[ბესიკ ჯანგავაძე იაპონიიდან] ვოლაბებთან ქარსა და წვიმაში: ბოლო მატჩი და ბოლო ბრძოლა

საქართველოს ნაკრები დღეს შიზუოკაში, „ეკოპა სთედიუმზე“ ჯგუფური ტურნირის ბოლო მატჩში ავსტრალიის ეროვნულ გუნდს დაუპირისპირდება. გუნდებმა, წესისამებრ, მომავალ ბრძოლის ველზე კაპიტნის ვარჯიში გამართეს. 

ავსტრალიის ნაკრების შემადგენლობაში ორი ცვლილება მოხდა. როგორც ჩანს, ტრავმებმა შეაწუხა და „ბორჯღალოსნების“ წინააღმდეგ ვერ ითამაშებს „ვოლაბების“ კაპიტანი მაიკ ჰუპერი, რომელიც მატჩის განაცხადში სათადარიგოთა შორის იყო. მას ახალგაზრდა ლოჰან სალაკაია-ლოტო შეცვლის.

ასევე თადარიგში იყო მეორეხაზელი ადამ კოულმენი, რომლის ნაცვლად მაიკ ჩეიკამ გამოცდილი რობ საიმონსი დააყენა. ამ უკანასკნელს ეროვნულ გუნდში 99 კეპი აქვს მოხვეჭილი და საქართველოს ნაკრებთან მატჩში ცენტურიონი გახდება. 

საქართველოს ნაკრებმა კი კაპიტნის ვარჯიში ჩვეულებრივ, ცვლილებების გარეშე ჩაატარა. 

მილტონ ჰეიგი, საქართველოს ნაკრების მთავარი მწვრთნელი: 
„შევარჩიეთ ერთ-ერთი ყველაზე გამოცდილი შემადგენლობა, რომლის დაყენებაც შეგვეძლო. დიდი გუნდების წინააღმდეგ მატჩში ეს მნიშვნელოვანია. გუნდში არიან ახალგაზრდებიც: გიორგი კვესელაძე, გელა აფრასიძე, ბექა საღინაძე. ისინი საჭირო ენერგიას მოიტანენ. თუმცა, სათადარიგო მოთამაშეების ჩათვლით, აქცენტი გამოცდილებაზე გავაკეთეთ. 

ლაშა ხმალაძემ წინა კვირას ფიჯის წინააღმდეგ დაიწყო თამაში და დაცვაში ძალიან კარგი იყო. გელა აფრასიძესგან ველით თამაშში იმის შემოტანას, რაც შესაძლოა მანამდე გვაკლდა. მას ბურთით სირბილი უყვარს, სწრაფია და მუდამ ყურადღების ქვეშ ექცევა, რამაც შესაძლოა სივრცეები გააჩინოს...
ავსტრალიის ნაკრები უმაღლესი დონის გუნდია, რომელმაც ოთხი წლის წინათ ახალ ზელანდიასთან ფინალში ითამაშა. ჩვენი მომავალი მეტოქე მუდამ მსოფლიოს საუკეთესო ოთხეულში ფიგურირებს. მათ აქვთ საჭირო უნარები, სისწრაფე, ჰყავთ ძალიან ძლიერი ნახევარმცველები და ბოლო ხანს შერკინებაც მნიშვნელოვნად გააუმჯობესეს.

ერთი სიტყვით, ძალიან კარგი გუნდია. თუმცა ჩვენთვის მათთან თამაში უკანასკნელი შესაძლებლობაა, შინ თავაწეულები რომ დავბრუნდეთ. ეს პირველი შემთხვევაა, როდესაც საქართველო ავსტრალიას ეთამაშება. ახლა, ჩვენზეა დამოკიდებული ამ შესაძლებლობას როგორ გამოვიყენებთ“.
აღსანიშნავია, რომ ავსტრალიელები, ისევე როგორც ფიჯელები, ჩვენი გუნდის შერკინების სიძლიერეს უსვამენ ხაზს და ამ კომპონენტში სათამაშოდ გულმოდგინეთ ემზადებიან. 

საიმონ რაივალუი, ავსტრალიის ნაკრების შერკინების მწვრთნელი: 
„ჩვენი მიზანია კვირიდან კვირამდე გავაუმჯობესოთ თამაშის ხარისხი. ერთ დროს საფრანგეთში ვმუშაობდი და ვიცნობ ქართველებს. ვიცი, საიდან აქვთ რაგბული სული, მათ უყვართ რკენა, მათ მოსწონთ მოლი. მოუთმენლად ველით ამ მატჩს. ეს დიდი გამოცდაა ჩვენთვის. ბიჭებმა ბეჯითად იშრომეს და, ვფიქრობ, კონკურენტუნარიანები ვართ“.

დევიდ პოკოქი, ავსტრალიის ნაკრების კაპიტანი: 
„ცხადია, მატჩების ვიდეოფირების ნაკლებობას არ განვიცდით. კამერები რვა რაკურსით იღებენ ყველა მატჩს. ჩვენ საშინაო დავალებაზე ბევრი ვიმუშავეთ, რადგან ყველა გუნდს სათანადოდ ვაფასებთ. ჩვენ კარგად მოვემზადეთ. ვიცით, რომ ფიზიკური ორთაბრძოლებით დატვირთული, მძიმე მატჩი იქნება.“ 

ქარიშხალი და მსოფლიოს თასი

მსოფლიოს თასზე, აქამდე წარმოუდგენელი რამ მოხდა. მსოფლიოს თასის საორგანიზაციო კომიტეტმა გამოაცხადა, რომ მოსალოდნელი ტაიფუნის გამო 12 ოქტომბერს გასამართავი ორი მატჩი: ახალი ზელანდია-იტალია და ინგლისი-საფრანგეთი გაუქმდა. მატჩის ანგარიში 0:0 ჩაიწერება და გუნდებს ორ-ორ ქულას მიაკუთვნებენ. ამით, სატურნირო ცხრილში არაფერი იცვლება. ცხადია, აღნიშნულ ფაქტს სხვადასხვა სახის კომენტარები მოჰყვა. 

