[ბესიკ ჯანგავაძე იაპონიიდან] კანონზომიერება სადღაც გაქრა... 'ბორჯღალოსნები' აღდგენითი ვარჯიში

საქართველოს ნაკრები იაპონიის სამხრეთით, პატარა დაბა ომაეძაკიში დაბანაკდა. ამჯერად, „ბორჯღალოსნები“ მეგაპოლისებიდან მოშორებით, მშვიდ გარემოშო ცხოვრობენ.

სასტუმროდან რამდენიმე კილომეტრში კი ოკეანე ბობოქრობს. განსაკუთრებით მაშინ, როცა მოღრუბლულია და ქარიც საკმაოდ ძლიერი ქრის. 

ოამეძაკი შიზუოკას პრეფექტურას ეკუთვნის, სადაც ჩვენი გუნდის მორიგი მატჩის არენა „ეკოპა სთედიუმი“ მდებარეობს. სასტუმრო უწინდელებზე ბევრად ფეშენებელურია. უკანა ეზოში უზარმაზარი გოლფის მოედანია, სადაც ამჟამად რაღაც ტურნირი მიმდინარეობს. სავარაუდოდ, ვეტერან მეგოლფეებს ან ბიზნესმენებს შორის.

ფაქტია, გუშინ დილით ერთმანეთის მიყოლებით, ლიმუზინებით არა, მაგრამ ძვირფასი მანქანებით ასაკოვანი მამაკაცები გოლფის სრული აღჭურვილობით მობრძანდნენ და გოლფის სათამაშო მოედნისკენ გაემართნენ. 

ჩვენ მათ საცქერლად არ გვეცალა. „ბორჯღალოსნებმა“ მალე დაიკავეს თავიანთი ადგილები ავტობუსში და იქვე, ხუთი წუთის სავალზე მდებარე, ტყის მასივში მოქცეულ სავარჯიშო მოედნისკენ გაეშურნენ. 

იმთავითვე ვიტყვით, რომ ორდღიანი დასვენების შემდეგ, ეს პირველი, აღდგენითი ვარჯიში იყო ავსტრალიასთან მატჩისთვის მზადების პროგრამაში. თავდაპირველად გუნდმა ძალოსნობის ხელდახელ მოწყობილ დარბაზში ივარჯიშა. მერე დაცვის მწვრთნელმა ლევან მაისაშვილმა სხვადახვა სტატიკური მდგომარეობიდან ხაზის გადაწყობის რამდენიმე ვარიანტი გაიარა გუნდთან ერთად. 

გუნდთან ერთად არ უვარჯიშია ჯაბა ბრეგვაძეს. მას მარჯვენა მუხლი აწუხებს და ექიმის მეთვალყურეობის ქვეშ ცალკე ვარჯიშობდა. მაყურებლის როლში იყო მეორეხაზელი გიორგი ნემსაძეც, რომელიც წელის ტკივილმა შეაწუხა. თუმცა, სერიოზული არაფერია და, სავარაუდოდ, მატჩისთვის ის მწყობრში იქნება. თავდაპირველად ასევე ექიმის მეთვალყურეობით ვარჯიშობდნენ ბექა საღინაძე და ოთარ გიორგაძე. თუმცა, ისინი გუნდს მალევე შეუერთდნენ და საკმაოდ აქტიურებიც იყვნენ. 

ვარჯიში, როგორც უკვე ვთქვით, აღდგენითი იყო და სახალისო ხასიათს ატარებდა. გუნდმა ორმხრივი თაჩრაგბი ითამაშა და მორაგბეები ფიზიკურად გვარიანად დაიტვირთნენ. ვარჯიშის შემდეგ სასაუბრო თემა, ცხადია, ისევ ფიჯის ნაკრებთან მარცხი იყო.

თამაზ მჭედლიძე, საქართველოს ნაკრების შუამარბი:
„ფიჯისთან პირველი ტაიმი კარგი იყო. კარგად ვითამაშეთ როგორც დაცვაში, ისე შეტევაში. მეორე ტაიმში ეს ყველაფერი შეიცვალა. ვფიქრობთ, რომ ამის მიზეზი არის ინდივიდუალურად გაფუჭებული ბოჭვები, რაც ძალიან ბევრი იყო. არადა, ფიჯისთან ერთ ბოჭვასაც თუ გააფუჭებ, მერე მისი გამოსწორება ძალიან ძნელია... 

ფიჯისთან მატჩის შემდეგ ორი დღე დასვენება გვქონდა, რაც ძირითადად ძალების აღდგენას და მატჩის ანალიზს დავუთმეთ. დღეიდან, უკვე ავსტრალიის ნაკრებთან სათამაშოდ ვემზადებით. ვნახავთ ამ გუნდის ვიდეო ანალიზს, დავაკვირდებით მათ დადებით და სუსტ მხარეებს. ვეცდებით, ჩვენი სათამაშო პლუსები უფრო მკვეთრად დავუპირისპიროთ.“

ალექსანდრე თოდუა, საქართველოს ნაკრების გარემარბი: 
„ორდღიანი დასვენების შემდეგ ვარჯიში განვაახლეთ. მწვრთნელებმა გვითხრეს, რაც შეიძლება მალე დავივიწყოთ ის, რაც მოხდა და მთელი კონცენტრაცია მომდევნო მატჩისკენ გადავიტანოთ...

ფიჯისთან ნაჩვენები შედეგით ყველა იმედგაცრუებულები ვართ. ყველა, მთელი ქვეყანა, მეგობრები ოჯახის წევრები. ერთი გზა გვაქვს, ვაჟკაცურად გადავიტანოთ ეს ყველაფერი და განვაგრძოთ წინსვლა...

