ბერძნულ-რომაული ჭიდაობა. წურწუმია და პატარიძე ფინალში არიან, ველით ოქროებს

რუმინეთის დედაქალაქ ბუქარესტში დღეს დაწყებულ 23-წლამდელ მოჭიდავეთა მსოფლიოს ჩემპიონატში წარმატებით ჩაებნენ ქართველი ფალავნები: ხობელი ნუგზარ წურწუმია (55) და ქუთაისელი ზვიად პატარიძე (130) ფინალში გავიდნენ, ხოლო სენაკელი ბაკურ გოგოლი (77) დამამშვიდებელ წრეშია გადასული და ხვალ ბრინჯაოს მედლისთვის გააგრძელებს ბრძოლას. სამწუხაროდ, დღეს უმედლოდ დარჩნენ ოზურგეთელი ლევან ქავჟარაძე (63) და ქუთაისელი გურამ ხეცურიანი (87), რომლებიც დამარცხდნენ და მერე აღარც სანუგეშო წრეში გადასვლის საშუალება აღარ მიეცათ.

არის პირველი მედალი! წურწუმიამ ბრინჯაოსთვის ბრძოლა ჩინელს 11:0 მოუგო

უფროსებში ევროპისა და მსოფლიოს მესამე პრიზიორი წურწუმია რუს ვიტალი კაბალოევს შეხვდება, პატარიძე კი გადამწყვეტ პაექრობას ოსმან ილდირიმთან ჩაატარებს. დამამშვიდებელი ეტაპის პირველ წრეში რუს მეტოქეს - ისმაილ საიდხასანოვს შეხვდება გოგოლიც.

წურწუმიამ პირველ შეხვედრაში 3:2 დაამარცხა სომეხი ნორაირ ჰაკოიანი, მეოთხედფინალში კი 4:1 სძლია ბულგარელ ნედიალკო პეტროვს. ნახევარფინალში ჩვენმა ფალავანმა ყირგიზ ბალბაი დორდოკოვს 2:2 აჯობა.

უფროსთა მსოფლიოს ჩემპიონატის მსგავსად, პატარიძემ პირველ შეხვედრაში ამჯერადაც ირანელი ათლეტი დაამარცხა, ოღონდ ახლა მისი მეტოქე ალიაკბარ ჰოსეინ იოუსოფიამადჩალი, ვისაც 4:1 აჯობა. მეოთხედფინალში რუს ნოხჩო ლაბაზანოვს 5:1 მოუგო, შემდეგ კი წმინდად, 8:0 დაამარცხა ფინელი კონტას იოჰანეს მაეენპაეაე.

გოგოლი პირველივე შეხვედრაში 0:7 დამარცხდა მოლდოველ დანიელ კატარაგასთან.

ხვალვე ასპარეზობაში მორიგი ქართული ხუთეული ჩაებმება. უფროსებში ევროპის კიდევ ერთი მესამე პრიზიორი, ოზურგეთელი დავით ჩხარტიშვილი (60) პირველ შეხვედრას იტალიელ ჯაკოპო სანდრონს შეხვდება, მოგების შემთხვევაში კი ლიეტუველ იუსტას პეტრავიჩიუსსა და ამერიკელ რანდონ დრეივ მირანდას შორის გამარჯვებულთან გამართავს.

ხულოელი ოთარ აბულაძე (60) საკვალიფიკაციოში ესპანელ ალეხანდრო რუსლან კონცეფციონ კასტილოსს შეხვდება, ხოლო მერვედფინალში გასვლისას უნგრელ ოტო ლოსონჟისა და რუმინელ ალექსანდრუ სოლომონს შორის უმჯობესს დაეჭიდება.

საკვალიფიკაციო ეტაპიდან ჩაებმება ჩემპიონატში ახალგაზრდებსა და ჭაბუკებში ევროპისა და მსოფლიოს მრავალგზის გამარჯვებული, ხელვაჩაურელი რამაზ ზოიძეც (72), სადაც ირანელ ალი რეიზოლაჰ არსალანს გაეჯიბრება. ამ წყვილიდან მეორე წრეში გასულს მეტოქედ ფინელ ტონი ტაპიო ოჯალასა და უზბეკ არამ ვარდანიანს შორის მოგებული ეყოლება.

ახალგაზრდებში მსოფლიოს ჩემპიონი, ბათუმელი გელა ბოლქვაძე (82) საკვალიფიკაციო ეტაპიდან ისვენებს, მერვედფინალში კი ჩინელი ჰაიტაო ქიანისა და შვედი ოსკარ ალექსანდერ პატრიკ იოჰანსონის დუეტიდან უძლიერესი ეყოლება კონკურენტად.

საკვალიფიკაციო ეტაპიდან ჩემპიონატში სამტრედიელი ახალგაზრდების კიდევ ერთი მსოფლიოს ჩემპიონი გიორგი მელია (97), სადაც ყაზახ ოლჟას სირლიბაის დაეჭიდება, ხოლო მომდევნო ეტაპზე გასვლისას ბულგარელ სიმეონ სტანკოვიჩსა და ლიეტუველ რომას ფრიდრიკასს შორის უძლიერეს გაეჯიბრება.

ყოველდღიური სპორტული გაზეთი "ლელო"
878
მკითხველის კომენტარები / 0 /
მსგავსი ამბები
რუბრიკის სხვა სიახლეები
;