ბერძნულ-რომაული.სტარტი ოქროს დუბლით, დღეს ორი ოქროს მოლოდინში [ანალიზი]

ბუქარესტში მიმდინარე 23-წლამდელ მოჭიდავეთა მსოფლიოს ჩემპიონატზე ბერძნულ-რომაულ ჭიდაობაში საქართველოს ნაკრებმა ორი ოქროს მედალი მოიპოვა:

ჩემპიონები გახდნენ ხობელი ნუგზარ წურწუმია (55) და ქუთაისელი ზვიად პატარიძე (130). გუშინ ჩატარებულ ფინალურ ბლოკში ორი ფინალისტი გვყავდა და სასიხარულოა, რომ ორივემ წარმატებით ჩაატარა ფინალური პაექრობა.

წურწუმიამ ფინალიც მისთვის ჩვეულ შემტევ სტილში დაიწყო და 3:2 დაამარცხა რუსი ვიტალი კაბალოევი, რითაც კარიერაში ჯერჯერობით უდიდესი წარმატება მოიპოვა. ის თავიდანვე ეკვეთა მეტოქეს და პირველი ქულაც მალევე მოიპოვა, როცა რუსი წრიდან გაიყვანა. მას შეტევები არც ამის შემდეგ შეუნელებია, მაგრამ ერთხელ რუსმაც მოახერხა მისი წრიდან გაყვანა და ანგარიშის გათანაბრება, თუმცა ეს დიდხანს არ შერჩა: ქართველმა წელში შესვლით დაბლა ჩააგდო და ანგარიში 3:1 გახადა. ამის შემდეგ ის უფრო ჩამშლელ ჭიდაობას მიეძალა და ბოლოსკენ მსაჯმა ქულით დასაჯა. თან ჩოქბჯენშიც დააყენეს, ოღონდ იქ კარგად დაიცვა თავი და მეტოქეს გდება არ დაანება.

შეგახსენებთ, რომ წურწუმია უფროსებში ევროპისა და მსოფლიოს წლევანდელი ბრინჯაოს მედალოსანია. თანაც ორივე ტურნირზე რუსი ფალავანი - ვასილ ტოპოევი დაჯაბნა, ახლა კი მეორე რუსსაც დამაჯერებლად მოუგო.

პატარიძემ დაძაბულ ფინალურ პაექრობაში ბოლოსკენ გატეხა თურქი ოსმან ილდირიმი, 0:5 ამოუქაჩა და 6:5 მოუგო. ჩვენებურს ფიზიკურად ძალიან გაუჭირდა, თუმცა მეორე ნახევარში თურქი საერთოდ გასავათდა, ხოლო შეხვედრაში ორჯერ გააფრთხილეს კიდეც პასიურობისთვის.

თურქმა ხუთივე ქულა პირველივე წუთზე მიიღო, ოღონდ ცოტა საჩოთირო ვითარებაში: პატარიძე წრიდან მის გაყვანას ცდილობდა, მაგრამ ილდირიმმა დაუხურა, აქეთ მოაწვა და გადმოაგდო. მსაჯმა ეს ეპიზოდი 2 ქულად შეაფასა, ოღონდ კომისარი ამდენივე ქულას პატარიძისთვისაც მოითხოვდა. იქ იყო ეპიზოდი, როცა წაქცეულმა პატარიძემ ერთ ეპიზოდში თითქოს გადმოატრიალა თურქი, ოღონდ რაღაც ისე ჩანდა, რომ ფეხიც მიახმარა ამ დროს. საბოლოოდ ვიდეოეპიზოდის გარჩევის შემდეგ კომისრებმა ცოტა უცნაური გადაწყვეტილება მიიღეს და თურქს ერთბაშად 5 ქულა დაუწერეს, პატარიძეს კი არაფერი მისცეს.

დაღლილმა ჩვენებურმა ვითარება მეორე პერიოდში გამოასწორა - სწორედ მაშინ დასაჯეს თურქი ორჯერ ქულა-გაფრთხილებით, დანარჩენი ქულები კი ილდირიმის წრიდან გაყვანით მოიპოვა. საბოლოოდ პატარიძე მეექვსედ გახდა ასაკობრივ ნაკრებებში მსოფლიოს ჩემპიონი.