ჩვენ ყველა თამაშზე მოსაგებად გავდივართ. ამჯერადაც, მაქსიმალურად მოვემზადებით და ვეცდებით, ის, რაც მთელი მოსამზადებელი პერიოდის მანძილზე გავიარეთ, მოედანზე გადავიტანოთ...“ 

ახლა, ჩვენს ჯგუფში შექმნილ სატურნირო მდგომაეობაზეც ვთქვათ: პირველ ადგილზე ავსტრალიის ნაკრებია 11 ქულით. თუ 9 ოქტომბერს უელსმა ფიჯის ნაკრების დამარცხება შეძლო, ავსტრალია და, ცხადია, უელსიც პლეი ოფში გავლენ. შესაბამისად, „ვოლაბებს“ ჩვენთან თამაშში მოტივაცია დაკარგული ექნებათ. რადგან უელსს კიდევ ერთი მატჩი აქვს სათამაშო ურუგვაის ნაკრებთან და დიდი ალბათობით, ჯგუფში პირველ ადგილს დაიკავებს. თუმცა, როგორც უკვე ვთქვი, ამისთვის „წითელმა ურჩხულებმა“ „მფრინავი ფიჯელები“ უნდა „გადაყლაპონ.“ ეს კი საქართველოს ნაკრებს თეორიულ შანსს აძლევს. თუ ავსტრალიის დამარცხებას შევძლებთ, ჯგუფურ ეტაპს მესამე ადგილზე დავასრულებთ. 

რა მდგომარეობაა სხვა ჯგუფებში? ყველაზე დაძაბული ვითარება A ჯგუფშია. ირლანდიამ სამოას საპრემიო ქულით უნდა მოუგოს და პლეი ოფში გადის. იაპონიის ნაკრები კი, მიუხედავად იმისა, რომ სამი მატჩი მოიგო, თუ შოტლანიასთან დამარცხდა და თანაც „სკოტებმა“ საპრემიო ქულა მიითვალეს, პლეი ოფის მიღმა შეიძლება დარჩეს. ერთი სიტყვით, შოტლანდიისა და იაპონიის ნაკრებების დაპირისპირება ჯგუფური ტურნირის ყველაზე ბოლო მატჩია და ერთ-ერთი მეოთხედფინალისტის ვინაობა სწორედ ამ შეხვედრაში გაირკვევა. იქამდე კი „ნარშავები“ შიზუოკაში რუსეთის ნაკრებს ერკინებიან. 

B ჯგუფში ყველაფერი გარკვეულია. პირველი ახალი ზელანდიაა, მეორე სამხრეთ აფრიკა. მესამეზე იტალია გავიდა და მომდევნო მსოფლიოს თასის საგზურიც დაიბევა. 

C ჯგუფიდან პლეი ოფში, როგორც მოსალოდნელი იყო, ინგლისი და საფრანგეთი გავიდა. მესამეზე, სავარაუდოდ, არგენტინა იქნება, რომელსაც აშშ-ის დამარცხება, წესით, არ უნდა გაუჭირდეს. ეს კი მას 2023 წლის საფრანგეთის საგზურს მისცემს. 

ერთი სიტყვით, ბრძოლა ბოლომდე ორ, A და D ჯგუფებში გრძელდება. თუმცა, აქვე უნდა ითქვას ერთი ტენდენციის შესახებ, რაც ფაქტობრივად შეჯიბრების დასაწყისშივე გამოიკვეთა. 2015 წლის მსოფლიოს თასთან შედარებით, წლეულს პირველ და მეორე დონის ქვეყნებს შორის სხვაობა კიდევ უფრო გაიზარდა.

თითქმის ყველა მეორე დონის გუნდი მატჩის დასაწყისშივე პირწმინდად დამარცხდა, რაც ოთხი წლის წინათ ინგლისში არ ხდებოდა. იქ, მეორე დონის ქვეყნების წინააღმდეგობას ბობოლები მხოლოდ დასკვნით 20 წუთში ტეხდნენ, რაც კანონზომიერებად მიიჩნეოდა. ახლა, ეს კანონზომიერება სადღაც გაქრა. რაზეც, ვფიქრობთ, „მსოფლიოს რაგბის“ სერიოზული დაფიქრება მართებს. 

მსოფლიო თასი

ახ. ზელანდია-ნამიბია 71:9 
საფრანგეთი-ტონგა 23:21

სატურნირო მდგომარეობა

A ჯგუფი
1. იაპონია - 14 ქულა, 2. ირლანდია - 11, 3. შოტლანდია - 5, 4. სამოა - 5, 4. რუსეთი - 0. 

B ჯგუფი
1. ახალი ზელანდია - 14 ქულა, 2. სამხრეთ აფრიკა - 10, 3. იტალია - 10, 4. კანადა - 0, 5. ნამიბია - 0

C ჯგუფი
1. ინგლისი - 15 ქულა, 2. საფრანგეთი - 13, 3. არგენტინა - 6, 4. ტონგა - 1, 5. აშშ - 0

D ჯგუფი
1. ავსტრალია - 11 ქულა, 2. უელსი - 9, 3. ფიჯი - 7, 4. საქართველო - 5, 5. ურუგვაი - 4

11 ოქტომბერი
საქართველო-ავსტრალია

ყოველდღიური სპორტული გაზეთი "ლელო"
2118
მკითხველის კომენტარები / 0 /
მსგავსი ამბები
რუბრიკის სხვა სიახლეები
;