ბერძნულ-რომაული ჭიდაობა. წარმატებული სტარტი! ტალინში ორი ფინალისტი გვყავს

საქართველოს ბერძენ-რომაელთა ახალგაზრდული ნაკრები წარმატებით ჩაება ტალინში მიმდინარე თანატოლთა მსოფლიოს ჩემპიონატში - პირველივე დღეს ფინალში ორი წარმომადგენელი გვყავს: ლერი აბულაძე (63) და გიორგი ქაცანაშვილი (87). ამასთან, დამამშვიდებელ წრეში გადავიდა მძიმეწონოსანი რობინზონ ესაძე.

ხულოელი აბულაძე ახალგაზრდებში ევროპის წლევანდელი ვიცე-ჩემპიონია და ახლა იგივე შედეგი, მინიმუმ, გარანტირებული აქვს, თუმცა კარიერაში ჯერჯერობით ყველაზე დიდი წარმატების მოპოვებაც სავსებით ხელეწიფება. როგორც დილით გაცნობეთ, მან საკვალიფიკაციოში 5:4 დაამარცხა უკრაინელი დმიტრო მიროშნიკი, მერვედფინალში კი წმინდად, 8:0 მოუგო უზბეკ ჯავოხირბეკ სამატოვს. მეოთხედფინალში 3:1 აჯობა ბულგარელ ნიკალას პეტროვ სულევს, ხოლო ნახევარფინალში 6:3 დაამარცხა ირანელი შაჰინ აიდი მოფრად ბადაგი. ფინალში მისი მეტოქე აბუ მუსლიმ ამაევია.

გარდაბნელი ქაცანაშვილი წლეულს ევროპის ახალგაზრდულ პირველობაზე მესამეზე გავიდა, ახლა კი უკვე გაინაღდა უფრო დიდი წარმატება. თანაც - უფრო სოლიდურ ტურნირში. მან თავიდან საკვალიფიკაციოში 4:0 მოუგო ირანელ ჰასან ჯაჰანბაკშ გოჯენბაიოღლუ ფოროუზანდენს, შემდეგ კი 5:0 აჯობა იაპონელ რიოტა ნასუკავას. ქაცანაშვილმა პირველი ქულები მეოთხედფინალში დაკარგა შვეიცარიელ მაქს კრისტიან ზემპთან, თუმცა მაინც დამაჯერებლად, 8:0 მოუგო, ნახევარფინალში კი პირწმინდად დაჩაგრა ბელარუსთა ევვროპის წლევანდელი მესამე პრიზიორი იჰარ იარაშევიჩი: 7:0. მან საქმე პირველივე პერიოდში მოამთავრა - 7-ვე ქულა მაშინ მოიპოვა, თუმცა ერთ ეპიზოდში მეტოქე ბეჭებზე დაწვენასაც გადაურჩა.

ქაცანაშვილმა მეტოქეზე პურველივე წამიდან მიითანა შეტევა და სულ მალე მოახერხა კიდეც მისი ჩოქბჯენში ჩაჰყვანა, თან იქ ისე იოლად გადაატრიალა, თითქოს პატარა კენჭი გადადო გვერდზე: 4:0. პერიოდის მიწურულს ბელარუსი ჭელში შესვლას ცდილობდა, მაგრამ ქაცანაშვილმა ილეთი დაუხურა და მოგვერდით გადააგდო 2-ქულიანზე. აი, სწორედ იმ დროს ცდილობდა ბეჭებზე მის დადებას, თუმცა ცოტა არახელსაყრელი პოზიცია ეჭირა და დიდი ჯაჯგურის მიუხედავად, ეს ვერ შეძლო.

სამაგიეროდ, ეს ეპიზოდი ბელარუსებმა გააპროტესტეს - ჩვენებურს ფეხით ჭიდაობას ედავებოდნენ, რაც აბსურდი იყო და მსაჯებმა არც დაუკმაყოფილეს პროტესტი. სამაგიეროდ, წესისამებრ, ჩვენებურს დაუმატეს ერთი ქულა და ანგარიში 7:0 გახდა. ამავე პერიოდში ქაცანაშვილმა დგომიდან ერთი კარგი გდებაც შეასრულა - კარგად შეეკრა ჯვარზე და გადააგდო კიდეც, თუმცა მსაჯმა ფანდი არ ჩაუთვალა.

