[ბერძნულ/რომაული ჭიდაობა] ფინიში ოთხი მედლით, თუმცა...

სამწუხაროდ, ჩვენმა ბერძნულ-რომაულად მოჭიდავეთა ეროვნულმა ნაკრებმა რომში მიმდინარე ევროპის ჩემპიონატზე მეორე საფინალო დღეც ზუსტად პირველის ანალოგიური შედეგით დაასრულა - ანუ თითო ვერცხლით და ბრინჯაოთი, რის გამოც ამჯერადაც ოქროს გარეშე დავრჩით.

ჩვენმა ნაკრებმა რომში გამოსვლა ოქროს გარეშე, თუმცა კი ოთხი მედლით დაასრულა - 2-2 ვერცხლი და ბრინჯაო. გუშინ კონტინენტის ვიცე-ჩემპიონი ოზურგეთელი იური ლომაძე (72) გახდა, მესამეზე კი ბათუმელი ამირან შავაძე (60) გავიდა. გუშინწინ ვერცხლის მედალი მცხეთელმა მძიმეწონოსანმა ლევან არაბულმა მოიპოვა, ბრინჯაო - ხობელმა ნუგზარ წურწუმიამ (55).

ლომაძეს ფინალში უძლიერესი მეტოქე ჰყავდა - გერმანელთა მსოფლიოს სამგზის ჩემპიონი ფრენკ სტაბლერი. ქართველმა შეხვედრა აქტიურად დაიწყო, როგორც სჩვევია ხოლმე და თავიდან ინიციატივაც იგდო ხელთ. სტაბლერი პასიურობისთვის გააფრთხილეს და ქულით დასაჯეს, თუმცა ჩვენი უბედურებაც აქედან დაიწყო: ჩოქბჯენიდან ლომაძემ ვერ დაატრიალა, მაგრამ არც მოეშვა. არადა, სულ ოდნავი ბიძგი სჭირდებოდა მოძრაობის დასასრულებლად, მაგრამ სანაცვლოდ სტაბლერმა დაუხურა და 2:1 დაწინაურდა. ის-ის იყო, პირველი პერიოდიც დასრულდა, როცა წრიდანაც გაიყვანა და ანგარიში 3:1 გახადა. თუმცა მანამდე ლომაძე საოცარი სისწრაფისა და კოორდინაციის ხარჯზე ორჯერ თითქოსდა უიმედო სიტუაციიდანაც გაექცა, როცა მეტოქე ზურგიდან მოვლით დაბლა ჩაგდებას უპირებდა. სამაგიეროდ, სტაბლერმა მესამე ცდაზე, მეორე პერიოდის დაწყებიდან მალევე უწია მიზანს და დაბლა ჩაიყვანა: 1:5 გერმანელის სასარგებლოდ. ცოტა ხანში პასიურობისთვის უკვე ლომაძე დასაჯეს ერთი ქულით - 1:6, სტაბლერმა კი ჩოქბჯენში დააყენებინა, თუმცა ქართველმა კარგად დაიცვა თავი და ფეხზე წამოუდგა. მალევე ჩვენი ნაკრების მწვრთნელმა ვლადიმერ გეგეშიძემ ჩელენჯი შემოაგდო და მეტოქის უხეშობაზე მიუთითებდა - თვალებში ატაკა თითიო, მაგრამ თავად ლომაძემ ჩელენჯი დააბრუნა. სამწუხაროდ, გერმანელის ტაქტიკას ღირებული ვერაფერი დავუპირისპირეთ. ლომაძემ დარჩენილ ერთ წუთში ის მოახერხა, რომ წრიდან გაიყვანა და სულ ეს იყო - 2:6 დათმო.

სამწუხაროდ, გერმანელის ტაქტიკას ღირებული ვვერაფერი დავუპირისპირეთ. ვერ ვიტყვით, რომ ლომაძე არ ეცადა და ინერტული იყო, მაგრამ აშკარაა, რომ გერმანელებს ზედმიწევნით ჰქონდათ მისი ჭიდაობა შესწავლილი და ყველა კოზირი - სისწრაფეც, ტექნიკაც, მოქნილობაც თუ სხვაც ბოლომდე გაუნეიტრალეს. არაბულისა არ იყოს, ლომაძემაც მხოლოდ წინანდელი მიღწევა გააუმჯობესა - ბრინჯაოდან ვერცხლამდე ამაღლდა, ოქროს კი ვერც ეს შეწვდა.

შავაძემ ულამაზეს ბრძოლაში მოიპოვა ბრინჯაოს მედალი. მისი და რუსი ჟამბოლატ ლოკიაევის დაპირისპირება არა მარტო გუშინდელი დღის, არამედ ჩემპიონატის ერთ-ერთი საუკეთესო დაპირისპირება გამოდგა. შეხვედრის სილამაზეზე ის მიუთითებს, რომ ორჯერ გაკეთდა ოთხქულიანი გდება (მეტოქეებმა მორიგეობით მიითვალეს), ხოლო სიმძაფრეზე ის, რომ ფრედ - 6:6 დასრულდა, გამარჯვება კი შავაძემ მოიპოვა იმის მიუხედავად, რომ ბოლო ქულა რუსისა იყო. უბრალოდ, ჩვენებურმა ბოლოს ორქულიანი გდება გააკეთა, რუსმა კი ბოლოს ორჯერ მიითვალა თითო ქულა. ერთი სიტყვით, მოჭიდავეთა ტერმინით რომ ვთქვათ, შავაძემ ქულის უპირატესობით მოიგო.

