო გამოარჩია.

ეს დასამახსოვრებელი ეპიზოდი შეხვედრის დაწყებიდან 1.30 წუთში მოხდა, როცა ჩვენებური ისედაც 7:0 იგებდა. ამის მიუხედავად, ჟინიანი და შემტევი სტილის ფალავანი მაინც არ ღალატობდა თავის ჩვეულებას და აგრძელებდა შეტევას, რამაც მართლაც ეფექტური წარმატება მოუტანა - ჩინელი ისე გადმოისროლა, თითქოს ტომარა გადმოექნიოს.

მართალია, ეს არაოფიციალური ნომინაციაა, მაგრამ ათეულობით ფალავანის ასეულობით ილეთს შორის გამორჩევა მაინც სასიამოვნო ფაქტია.

ყოველდღიური სპორტული გაზეთი "ლელო"
1223
მკითხველის კომენტარები / 0 /
მსგავსი ამბები
რუბრიკის სხვა სიახლეები