ბერძნულ-რომაული. 3 მედლის შანსი ევროპის ჩემპიონატიდან

სტამბოლში დაიწყო ევროპის ჩემპიონატი 23-წლამდელთა შორის და პირველივე დღეს ჩვენმა ნაკრებმა 3 მედლის დაუფლების შანსი მოიპოვა - 2 ოქრო და 1 ბრინჯაო. ხვალ ფინალურ ბლოკში ოქროს მედლისთვის ნუგზარ წურწუმია (55) და მძიმეწონოსანი ზვიად პატარიძე იჭიდავებენ, ბრინჯაოსთვის კი ლერი აბულაძე (63) იასპარეზებს.

პირველ დღეს პაექრობებში ჩვენი 5 მონაწილე ჩაერთო, ეს სამეული კი ნახევარფინალში გავიდა, სადაც მხოლოდ აბულაძეს მოეცარა ხელი. ისიც ძალზე დაძაბულ პაექრობაში რუმინელ მიჰაუ მიჰუტთან - 6:9.

დანარჩენები ფინალამდე წმინდა მოგებებით მივიდნენ. წურწუმიამ უნგრელ ბენცე კოვაჩს 10:2, უკრაინელ ვლადისლავ კოროშტელოვს კი 9:0 აჯობა. ნახევარფინალში სომეხი ნორაირ ჰაკოიანი ასევ 9:0 დაჯაბნა და ხვალ ფინალში თურქ ეკრემ ოზთურქს შეხვდება.

წურწუმიას მსგავსად, საჭიდაო სამყარო ერთხელაც გააოცა პატარიძემ, ვინც ნახევარფინალში რუმინელი კონსტანტინ ჰუტულეაგი 18 წამში დაამარცხა წმინდად - 8:0. საამისოდ მას მეტოქის ჩოქბჯენში ერთი ჩაყვანა და იქ ზედიზედ სამჯერ დატრიალება ეყო. მანამდე უნგრელ ფერენც ალმასისაც წმინდად აჯობა - 8:0, ხვალ კი ფინალში ასევ თურქ ოსმან ილდირიმს შეხვდება.

პირველ დღეს ჩვენი გუნდიდან ბაკურ გოგოლი (77) და გურამ ხეცურიანი (87) დამარცხდნენ.

1454
მკითხველის კომენტარები / 0 /
მსგავსი ამბები
რუბრიკის სხვა სიახლეები
;