[ბერძნულ-რომაული ჭიდაობა, U23] სამი ოქროს შანსი გვქონდა და სამი ვერცხლი შეგვრჩა

ლევან ქავჟარაძე ბუდაპეშტში მიმდინარე მსოფლიოს 23-წლამდელთა ჩემპიონატზე ვერცხლის მედალს დასჯერდა. ის ახლოს იყო გამარჯვებასთან, ირანელ დალხანის მთელი პაექრობის განმავლობაში უგებდა 6:2-ს, თუმცა ბოლო გდებით დასანანი მარცხი განიცადა.

ასევე ვერცხლის მედალს დასჯერდა გურამ ხეცურიანი (87 კგ), რომელიც უკრაინელს ნოვიკოვთან დამარცხდა. სამწუხაროდ, მძიმეწონოსანმა ზვიად პატარიძემ წინა დღეს მიღებული ხელის ტრამვის გამო ვეღარ შეძლო ფინალში ასპარეზობა და ავტომატურად ვერცხლის მედლის მფლობელი გახდა.

შეგახსენებთ რომ პატარიძე ჭაბუკებს, ახალგაზრდებსა და 23-წლამდელთა შორის 6-6 გზის ევროპის და მსოფლიოს ჩემპიონია. 

შაბათს წინასწარი ბრძოლები გამართეს სხვა წონებში მოასპარეზე ქართველებმა და დღე კარგადაც ჩაამთავრეს - აივენგო რიკაძე (82 კგ) და გიორგი მელია (97 კგ) კვირას ნახევარფინალში იჭიდავებენ.

რიკაძე რუსეთის ნაკრების წევრ ალირზაევს, ხოლო მელია ბელარუს კამინსკის დაეჭიდება. შაბათსვე იჭიდავეს დავით ჩხარტიშვილმა (60 კგ), გიორგი კურტანიძემ (67 კგ) და რამაზ ზოიძემ (72 კგ). ჩხარტიშვილმა მერვედფინალში დაძაბულ ბრძოლაში 6-9 წააგო რუმინელ არნაუტთან და ასპარეზობას გამოეთიშა.

კურტანიძემ, ამერიკელ ომანიასთან გამარჯვების (8-0) შემდეგ, მერვედფინალში ყირგიზ იბრაგიმოვთან 2-4 წააგო და ჩემპიონატს გამოეთიშა.

რამაზ ზოიძემ (72 კგ) ბულგარელი კუბატოვი 9-0, ხოლო ყირგიზი ნაზარბაევი 8-0 დაამარცხა, მეოთხედფინალში კი დაძაბულ ბრძოლაში დათმო (2-4) შეხვედრა ირანელ გერაეისთან. თუ ეს უკანასკნელი ფინალში გავა, ზოიძე ბრინჯაოს მედლისათვის ბრძოლაში ჩაებმება.

389
მკითხველის კომენტარები / 0 /
მსგავსი ამბები
რუბრიკის სხვა სიახლეები
;