ბერძნულ-რომაული. ტახტის თასი 2018: ირანში ტახტის დასაუფლებლად

ირანულ მაშარში გუშინ დაიწყო ოლიმპიურ ჩემპიონ გოლამ რეზა ტახტის თასის გათამაშება, რომელიც უკვე 38-ედ ტარდება. ეს ერთ-ერთი სარეიტინგო შეჯიბრებაა, რომელიც საერთაშორისო რეიტინგისთვის ქულებს იძლევა.

ამჯერად მასში 10 ნაკრები მონაწილეობს. მათ შორის - საქართველოცაა, თუმცა ჩვენმა მწვრთნელებმა იქ მეორე შემადგენლობა გაგზავნეს.

ამის მიუხედავად, ჩვენი ნაკრები საკმაოდ წარმატებით გამოდის და გუშინ ამ ძლიერ ტურნირზე 10 წონიდან 4-ის ნახევარფინალში გვყავდა მონაწილე: ბაჩანა ფუტკარაძე (55), ხვიჩა ჭითავა (63), გოგა გოგიბერაშვილი (72) და გიორგი ქაცანაშვილი (87).

ამათგან ნახევარფინალში გამარჯვება მხოლოდ ფუტკარაძემ მოიპოვა და დღეს ფინალურ ბლოკში ჩემპიონობისთვის მხოლოდ ის იბრძოლებს, დანარჩენები კი დამამშვიდებლის ფინალში გადავიდნენ და დღეს ბრინჯაოსთვის იასპარეზებენ.

დამამშვიდებელ წრეში არიან და ბრინჯაოს მოპოვების შანსს ინარჩუნებენ ბაკურ გოგოლი (77) და აივენგო რიკაძეც (82), თუმცა მათ ჯერ თითო ბრძოლა კიდევ უნდა მოიგონ, ბრინჯაოსთვის ბრძოლის უფლება რომ მოიპოვონ.

ფუტკარაძე საკვალიფიკაციოში ისვენებდა, მერე კი ირანელ მოსლემ ნადირხადემის 4:3 სძლია, ხოლო ნახევარფინალში აზერბაიჯანელი იბრაჰიმ ნურულაევი 3:1 დაამარცხა. ფინალში მისი მეტოქე თურქი ეკრემ ოზთურქი იქნება.

ჭითავამ ნახევარფინალი ყაზახ კუდაიბერგენ ტურსუნოვთან 6:6-ზე დამატებითი მაჩვენებლებით დათმო, მანამდე კი ირანელ რეზა აბასს 4:2 სძლია. ბრინჯაოსთვის მისი მოცილე ყირგიზი ულუსან ამატოვი იქნება.

ევროპის მესამე პრიზიორი გოგიბერაშვილი თავიდან იოლად გაუსწორდა აზერბაიჯანელ ულვი განიზადეს (2:0) და ძლიერ თურქ ჯენგიზ ასლანს (3:1). ის ყაზახ დემეუ ჟადრაევთან 6:14 დამარცხდა, ბრინჯაოსთვის ბრძოლაში მისი კონკურენტი ჯერ გამოვლენილი არაა.

ქაცანაშვილი ბრინჯაოსთვის ყაზახ აზამატ კუსტუბაევს დაეჭიდება, მარცხი კი ირანელ სამან აზიზისთან იწვნია - 3:4, ხოლო მან უკრაინელი იური შკრიუბა 4:2 დაამარცხა.

დამამშვიდებლის პირველ წრეში გოგოლი ყაზახ ტამერლან შადუკაევს ხვდება, რიკაძე - იტალიელ სიმონე ფიდელბოს.

ყოველდღიური სპორტული გაზეთი "ლელო"
334
მკითხველის კომენტარები / 0 /
მსგავსი ამბები
რუბრიკის სხვა სიახლეები