ბერძნულ-რომაული. წურწუმიამ ფინალში რუსი იბრაგიმოვი 8:0 დაამარცხა და ჩემპიონია!

ბერძნულ-რომაული სტილით მოჭიდავე ნუგზარ წურწუმია (55) ვარშავაში ჩატარებული პეტლიასინსკის ტურნირის გამარჯვებულია. ფინალში მან დიდი უპირატესობით, სუფთად მოუგო რუს ელჩინ იბრაგიმოვს: 8:0. თუმცა მანამდეც ასევე დამაჯერებლად სძლია კონკურენტებს: პირველ შეხვედრაში ამერიკელ მაქს ნოვრის 8:1 აჯობა, შემდეგ თურქ აიაზჩი დოგუსს 6:0 მოუგო, ნახევარფინალში კი მისი თანაგუნდელი მურატ ჯანკაია სულაც 11:0 დაამარცხა.

ვარშავაში ჩვენმა ხუთკაციანმა ნაკრებმა კიდევ ერთი მედალი მოიპოვა: მესამეზე გავიდა ოლიმპიური პრიზიორი შმაგი ბოლქვაძე (72). მან თავიდან ბელარუსი ანდრეი ძემბიცკი 11:4 დაამარცხა, ნახევარფინალში კი უკრაინელ მაქსიმ ევტუშენკოსთან 2:4 წააგო. ბრინჯაოსთვის შეხვედრაში ბოლქვაძემ 5:0 სძლია ჩინელ ჰუიუნ ჭანს.

ბრინჯაოსთვის იჭიდავა ევროპისა და ევროპული თამასების მესამე პრიზიორმა დავით ჩხარტიშვილმაც, ვინც ამჯერად ზედა წონაში - 63 კილოგრამში გამოვიდა, თუმცა თურქ ჯეკერ მეჰმეტთან 3:7 წააგო.

პოლონეთში ჩვენგან ლევან ქავჟარაძე (67) და ლაშა გობაძეც (87) გამოდიან. აღსანიშნავია, რომ ორივე ზედა წონაში ჭიდაობს, რადგან მწვრთნელებმა წონა არ დააკლებინეს. ორივე მათგანი დამამშვიდებელ წრეში აგრძელებს ბრინჯაოსთვის ბრძოლას. იქ ქავჟარაძე პოლონელ რომან პაცურკოვსკის შეხვდება, ამათში მოგებული კი ბრინჯაოსთვის პაექრობაში თურქ ჰაჯი კარაკუსს დაეჭიდება. გობაძის პირველი მეტოქე ჩინელი ჯუნჯიე ნა იქნება, ხოლო თუ მოუგებს, მერე მედლისთვის უკრაინელ იური შკრიუბასთან მოუწევს დაჭიდება.

4057
მკითხველის კომენტარები / 0 /
მსგავსი ამბები
რუბრიკის სხვა სიახლეები
;