ბერძნულ-რომაული. პატარიძე - ისევ თურქი!

4 მარტს სერბულ ნოვი სადში ევროპის ჩემპიონატი იწყება 23-წლამდელ მოჭიდავეთა შორის. მასში ჯერ ბერძენ-რომაელები იასპარეზებენ, სასტარტო დღეს კი ასპარეზობაში 55, 63, 77, 87 და 130 კილოგრამების წარმომადგენლები ჩაებმებიან. ჩვენგან ნუგზარ წურწუმია (55), ლევან ქავჟარაძე (63), ბექა მამუკაშვილი (77), გურამ ხეცურიანი (87) და ზვიად პატარიძე (130) იჭიდავებენ.

23-წლიანებში ევროპისა და მსოფლიოს ჩემპიონი, ხოლო უფროსებში ამავე ტურნირების მესამე პრიზიორი წურწუმია პირველ წრეში აზერბაიჯანელ ზიად ზეინალოვს ხვდება, ამათში მოგებული კი ბელარუსი ძმიტრი რადზევიჩისა და უკრაინელი ვლადისლავ კოროსტელოვის დუეტიდან უძლიერესს გაეჯიბრება.

ქავჟარაძე მერვედფინალში ბულგარელ ნიკალას სულევს გაეჯიბრება, ხოლო მას თუ მოუგებს, პორტუგალიელ ჟულინო ბენჟამინ კორეიასა და პოლონელ ცეზარი ბარტოშ ნოვაკს შორის გამარჯვებულს დაეჭიდება.

მამუკაშვილი საკვალიფიკაციო ეტაპიდან თავისუფალია, მერვედფინალში კი შვედეთის სახელით მოჭიდავე ხალიდ ქერჩიევს დაეჭიდება.

ხეცურიანს პირველ მეტოქედ საკვალიფიკაციოში უკრაინელი სემენ ნოვიკოვი ერგო, ამ წყვილის გამარჯვებულს კი შემდეგ ეტაპზე გამოცდილ თურქ ალი ჯენგიზსა და იტალიელ მირკო მინგუზის წყვილიდან უძლიერესთან მოუწევს დაპირისპირება.

დაბოლოს, გუნდის კიდევ ეთი ლიდერი, აასაკობრივ ნაკრებებში მსოფლიოს 6-გზის და ევროპის 5-გზის ჩემპიონი პატარიძე, ვინც 23-იანებში ევროპისა და მსოფლიოს ასევე მოქმედი ჩემპიონია. ის საკვალიფიკაციო წრეშივე იჭიდავებს, სადაც წილისყრამ მეტოქედ კვლავ თურქი ოსმან ილდირიმი არგუნა, ვისაც შარშან ამ ასაკში მსოფლიოს ფინალი მოუგო.

მაშინ ჩვენებური ნატკენი ფეხით ჭიდაობდა და თავიდან 0:5 ჩამორჩა, თუმცა საბოლოოდ მაინც მოუგო. პატარიძეს ის ტრავმა წლეულსაც აწუხებდა და თურქთან ახლაც მძიმე ბრძოლა უნდა ელოდებოდეს, მოგების შემთხვევაში კი მომდევნო მეტოქედ ბელარუს არსენ ბოპემბე სიჩევისა და სომეხი დავიდ ოვასაპიანის დუეტის გამარჯვებული ეყოლება.

1287
მკითხველის კომენტარები / 0 /
მსგავსი ამბები
რუბრიკის სხვა სიახლეები
;