იტალიის ნაკრების კაპიტანმა სერჯო პარისემ მკაცრად გააკრიტიკა „მსოფლოს რაგბის“ ხელმძღვანელობა: 

„ახალი ზელანდიის ნაკრებს ოთხი ან ხუთი ქულა ჰაერივით რომ სჭირდებოდეს, დარწმუნებული ვარ, მსოფლიოს რაგბი ჩვენს მატჩს არ გააუქმებდა. ვერაფრით ვხვდები, რატომ არ გვეძლევა შესაძლებლობა მსოფლიოს ერთ-ერთ უდიდეს გუნდს ვეთამაშოთ“. 

სამაგიეროდ, კმაყოფილებას ვერ მალავს ინგლისი ნაკრების ავსტრალიელი თავკაცი ედი ჯონსი:

„მივესალმები მსოფლიოს რაგბის გადაწყვეტილებას. მან ეს უსაფრთხოების მიზნით გააკეთა. ამის თაობაზე დღეს დილით შევიტყვეთ. იაპონელებს ერთი ანდაზა აქვთ - „შიკატა გა ნაი“, რაც ნიშნავს - „ვერაფერს იზამ“. ტაიფუნს ვერაფერს დაუპირისპირებ. 

ახლა, მოეთხედფინალის წინ, რომელშიც ავსტრალიის ნაკრების წინააღმდეგ ვითამაშებთ, მოსამზადებლად საკმაოდ დიდი დრო გვაქვს. აბა, ვინ იფიქრებდა, რომ ჯგუფურ ტურნირზე ორი შედარებით იოლი მატჩი (ტონგა, აშშ) და ერთი რთული შეხვედრა (არგენტინა) გვექნებოდა. მერე კი ორი კვირა მეოთხედფინალისთვის მოსამზადებლად. როგორც ჩანს ტაიფუნების ღმერთმა გაგვიღიმა“. 

ერთი სიტყვით, როგორც ამბობენ, საქართველოს ნაკრებს დღეს ავსტრალიასთან ქარსა და წვიმაში მოუწევს თამაში. შეხვედრა, თბილისის დროით 14 საათსა და 15 წუთზე დაიწყება. 

საქართველო-ავსტრალია 
საქართველო: 15. სოსო მათიაშვილი, 14. გიორგი კვესელაძე, 13. დავით კაჭარავა, 12. მერაბ შარიქაძე, 11. ალექსანდრე თოდუა, 10. ლაშა ხმალაძე, 9. გელა აფრასიძე. 1. მიხეილ ნარიაშვილი, 2. შალვა მამუკაშვილი, 3. ბექა გიგაშვილი, 4. გიორგი ნემსაძე, 5. კონსტანტინე მიქაუტაძე, 6. ბექა საღინაძე, 7. მამუკა გორგოძე, 8. ბექა გორგაძე. 

16. ჯაბა ბრეგვაძე, 17. გურამ გოგიჩაშვილი, 18. გიორგი მელიქიძე, 19. ოთარ გიორგაძე, 20. გიორგი თხილაიშვილი, 21. ვასილ ლობჟანიძე, 22. ლაშა მალაღურაძე, 23. თამაზ მჭედლიძე. 

ავსტრალია: 15. ქართლი ბილი, 14. ჯორდან პეტაია, 13. ჯეიმზ ოკონორი, 12. სამუ კერევი, 11. მარიკა კოროიბეტე, 10. მეთ ტოომუა, 9. ნიკ ვაითი. 1. სკოტ სიო, 2. ტოლუ ლატუ, 3. სეკოპე კეპუ, 4. იზააკ როდა, 5. რორი არნოლდი, 6. ჯეკ დემპსი, 7. დევიდ პოკოქი, 8. იზი ნაისარან
16. ჯორდან ულისე, 17. ჯეიმზ სლიპერი, 18. ტანიელა ტუპოუ, 19. რობ საიმონსი, 20. ლოხან სალაკაია-ლოტო, 21. ვილი გენია, 22. კრისტიან ლეალიიფანო, 23. დენ ჰაილეტ-პეტი 

მსოფლიოს თასი

სატუნრნირო მდგომარეობა 

A ჯგუფი
1. იაპონია - 14 ქულა, 2. ირლადია - 11, 3. შოტლანდია - 10, 4. სამოა - 5, 5. რუსეთი - 0

B ჯგუფი
1. ახალი ზლეანდია - 16 ქულა, 2. ს.აფრიკა - 15, 3. იტალია - 12, 4. ნამბია - 0, 5. კანადა - 0

C ჯგუფი
1. ინგლისი - 17 ქულა, 2. საფრანგეთი - 15, 3. არგენტრინა - 11, 4. ტონგა - 1, 5. აშშ - 0

D ჯგუფი
1. უელსი - 14 ქულა, 2. ავსტრალია - 11, 3. ფიჯი -7, 4. საქართველო - 5, 5. ურუგვაი – 4

ყოველდღიური სპორტული გაზეთი "ლელო"
1074
მკითხველის კომენტარები / 0 /
მსგავსი ამბები
რუბრიკის სხვა სიახლეები
;