[ბესიკ ჯანგავაძე იაპონიიდან] საქართველო არავის ჰბაძავს - '80 წუთი დაგვრჩა საიმისოდ, რომ ვითარება გამოვასწოროთ, რათა ჩვენ და მათ თავი ამაყად ვიგრძნოთ'

საქართველოს ნაკრები 11 ოქტომბერს შიზუოკაში, „ეკოპა სთედიუმზე“ ჯგუფური ტურნირის ბოლო მატჩს გამართავს. „ბორჯღალოსნების“ მეტოქე ავსტრალიის ნაკრებია. ჩვენი გუნდის მთავარმა მწვრთნელმა მილტონ ჰეიგმა „ვოლაბების“ წინააღმდეგ საასპარეზოდ საბრძოლო რაზმი დაასახელა. 

ძირითად შემადგენლობაში ორი ცვლილებაა. მესამე ხაზში გიორგი თხილაიშვილმა თადარიგში გადაინაცვლა, მისი პოზიცია კი ბექა საღინაძემ დაიკავა. თადარიგშია ცხრა ნომერი ვასილ ლობჟანიძე. მის ნაცვლად ძირითაში თამაშს გელა აფრასიძე დაიწყებს. 

ორი ცვლილებაა სათადარიგოთა შორისაც. შერკინების ბურჯის, ლევან ჩილაჩავას ნაცვლად გიორგი მელიქიძე ითამაშებს. გარემარბი მირიან მოდებაძის ადგილს კი თამაზ მჭედლიძე დაიკავებს. ეს შეხვედრა ბოლო იქნება „ბორჯღალოსნების“ ახალზელანდიელი თავკაცისთვის მილტონ ჰეიგისთვის. ეროვნულ ნაკრებში ბოლო მატჩს გამართავს მეორეხაზელი გიორგი ნემსაძე. 

აი, რა თქვა საქართველოს ნაკრებთან დაპირისპირების თაობაზე ვეტერანმა ავსტრალიელმა, პირველხაზელმა სეკოპე კეპუმ:

„უდავოა, საქართველოს ნაკრებს ძლიერი მორკინალები და ერთ-ერთი საუკეთესო შერკინება ჰყავს. თავისი, გამორჩეული სტილი აქვთ და არავის ბაძავენ. ჩვენ ვნახეთ მათი თამაშის ანალიზი უელსისა და ფიჯის ნაკრებებთან. გარწმუნებთ, თუ საქართველოს შერკინებაში დაუთმე, საქმე ცუდად წაგივა. ამიტომ, ორი დღეა შერკინებაზე ვვარჯიშობთ და კიდევ გვაქვს დრო მომავალი მატჩისთვის, რომელიც იოლი სულაც არ იქნება, სათანადოდ მოვემზადოთ“. 
სოსო მათიაშვილი, საქართველოს ნაკრების ფულბეკი:

„მსოფლიოს თასზე მეოთხე მატჩს ვითამაშებთ. ყველაზე მნიშვნელოვანი ფიჯისთან თამაში იყო, რადგან გამარჯვებას ვგეგმავდით. ამჯერად, ყველაფერს ვიღონებთ, დავამტკიცოთ, რომ უკეთ თამაში შეგვიძლია. უკეთესი გუნდი ვართ, ვიდრე ფიჯისთან მატჩში ვიყავით.“ 

ჯაბა ბრეგვაძე, საქართველოს ნაკრების შერკინების კვაჭი:
„ფიჯისთან წაგების შემდეგ იმედგაცრუებულები და დაღონებულნი ვართ. ბევრი ვილაპარაკეთ ამ მარცხის შემდეგ. ვიცით, რას გრძნობენ ჩვენი ქომაგები, ოჯახის წევრები. 80 წუთი დაგვრჩა საიმისოდ, რომ ვითარება გამოვასწოროთ, რათა ჩვენ და მათ თავი ამაყად ვიგრძნოთ. ავსტრალისათან მატჩი ეს ჩვენი ბოლო შანსია“.

ლაშა მალაღურაძე, საქართველოს ნაკრების შუამარბი:
„ჩემთვის ეს ბოლო მსოფლიოს თასია. გვინდოდა ორი მატჩი მოგვეგო. წინ ბოლო თამაში გვაქვს. ავსტრალია დიდი გუნდია. ჩვენ კი, მთავარია კარგი რაგბი ვითამაშოთ და იქ გამოჩნდება. მატჩის დროს ყველაფერი ხდება.“ 

ამასობაში ჩვენს ჯგუფში პლეი ოფში გასული ორივე გუნდის ვინაობა გაირკვა. უელსის ნაკრებმა ფიჯის ეროვნულ გუნდს 29:17 სძლია და მომდევნო ეტაპზე თამაშის უფლება მიიღო. მეოთხედფინალში ითამაშებს ავსტრალიის ნაკრებიც, მიუხედავად იმისა, როგორ დასრულდება „ვოლაბებისა“ და „ბორჯღალოსნების“ დაპირისპირება. 

