ნოვი სადში დასრულდა ევროპის 23-წლამდელ მოჭიდავეთა ჩემპიონატი და გუშინ, შეჯიბრების ბოლო დღეს საქართველოს ნაკრებმა კიდევ ორი მედალი მოიპოვა - ოქრო და ვერცხლი.

ამ ასაკში კონტინენტის ჩემპიონი ზედიზედ მეორედ გახდა ხელვაჩაურელი რამაზ ზოიძე (72), ხოლო სამტრედიელი გიორგი მელია (97) მეორეზე გავიდა. გუშინ ბრინჯაოს მედლისთვის გამართულ ბრძოლაში დამარცხდა ოზურგეთელი ირაკლი ძიმისტარაშვილი (60) და მეხუთე ადგილს დასჯერდა, ხოლო მანამდე დამამშვიდებელ წრეში წააგო გარდაბნელმა გიორგი კურტანიძემაც (67) და მეშვიდეზე დარჩა.

ამდენად, სოსო ჯაბიძის გუნდმა სერბეთში გამოსვლა დიდი წარმატებით დაასრულა, რადგან მის ანგარიშზე 10 წონიდან 7 მედალია: 5 ოქრო და თითო ვერცხლ-ბრინჯაო. პირველ დღეს ევროპის ჩემპიონები ხობელი ნუგზარ წურწუმია (55), ოზურგეთელი ლევან ქავჟარაძე (63) და ქუთაისელები - გურამ ხეცურიანი (87) და ზვიად პატარიძე (130) გახდნენ, მესამეზე კი გარდაბნელი ბექა მამუკაშვილი (77) გავიდა. ბუნებრივია, გუნდურ ჩათვლაშიც საქართველოს ნაკრებმა გაიმარჯვა 178 ქულით. მეორეზე რუსეთია 168-ით, მესამეზე კი - თურქეთი 141-ით. აღსანიშნავია, რომ რუსები გუშინ წამოგვეწივნენ, თორემ პირველი დღის შემდეგ ჯაბიძის გუნდი სხვა გალაქტიკაზე იყო კონკურენტებთან შედარებით.

ზოიძის მესამე

რამაზ ზოიძე ზედიზედ მესამედ გახდა 23-წლიანებში ევროპის ჩემპიონი, ისე კი ეს მისი ზედიზედ მეოთხე მედალია ამ შეჯიბრებაზე - პირველად 2016 წელს იასპარეზა და მესამეზე გავიდა. ის გუშინაც ფავორიტი იყო ფინალში იმის მიუხედავად, რომ მეტოქედ რუსული საჭიდაო სკოლის წარმომადგენელი მაგომედ იარბილოვი ჰყავდა.

შეხვედრის მიმდინარეობამ დაადასტურა, რომ ჩვენებური სამართლიანად მიიჩნეოდა ფავორიტად: თავიდანვე აქტიურად შეუტია და მეტოქის პასიურობისთვის ქულაც მიიღო. თან იქვე ჩოქბჯენშიც ჩააყენებინა და ზედიზედ ორჯერაც დაატრიალა, მაგრამ, რატომღაც, მსაჯი ქალბატონი მეორეს არ უთვლიდა, ვიდრე ჩვენებმა არ გააპროტესტეს და ვიდეოგამეორებაზე არ ნახეს. თუმცა იქ ვიდეოც რა საჭირო იყო, რომ არა... ორღობის მსაჯი. ასე დაწინაურდა ზოიძე 5:0 და პირველი პერიოდიც ამ ანგარიშით დასრულდა. მეორეში რუსმა ერთი ქულა უკვე ქართველის პასიურობისთვის მიიღო და ჩოქბჯენშიც დააყენებინა, მაგრამ ზოიძემ იქიდან არათუ გდება დაანება, პირიქით, ამოუძვრა და რუსი გადაიყვანა დაბლა: 7:1. შეხვედრაც ამ ანგარიშით დასრულდა.

