ბერძნულ-რომაული ხუთეული სოფიაში, მსოფლიოს ჩემპიონატზე

სოფიაში მიმდინარე ჭაბუკ მოჭიდავეთა მსოფლიოს ჩემპიონატში დღეს ბერძნულ-რომაული სტილით მოჭიდავეებიც ჩაებმებიან და წინასწარი ეტაპის შეხვედრებს ხუთი წონითი კატეგორიის წარმომადგენლები ჩაატარებენ. 

48 კილოგრამში თორნიკე შაინიძე მერვედფინალიდან დაიწყებს ასპარეზობას, სადაც უზბეკ კუვონჩბეკ ტოშნაზაროვს დაეჭიდება.

55 კილოგრამში ევროპის ჩემპიონატის მესამე პრიზიორი დიმიტრი ხაჩიძე გამოსვლას საკვალიფიკაციო ეტაპიდან დაიწყებს, სადაც იაპონელ რეი ცურუიას შეხვდება, ამათში მოგებულს კი მომდევნო წრეში მეტოქედ რუმინელ ადრიან დანიელ ანტონსა და უზბეკ აბრორ ატაბაევს შორის უძლიერესი ეყოლება. 
ჩემპიონატში საკვალიფიკაციო ეტაპიდან ჩაებმება აჩიკო ბოლქვაძეც (65) - ჩეხ ივო სვიგლერს გაეჯიბრება. ამათში მოგებულს მერვედფინალში უნგრელი ატილა ტამაშ ტოსმაგი ან თურქი ევროპის წლევანდელი ვიცე-ჩემპიონი მუსლიმ ბარგა შეხვდება. 

საკვალიფიკაციო წრეშია ბექა ქობულაძეც (80), სადაც ბელარუს დანილ კაბანეცს შეხვდება. თუ მოუგებს, მერე მოლდოველთა ევროპის ჩემპიონატის მეხუთეადგილოსან გაბრიელ ლუპასკოსა და ინდოელ როჰიტ როჰიტს შორის გამარჯვებულს გაეჯიბრება. 

დაბოლოს, ევროპის მძიმეწონოსანი ჩემპიონი მათე გოქაძე, ვინც მერვედფინალიდან ჩაებმება ჩემპიონატში და იქ ამერიკელი ბრექსტონ მაქსიმუს მიკესელის ძლევას შეეცდება. ამას თუ შეძლებს, მეოთხედფინალში თურქთა ევროპის მესამე პრიზიორ ომერ აიგულსა (ამას ევროპის ჩემპიონატზე ნახევარფინალში მოუგო) და ინდოელ სონუ სონუს დუეტიდან გასულს შეხვდება. 

ყოველდღიური სპორტული გაზეთი "ლელო"
961
მკითხველის კომენტარები / 0 /
მსგავსი ამბები
რუბრიკის სხვა სიახლეები
;