ამდენად, პირველი ფინალური დღის შემდეგ ჩვენი ნაკრების მონაგარი 2 ოქროა, ჩემპიონატი კი ბუქარესტში კვლავაც გრძელდება და დღეს ფინალში კვლავაც ორი ჩვენებური იჭიდავებს, ხოლო ერთიც ბრინჯაოს მედლისთვის იასპარეზებს.

ფინალში გავიდნენ ახალგაზრდებში მსოფლიოს ჩემპიონები, ხელვაჩაურელი რამაზ ზოიძე (72) და ხულოელი გელა ბოლქვაძე (82), ხოლო ბრინჯაოსთვის აგრძელებენ ბრძოლას უფროსებში ევროპის წლევანდელი ბრინჯაოს მედალოსანი, ოზურგეთელი დავით ჩხარტიშვილი (60) და ახალგაზრდებში კიდევ ერთი მსოფლიოს ჩემპიონი, სამტრედიელი გიორგი მელია (97). ოღონდ მელია დამამშვიდებლის ფინალშია და დღეს პირდაპირ ბრინჯაოსთვის იჭიდავებს, ხოლო ჩხარტიშვილი დამამშვიდებელშია და ბრინჯაოს მოპოვებამდე კიდევ ორი შეხვედრის მოგება მოუწევს.

სამწუხაროდ, დღესვე დამამშვიდებელში დამარცხდა სენაკელი ბაკურ გოგოლი (77) - რუს ისმაილ საიდხასანოვთან 1:6 წააგო და უმედლოდ დარჩა.

როგორც გითხარით, გუშინვე "მეორე ხუთეულის" შეხვედრებიც დაიწყო და დილის პროგრამა ჩვენებმა კვლავაც წარმატებით გაიარეს. გუშინწინდლის მსგავსად, ფინალში ამჯერადაც ორი ჩვენებური გავიდა. სამაგიეროდ, ამჯერად ბრინჯაოს მედლისთვის ბრძოლას არა ერთი, არამედ ორნი აგრძელებენ. ისიც აღსანიშნავია, რომ გუშინ ხუთიდან სამი ჩვენებური გავიდა ნახევარფინალში.

ზოიძე ჩემპიონატში საკვალიფიკაციო ეტაპიდან ჩაება და ფინალში გასასვლელად ოთხი შეხვედრის მოგება დასჭირდა. პირველ პაექრობაში მან წმინდად დაამარცხა ირანელი ალი რეიზოლაჰ არსალანი: 12:4. აქ 2"2-ზე ზოიძემ ძალზე საინტერესო ეპიზოდი შექმნა: ჯერ კისრულით გადმოიღო მეტოქე, რომელმაც ზურგიდან მოვლა მოახერხა, მაგრამ ჩვენებური წამოუხტა და დაფიქსირების საშუალება აღარ მისცა. თუმცა ეპიზოდი ისევ გრძელდებოდა და მას თითქოს ზურგიდან მობღაუჭებული ირანელი აკონტროლებდა, მაგრამ ზოიძემ შუაკაურით ამოუსვა, გვერდიც მიახმარა და მოგვერდით იქით გადააგდო მეტოქე. მერე ერთხელ ყირამალაზეც გადააგდო თავს უკან და ერთი სიტყვით, ყველანაირად დაჯაბნა.

ზოიძემ საკმაოდ დიდი სხვაობით დაამარცხა მომდევნო მეტოქეც - უზბეკი არამ ვარდანიანი: 11:6. ზოიძე 9:2 დაწინაურდა, მეტოქე უმწეობისგან ისე გაწიწმატდა, სხვა რომ ვერაფერი მოახერხა, უხეშობაზე გადავიდა და პირდაპირ ჩაარტყა ხელი სახეში ჩვენებურს. უკან არც ამან დაიხია და მამაპაპურად გაასილაქა. მსაჯებმა უზბეკი ორი ქულით დასაჯეს, რომელმაც შერიგების ნიშნად ხელი გაუწოდა ზოიძეს, თუმცა ამან გაჯავრებით აუკრა და ისევ გაიწია, რისთვისაც მანაც მიიღო ორქულიანი გაფრთხილება. მეოთხედფინალში ჩვენებურმა საკმაოდ მძიმე ბრძოლა გადაიხადა რუს ნარეკ ოგანიანთან - 4:3. სხვათა შორის, კისრულზე ისიც გადმოიკიდა და დატრიალებაც დააპირა, მაგრამ მეტოქემ დაუხურა გდება.

