ბერძნულ-რომაული ჭიდაობა: ლიდერთა იმიჯი

"ოლიმპიურ პარკში" დასრულდა საქართველოს ჩემპიონატი ბერძნულ-რომაულ ჭიდაობაში და გამოვლინდნენ მედალოსნები დარჩენილ 5 წონაში. როგორც გუშინ, ახალმა თაობამ ახლაც "მსუყე ლუკმა" დაისაკუთრა, თუმცა დღეს ძველმა თაობამაც ივარგა: ჩემპიონები ოლიმპიური პრიზიორი შმაგი ბოლქვაძე (67), ევროპისა და მსოფლიოს ბრინჯაოს მედალოსანი რობერტ კობლიაშვილი (87) და იაკობ ქაჯაია (130) გახდნენ. სხვა წონებში ეროვნულ ნაკრებში დამკვიდრებაზე სერიოზული პრეტენზია განაცხადეს დავით ჩხარტიშვილმა (60) და თორნიკე ძამაშვილმა (77).

ჩემპიონატის ნამდვილი გვირგვინი გამოდგა მისი ბოლო შეხვედრა - მძიმე წონის ფინალი იაკობ ქაჯაიასა და ბექა იმერლიშვილს შორის. მოგვერიდან გაკეთებული უმშვენიერესი 4-ქულიანი ილეთი, ზურგსუკან გდება, წელში შესვლებით დაბლა ჩაყვანები თუ ბეჭებზე დადება - ეს ყველაფერი იყო ამ შეხვედრაში და თან სულ რაღაც 1.05 წუთში.

პირველი ნახევარი კანდელაკისა იყო, რომელიც იმ 4-ქულიანითა და მასზე დამატებული კიდევ ერთი გდებით 6:0 დაწინაურდა, მაგრამ მერე ქაჯაიამაც "იპოვა" თავისი ჭიდაობა, ორი ილეთით ანგარიში 4:6-მდე შეამცირა, მეტი კი არც დასჭირდა, რადგან მეორე ილეთზე მეტოქე ბეჭებზეც დააწვინა.
დღეს ყველაზე მეტად გარდაბანმა იყოჩაღა, რომელიც ორ ოქროს დაეუფლა - ძამაშვილი და კობლიაშვილი. აჭარამ და ოზურგეთმა თითო ოქრო მოიპოვეს, შესაბამისად, ბოლქვაძემ და ჩხარტიშვილმა, ერთი კი წყალტუბომ დაისაკუთრა - ქაჯაია. გუნდურ ჩათვლაში აჭარის ნაკრებმა გაიმარჯვა, მეორეზე ოზურგეთი გავიდა, მესამეზე - თბილისი.

60 კგ.
1. დავით ჩხარტიშვილი (ოზურგეთი); 2. რამაზ სურმანიძე (აჭარა); 3. ირაკლი ძიმისტარაშვილი (ოზურგეთი), ლაშა მარიამიძე (თბილისი, ომც).

67 კგ.
1. შმაგი ბოლქვაძე (აჭარა); 2. თორნიკე ჯანგავაძე (ქუთაისი); 3. გოგა გოგიბერაშვილი (სამტრედია), ჯონი ხეცურიანი (ხობი).

77 კგ.
1. თორნიკე ძამაშვილი (გარდაბანი); 2. მინდია წულუკიძე; 3. გელა ბოლქვაძე (ორივე - აჭარა), ბაკურ გოგოლი (თბილისი).

87 კგ.
1. რობერტ კობლიაშვილი (გარდაბანი); 2. ვარლამ კვარაცხელია (ხობი); 3. გურამ ხეცურიანი (ქუთაისი), გიორგი ქაცანაშვილი (სართიჭალა).

130 კგ.
1. იაკობ ქაჯაია (წყალტუბო); 2. ბექა კანდელაკი (თბილისი, ომც); 3. ლევან არაბული (მცხეთა), ვასილ იმერლიშვილი (რუსთავი).

1286
მკითხველის კომენტარები / 0 /
მსგავსი ამბები
რუბრიკის სხვა სიახლეები
;