[ბესიკ ჯანგავაძე იაპონიიდან] 11 ცვლილება ფიჯისთან - ყველაზე მნიშვნელოვანი მატჩი ფიჯისთან

საქართველოს ნაკრები ხვალ, ოსაკაში მსოფლიოს თასის გათამაშებაში ყველაზე მნიშვნელოვან მატჩს გამართავს - მეტოქე ფიჯის ნაკრებია, რომლის სიძლიერეზე ახლა არ შევჩერდებით. 

„ბორჯღალოსნების“ მთავარმა მწვრთნელმა მილტონ ჰეიგმა გუნდის საბრძოლო შემადგენლობა დაასახელა, რომელშიც ურუგვაისთან მატჩთან შედარებით ძირითად შემადგენლობაში 11 ცვლილება განახორციელა. ჰეიგის არჩევანი გასაგებია. მრისხანე მეტოქესთან ის ძირითადად გამოცდილ მორაგბეებს დაეყრდნო. 

ფიჯისთან „ბორჯღალოსნებს“ ჩვეულ, შუამარბის პოზიციაზე მერაბ შარიქაძე დაუბრუნდება. ის ცენტრში დავით კაჭარავასთან ერთად ითამაშებს. სასტარტო შემადგენლობაში ბრუნდება ცხრა ნომერი ვასილ ლობჟანიძეც, პირველად მიმდინარე მსოფლიო თასზე მგეზავად ლაშა ხმალაძე ითამაშებს. მან უელსთან შეცვლაზე, ხოლო ურუგვაისთან სასტარტოში ფულბეკად ითამაშა. ამჯამად ფულბეკის პოზიციას ისევ სოსო მათიაშვილი დაიკავებს.

ზედიზედ მესამე თამაშში ძირითად შემადგენლობაშია გიორგი კვესელაძე. ის ისევ გარემარბად ითამაშებს. მეორე ფრთაზე გამოცდილი ალექსანდრე თოდუა იქნება. აღსანიშნავია, რომ ორივემ ურუგვაის დალელოვება შეძლო.

პირველ ხაზში ბრუნდებიან მიხეილ ნარიაშვილი, შალვა მამუკაშვილი და ბექა გიგაშვილი. მეორე ხაზში, ზედიზედ მესამე თამაშია ძირითადში ადგილს ინარჩუნებს კონსტანტინე მიქაუტაძე, რომელსაც ამჯერად კვლავ გიორგი ნემსაძე შეუწყვილდება. მესამე ხაზში, ფლანკერებად ბრუნდებიან გიორგი თხილაიშვილი და მამუკა გორგოძე, ხოლო რვა ნომრის პოზიციას ბექა გორგაძე დაიკავებს.

მილტონ ჰეიგი, საქართველოს ნაკრების მთავარი მწვრთნელი: 
„შემიძლია დარწმუნებით გითხრათ, რომ ოპტიმალური შემადგენლობა დავაყენეთ. ჩვენ განხილული გვაქვს ფიჯის ყველა მატჩი. ვიცით, რომ ფიჯის უძლიერესი უკანა ხაზი ჰყავს. თუმცა ჩვენი უკანა ხაზიც კარგად გამოიყურება. ასე რომ, მოედანზე კარგი ბრძოლა იქნება.“

მერაბ შარიქაძე, საქართველოს ნაკრების კაპიტანი: 
„ჯობდა ტრავმა საერთოდ არ მქონოდა, თუმცა რას ვიზამთ ასე მოხდა. ახლა თავს კარგად ვგრძნობ და შემიძლია დარწმუნებით გითხრათ, რომ მოედანზე მაქსიმალურად დავიხარჯები“. 

გიორგი თხილაიშვილი, საქართველოს ნაკრები მესამეხაზელი: 
„მოედანზე მხოლოდ მოსაგებად გავდივართ. აქამდე მსოფლიო თასების ისტორიაში ჩვენთვის ყველაზე დიდი გამარჯვება ტონგას წინააღმდეგ იყო. ახლა, თუ ფიჯის დავამარცხებთ, ეს მოგება ყველაფერს გადაფარავს. მიყვარს კუნძულელებთან თამაში, კარგად გამომდის კიდევაც, ტონგასთან გამარჯვების მომტანი ლელო გავიტანე. ამჯერადაც მაქსიმალურად დავიხარჯები იმისთვის, რომ საქართველოს ნაკრებს გამარჯვება მოვუტანოთ.“

დავით კაჭარავა, საქართველოს ნაკრების შუამარბი:
„ფიჯი ინდივიდუალურად მოთამაშე ერთ-ერთი საუკეთესო ნაკრებია. ჩვენ მათი თითოეული მატჩი განვიხილეთ და მზად ვართ მათთან შესარკინებლად. ვფიქრობ, ეს მატჩი ჩვენთვის დადებითად დასრულდება. ფიჯისთან ნათამაშები გვაქვს, ვიცით მათი შესაძლებლობები. ფიჯელებს ბურთი ნაკლებად უნდა მივცეთ და ხაზი მაქსიმალურად სწრაფად უნდა ავწიოთ, რათა შეცდომები დავაშვებინოთ.“

შეგახსენებთ, რომ თამაში 3 ოქტომბერს, თბილისის დროით 9 საათსა და 15 წუთზე დაიწყება. 

საქართველო-ფიჯი 
საქართველო: 15. იოსებ მათიაშვილი, 14. გიორგი კვესელაძე, 13. დავით კაჭარავა, 12. მერაბ შარიქაძე, 11. ალექსანდრე თოდუა, 10. ლაშა ხმალაძე, 9. ვასილ ლობჟანიძე; 1. მიხეილ ნარიაშვილი, 2. შალვა მამუკაშვილი, 3. ბექა გიგაშვილი, 4. გიორგი ნემსაძე, 5. კოტე მიქაუტაძე, 6. გიორგი თხილაიშვილი, 7. მამუკა გორგოძე, 8. ბექა გორგაძე.
16. ჯაბა ბრეგვაძე, 17 გურამ გოგიჩაშვილი, 18. ლევან ჩილაჩავა, 19. ოთარ გიორგაძე, 20. ბექა საღინაძე, 21. გელა აფრასიძე, 22. ლაშა მალაღურაძე, 23. მირიან მოდებაძე.

ფიჯი: 15. კინი მურიმურივალუ, 14. ჯოსუა ტუისოვა, 13. ვაისეა ნაიაკალევუ, 12. ლევანი ბოტია, 11. სემი რადრადრა, 10. ბენ ვოლავოლა, 9. ფრენკ ლომანი; 1. კემპესე მააფუ, 2. სამუელ მატავესი, 3. მანასა საულო, 4. ტევიტა კავუბატი, 5. ლეონე ნაკარავა, 6. დომინიკო ვაკანიბუროტუ, 7. სემი კუნატანი, 8. პესელი იატო
16. ტუვერე ვუგაკოტო, 17. ერონი მავი, 18. პენი რავაი, 19. აპისალომე რატუნიარავა, 20. ვილიამე მატა, 21. ნიკოლა მატავალუ, 22. ჯალე ვატუბუა, 23. ჯოშ მატავესი

ყოველდღიური სპორტული გაზეთი "ლელო"
559
მკითხველის კომენტარები / 0 /
მსგავსი ამბები
რუბრიკის სხვა სიახლეები
;