აღსანიშნავია, რომ ფიჯელები მე-20 წუთამდე 10:0 იგებდნენ. თამაშის დასრულებამდე 20 წუთით ადრე კი ანგარიში საყაიმო იყო - 17:17. „წითელმა ურჩხულებმა“ მეტოქე სწორედ ბოლო 20 წუთში გატეხეს. 

პლეი ოფში ითამაშებენ ასევე ახალი ზელანდიის, სამხრეთ აფრიკის, ინგლისისა და საფრანგეთის ნაკრებები. თუმცა, მეოთხედფინალში როგორ დაწყვილდებიან გუნდები, ამას ბოლო მატჩები გაარკვევს. ყველაზე საინტერესო და დაძაბული, იაპონიისა და შოტლანდიის ნაკრებების დაპირისპირება იქნება. ამ გუნდებიდან ერთ-ერთი, სავარაუდოდ, პლეი ოფს მიღმა დარჩება. შოტლანდიელებმა გუშინ მეორე შემადგენლობით რუსეთის ნაკრებს მოუგო დიდი ანგარიშით - 61:0. 

შეგახსენებთ, რომ საქართველოსა და ავსტრალიის ნაკრებებს შორის მატჩი „ეკოპა სთედიუმზე“ ხვალ, თბილისის დროით 14 საათსა და 15 წუთზე დაიწყება. 

საქართველო-ავსტრალია 
საქართველო: 15. სოსო მათიაშვილი, 14. გიორგი კვესელაძე, 13. დავით კაჭარავა, 12. მერაბ შარიქაძე, 11. ალექსანდრე თოდუა, 10. ლაშა ხმალაძე, 9. გელა აფრასიძე. 1. მიხეილ ნარიაშვილი, 2. შალვა მამუკაშვილი, 3. ბექა გიგაშვილი, 4. გიორგი ნემსაძე, 5. კონსტანტინე მიქაუტაძე, 6. ბექა საღინაძე, 7. მამუკა გორგოძე, 8. ბექა გორგაძე. 

16. ჯაბა ბრეგვაძე, 17. გურამ გოგიჩაშვილი, 18. გიორგი მელიქიძე, 19. ოთარ გიორგაძე, 20. გიორგი თხილაიშვილი, 21. ვასილ ლობჟანიძე, 22. ლაშა მალაღურაძე, 23. თამაზ მჭედლიძე. 

ავსტრალია: 15. ქართლი ბილი, 14. ჯორდან პეტაია, 13. ჯეიმზ ოკონორი, 12. სამუ კერევი, 11. მარიკა კოროიბეტე, 10. მეთ ტოომუა, 9. ნიკ ვაითი. 1. სკოტ სიო, 2. ტოლუ ლატუ, 3. სეკოპე კეპუ, 4. იზააკ როდა, 5. რორი არნოლდი, 6. ჯეკ დემპსი, 7. დევიდ პოკოქი, 8. იზი ნაისარან
16. ჯორდან ულისე, 17. ჯეიმზ სლიპერი, 18. ტანიელა ტუპოუ, 19. ადამ კოლემანი, 20. მაიკლ ჰუპერი, 21. ვილი გენია, 22. კრისტიან ლეალიიფანო, 23. დენ ჰაილეტ-პეტი 

მსოფლიოს თასი
არგენტინა-აშშ 47:17
შოტლანდია-რუსეთი 61:0
უელსი-ფიჯი 29:17

სატუნრნირო მდგომარეობა 

A ჯგუფი
1. იაპონია - 14 ქულა, 2. ირლადია - 11, 3. შოტლანდია - 10, 4. სამოა - 5, 5. რუსეთი - 0

B ჯგუფი
1. ს.აფრიკა - 15 ქულა, 2. ახ.ზელანდია - 14, 3. იტალია - 10, 4. ნამბია - 0, 5. კანადა - 0

C ჯგუფი
1. ინგლისი - 15 ქულა, 2. საფრანგეთი - 13, 3. არგენტრინა - 11, 4. ტონგა - 1, 5. აშშ - 0

D ჯგუფი
1. უელსი - 14 ქულა, 2. ავსტრალია - 11, 3. ფიჯი -7, 4. საქართველო - 5, 5. ურუგვაი – 4

ყოველდღიური სპორტული გაზეთი "ლელო"
1318
მკითხველის კომენტარები / 0 /
მსგავსი ამბები
რუბრიკის სხვა სიახლეები
;