როგორც გითხარით, მეტოქეებმა მორიგეობით შეასრულეს ოთხქულიანი გდებები, რომლებიც წყლის წვეთებივით ჰგავდნენ ერთმანეთს. პირველად ეს შავაძემ გააკეთა, ვინც ლოკიაევს კარგად შეუკრა ხელები ზურგზე და დგომიდან თავს უკან გადააგდო. თან ცოტა დააკლდა, იქვე ბეჭებზეც არ დააწვინა, თუმცა რუსი გაექცა. ოღონდ არც ისე შორს, როგორც მას სურდა: ქართველმა ჩოქბჯენში დაიჭირა და ორქულიანზე დაატრიალა: 6:0.

ამის შემდეგ შავაძეს გამოუცდელობამ დარია ხელი და რაკი დასაცავი გაუხდა, ანერვიულდა, ვერაფრით მოახერხა ინიციატივის დაუფლება. მისი ნერვიულობა საფინალო სასტვენის შემდეგ დაღვრილ ემოციებშიც გამოიხატა. ისე, კაცმა რომ თქვას, ინიციატივას არც მანამდე ფლობდა. გეგეშიძე ხმის ჩახლეჩამდე კი უყვიროდა, შენ იჭიდავე, გვერდზე დაიქნიეო და ამგვარები, მაგრამ მისი შეგირდი ამას ვერ ახერხებდა. თუმცა, საბედნიეროდ, იმ ერთ ეპიზოდში კი მოახერხა კომბინაციური ჭიდაობა, როცა დგომიდან ილეთს ჩოქბჯენში კარგი დატრიალებაც მიაყოლა.

მოგვიანებით ზუსტად ანალოგიურ ვითარებაში უკვე ლოკიაევმა გადაადგო ჩვენებური. განსხვავება მხოლოდ ის გახლდათ, რომ ჩოქბჯენიდან, რაც გუშინ შავაძის, უდავოდ, ძლიერი მხარე იყო, ვერ დაატრიალა. შავაძე ამის შემდეგ ორჯერ აღმოჩნდა კრიტიკულ ვითარებაში. პირველად ეს მაშინ მოხდა, როცა რუსმა დგომში ისევ კარგად შეუკრა ხელები „ჯვარზე“ და წრესთან მიიყვანა, ჩვენებურს კი ფეხი გაუცდა გარეთ. ყოველ შემთხვევაში, ეკრანიდან ასე ჩანდა და არა იმგვარად, რომ შეგნებულად გავიდა უკან. ასეა თუ ისე, მსაჯმა ერთი ქულა დააფიქსირა, რითაც რუსმა ორი ქულის მოპოვების შანსი დაკარგა, ანგარიში კი 6:5 გახდა. მეორე კრიტიკული ვითარება მაშინ შეიქმნა, როცა შავაძე პასიურობისთვის ქულით დასაჯეს და ანგარიშიც გათანაბრდა - 6:6, ლოკიაევმა კი ჩოქბჯენი მოითხოვა. საბედნიეროდ, ჩვენმა ათლეტმა იქ თავი ბრწყინვალედ დაიცვა და არც დარჩენილ დროში დაუთმო რამე მეტოქეს, ფრე კი მას აძლევდა ხელს ზემოხსენებული ქულის უპირატესობით. შავაძემ სავსებით დამსახურებულად გაიმარჯვა და კარიერაში ეროვნულ ნაკრებში პირველხარისხოვანი ტურნირების პირველი მედალი მოიპოვა.

60 კგ.

  1. გევორგ ღარიბიანი (სომხეთი); 2. კერემ კამალი (თურქეთი); 3. ამირან შავაძე (საქართველო), მურად ბაზაროვი (აზერბაიჯანი).

67 კგ.

  1. მორტენ ტორესენი (ნორვეგია); 2. ნაზირ აბდულაევი (რუსეთი); 3. კრისტუპას სლეივა (ლიეტუვა), კარენ ასლანიანი (სომხეთი); 13. გიორგი შოთაძე (საქართველო).

72 კგ.

  1. ფრენკ სტაბლერი (გერმანია); 2. იური ლომაძე (სქართველო); 3. სელჩუკ ჩანი (თურქეთი), ულვუ განიზადე (აზერბაიჯანი).

82 კგ.

რაფიკ ჰუსეინოვი (აზერბაიჯანი); 2. დანიელ ალექსანდროვი (ბულგარეთი); 3. ბოგდან კურინოი (შვედეთი), ჰანეს ვაგნერი (გერმანია); 15. ლაშა გობაძე (საქართველო).

97 კგ.

  1. არტურ ალექსანიანი (სომხეთი), 2. ნიკოლოზ კახელაშვილი (იტალია) 3. ჯენკ ილდემი (თურქეთი); ალექსანდრ გოლოვინი (რუსეთი).
438
მკითხველის კომენტარები / 1 /
888
0
somxebma 2 oqro bravo!!!
მსგავსი ამბები
რუბრიკის სხვა სიახლეები
;