ზოიძემ ნახევარფინალიც საკმაოდ იოლად მოიგო ყაზახ კაჰარმან კისუმეტოვთან, თუმცა ანგარიში დაძაბულ ბრძოლაზე მიუთითებს: 7:5. არადა, ჩვენებური 6:0 დაწინაურდა, მაგრამ მერე ხელი იტკინა და ამის შემდეგ დაკარგა ქულები.

ფინალში ზოიძე ისევ თურქ არსლან ჯენგიზს შეხვდება, ვისაც წლეულს ამავე ასაკის ევროპის პირველობის ფინალში მოუგო. თანაც - მისსავე მშობლიურ სტამბოლში.

ბოლქვაძემ პირველ პაექრობაში საკმაოდ იოლად, 5:1 დაამარცხა ჩინელი ჰაიტაო ქიანი, ვინც ჯერ დაბლა ჩააგდო, მერე კი ორჯერ დაატრიალა და ანგარიში 5:0 წაიყვანა. მას გაცილებით მძიმე ბრძოლა გადახდა ბელარუს მიკიტა კლიმოვიჩთან, ვისაც 1:1-ზე, ბოლო ქულის დამსახურებით გასცდა, ნახევარფინალში კი იაპონელ ტაკაჰირო ცურუდასაც 5:1 მოუგო. ეს შეხვედრაც ჰგავდა ჩინელთან გამართულ პაექრობას, ოღონდ აქ ჩვენებური თავიდან 0:1 ჩამორჩა. სამაგიეროდ, მერე იგივე განმეორდა - ჯერ დაბლა ჩააგდო და იქ ორჯერ დაატრიალა, შემდეგ კი ანგარიში წარმატებით შეინარჩუნა. ფინალში ბოლქვაძე რუმინელ ნიკუ სამუელ ოჯოგს დაეჭიდება.

ნახევარფინალში მელიაც გავიდა, იქამდე სვლა კი ყაზახი ოლჟას სირლიბაის ძლევით დაიწყო: 3:2.

მომდევნო შეხვედრებში სამტრედიელმა ათლეტმა ლიეტუველი რომას ფრიდრიკასი 7:6 დაამარცხა, გერმანელი იან ზირნი კი პირწმინდად, 9:0 დაჯაბნა. ნახევარფინალში ჩვენებური იმავე ანგარიშით რუს ალექსანდრ გოლოვინთან დამარცხდა. დამამშვიდებლის ფინალში გასასვლელად და ჩვენებურთან შესახვედრად ბელარუსი დზმიტრი კამინსკი, იტალიის სახელით მოჭიდავე ქართველი ნიკოლოზ კახელაშვილი და უკრაინელი ვლადენ კოზლიუკი იბრძვიან.

ჩხარტიშვილმა ჯერ იტალიელი ჯაკოპო სანდრონი 9:2, ხოლო ლიეტუველი იუსტას პეტრავიჩიუსი 12:1 დაამარცხა. სამწუხაროდ, კარგად აღებული სტარტი მერე ვეღარ გააგრძელა და აზერბაიჯანელ მურად მამადოვთან მინიმალური სხვაობით, 4:5 დამარცხდა. დამამშვიდებელ წრეში მისი მეტოქე ყირგიზი რუსტამ ტელიშოვისა და უზბეკი ისლომჯონ ბახრამოვის დაპირისპირებაში გაირკვევა, ხოლო თუ ამათში მოგებულს გასცდება, ბრინჯაოსთვის შეხვედრას თურქ კარემ კამალთან გამართავს.

გუშინ ჩვენგან ოთარ აბულაძეც (67) ჭიდაობდა. მან ესპანელი ალეხანდრო რუსლან კონცეფციონ კასტულიო 2:2-ზე, დამატებითი მაჩვენებლებით ჩამოიშორა გზიდან, მაგრამ მერე 4:7 დამარცხდა უნგრელ ოტო ლოსონჟისთან და გამოვარდა.

ყოველდღიური სპორტული გაზეთი "ლელო"
913
მკითხველის კომენტარები / 0 /
მსგავსი ამბები
რუბრიკის სხვა სიახლეები
;