მელიას დასანანი მარცხი

მელიამ ფინალში ისეთი მარტივი ტაქტიკური შეცდომა დაუშვა ფინელ არვი მარტინ სავოლაინენთან, ალბათ, მთელი ცხოვრება ემახსოვრება და ვეჭვობთ, ოდესმე კიდევ შეცდეს ასე... ბოლო წუთებზე ანგარიში 1:1 იყო, მაგრამ ბოლო ქულით მელია იგებდა, როცა დასრულებამდე 30 წამით ადრე დგომიდან ილეთი წამოიწყო - ჯვარედინი მოვლებიდან ზურგს უკან გადაგდება მოუნდომა. ეს მისთვის ნაცნობი ფანდია, თუმცა ამჯერად თითქოს ძალა არ ეყო ილეთის დასასრულებლად:

ფინელმა დაუხურა გდება და იქით გადაიყვანა დაბლა: 3:1. ჩვენებმა გააპროტესტეს, მაგრამ არ დააკმაყოფილეს და ფინელს კიდევ ერთი ქულა დაუმატეს: 4:1 სავოლაინენის სასარგებლოდ. მელიას ამ ილეთის ნაცვლად დროის გაყვანაზე რომ ეჭიდავა, ჩემპიონი გახდებოდა, ახლა კი ვერცხლს დასჯერდა.
ძიმისტარაშვილი დამამშვიდებლის ფინალში რუს სადიკ ლალაევთან დამარცხდა - 0:7, კურტანიძემ კი სანუგეშოში პირველივე შეხვედრა სუფთად დათმო მოლდოველ ვალენტინ პეტიჩთან.

55 კგ.
1. ნუგზარ წურწუმია (საქართველო); 2. ფლორინ ტიტა (რუმინეთი); 3. არტიომ დელეანუ (მოლდოვა), ვიქტორ ვედერნიკოვი (რუსეთი).

60 კგ.
1. კერემ კამალი (თურქეთი); 2. რაზვან არნაუტი (რუმინეთი); 3. სადიკ ლალაევი (რუსეთი), ივო ილიევი (ბულგარეთი); 5. ირაკლი ძიმისტარაშვილი (საქართველო).

63 კგ.
1. ლევან ქავჟარაძე (საქართველო); 2. სლავიკ გალსტიანი (სომხეთი); 3. აბდულაჰ ტოპრაკი (თურქეთი), ერიკ ტორბა (უნგრეთი).

67 კგ.
1. ალენ მირზოიანი (რუსეთი); 2. სებასტიან ნადი (სერბეთი); 3. ალიაქსანდრ ლიავონჩუკი (ბელარუსი), არტურ პოლიტაიევი (უკრაინა); 7. გიორგი კურტანიძე (საქართველო).

72 კგ.
1. რამაზ ზოიძე (საქართველო); 2. მაგომედ იარბილოვი (რუსეთი); 3. სტოიან კუბატოვი (ბულგარეთი), ჯენგიზ არსლანი (თურქეთი).

77 კგ.
1. ისლამ ოპიევი (რუსეთი); 2. სერხან აკოუნი (თურქეთი); 3. ბექა მამუკაშვილი (საქართველო), ტამაშ ლევაი (უნგრეთი).

82 კგ.
1. ზოლტან ლევაი (უნგრეთი); 2. ვააგ მარგარიანი (რუსეთი); 3. სტანისლაუ შაფარენკა (ბელარუსი), ჰასან ბასრი ილდირიმი (თურქეთი).

87 კგ.
1. გურამ ხეცურიანი (საქართველო); 2. გაზი ხალილოვი (რუსეთი); 3. ალი ჯენგიზი (თურქეთი), ივან ჰუკლეკი (ხორვატია).

97 კგ.
1. არვი მარტინ სავოლაინენი (ფინეთი); 2. გიორგი მელია (საქართველო); 3. ვლადენ კოზლიუკი (უკრაინა), იბრაჰიმ ტიგჯი (თურქეთი).

130 კგ.
1. ზვიად პატარიძე (საქართველო); 2. ლენარდ იშტვან ბერეი (რუმინეთი); 3. ოლეგ აგახანოვი (რუსეთი), ოსმან ილდირიმი (თურქეთი).