მეორე პერიოდში ქართველმა ტაქტიკურად იჭიდავა და მშვენივრადაც: შეტევაში აღარ წასულა, მაგრამ არც ყრუ დაცვაში ჩამდგარა, გაფრთხილება რომ მიეღო. მთელი სამი წუთის განმავლობაში წარმატებით შლიდა ბელარუსის შეტევებს და საქმე უპრობლემოდ მიიყვანა გამარჯვებამდე. ფინალში მისი მეტოქე ილია ერმოლენკო იქნება - ევროპის წლევანდელი ჩემპიონი, ვისთანაც ევროპირველობაზე ნახევარფინალში დამარცხდა. ამდენად, ქაცანაშვილს რევანში აქვს ასაღები - ვნახოთ, ხვალ საღამოს შეძლებს თუ ვერა ამას.

ოზურგეთელმა ესაძემ მერვედფინალში ნორვეგიელი ნიკოლა მილატოვიჩი 6:5 დაამარცხა, თუმცა შემდეგ ირანელ ალიაკბარ ჰოსეინ იუსოფიანმადჩალთან 0:8 წააგო. საბოლოოდ ირანელი ფინალში გავიდა, ესაძე კი დამამშვიდებელში პირველ შეხვედრას ბელარუს მიკიტა კავალსკისთან გამართავს. ამათში მოგებული ბრინჯაოსთვის შეხვედრას თურქ ჰამზა მუჰამეტ ბაკირთან გამართავს.

დღეს კიდევ ორი ჩვენებური ჭიდაობდა, მაგრამ მათ მედლის მოპოვების ყოველგვარი შანსი დაკარგეს. სამწუხაროდ, ახალგაზრდებში ევროპის წლევანდელი ჩემპიონი, ხულოელი ფრიდონ აბულაძე (55) პირველივე წრეში დამარცხდა უზბეკ იხტიორ ბოტიროვთან: 3:5. უზბეკიც მალევე დამარცხდა და აბულაძეც საბოლოოდ გამოვარდა.

თანატოლებში ევროპის წლევანდელმა მესამე პრიზიორმა, თბილისელმა ნიკა შერბაკოვმა (77) ორი პაექრობა მოიგო: ლიეტუველი არმინას ლიგნუგარისი 3:0, ხოლო ბელარუსი მიკიტა კაზაკოუ წმინდად, 8:0 დაამარცხა, მაგრამ მეოთხედფინალში ნორვეგიელ ექსაუკე მუკუბუსთან თვითონაც 0:8 წააგო და გამოვარდა, რადგან ნახევარფინალში ნორვეგიელიც დამარცხდა.

ხვალ ჩემპიონატში მორიგი ხუთეული ჩაებმება და ხალიჩაძე ჩვენი გუნდის სხვა ლიდერებიც გავლენ. ახალგაზრდებში ევროპის მოქმედი ჩემპიონი დიეგო ჩხიკვაძე (60) საკვალიფიკაციოში ბელარუს ალექსანდრ ნიაჰოდას ხვდება, ევროპის კიდევ ერთი გამარჯვებული - გიორგი შოთაძე (67) თავიდან პოლონელ ალექსანდერ იულიუს მილევჟიკს დაეჭიდება, ოთარ აბულაძე (72) კი - ირანელ მოჰამედრეზა მაჰმუდ როსტამის. ბექა გურული (82) საკვალიფიკაციო წრეში ბულგარელ ზახარი როსენოვ ზაჩევს ხვდება, ლაშა ტვილიდიანი (97) კი იმავე ეტაპზე ინდოელ დეეპანშუ დეეპანშუს გაეჯიბრება.

310
მკითხველის კომენტარები / 0 /
მსგავსი ამბები
რუბრიკის სხვა სიახლეები
;