ბექა ბურჯანაძე: ძნელია, როცა გრძნობ - ნაკრებს სჭირდები და ვერ ეხმარები

ივნისის ბოლოს და ივლისის დასაწყისში საქართველოს ნაკრები მსოფლიოს ჩემპიონატის შესარჩევზე სერბეთსა და ავსტრიას უმასპინძლებს. ამ მატჩებზე ბევრი რამაა დამოკიდებული და ქართველი გულშემატკივარი განსაკუთრებით ემზადება საქომაგოდ.

ხშირად კითხულობენ ტრავმირებულ კალათბურთელებზე, მათ შორის ბექა ბურჯანაძეზე, რომელმაც 2016-17 წლების სეზონი ესპანეთის ჩემპიონატში ეფექტურად დაიწყო, თუმცა მუხლის ტკივილის გამო "ანდორას" პლეი ოფში "რეალის" წინააღმდეგ ვერ დაეხმარა.

იგი ზაფხულში ნაკრებს შეკრებაზე გაჰყვა, გუნდთან ერთად აგვისტოს შუამდე იყო, მაგრამ გაირკვა, რომ ევრობასკეტი 2017-ზე ჩვენს გუნდს ბურჯანაძის გარეშე მოუწევდა თამაში.

ბექა საოპერაციო იყო. გაიკეთა კიდეც ოპერაცია და თებერვალში ველოდით მის დაბრუნებას, თუმცა ვარჯიში ჯერ ვერ დაიწყო. ბექას ანდორაში დავუკავშირდით და, პირველ რიგში, ჯანმრთელობის მდგომარეობაზე ვკითხეთ.

- ოპერაციის შემდეგ რეაბილიტაციის პროცესი გეგმიურად მიმდინარეობდა, თუმცა იმავე მუხლზე მეორე მხარეს აღმოჩნდა დაზიანება, შემაწუხა და ახლა მისი მკურნალობაა საჭირო.

- ოპერაციის გარეშე ჩადგება მწყობრში?

- ექიმების ჩარევა სჭირდება, რასაც ოპერაციას ვერ დავარქმევთ. საამისოდ ვიტორიაში უნდა გავემგზავრო, სადაც მუხლის ოპერაცია გავიკეთე. კარგი ექიმები არიან. საერთო გათვლებით კიდევ ორი თვე უნდა ვიმკურნალო...

- ამჟამად ანდორაში ხარ?

- დიახ, აქ გავდივარ რეაბილიტაციას.

- გუნდი წლეულსაც შედეგიანად თამაშობს...

- ამჟამად მე-7 ადგილზე ვართ, თუმცა პლეი ოფში გასვლა რომ გავინაღდოთ უახლოეს მატჩებში წარმატებით თამაში გვჭირდება. გვაქვს ორი რთული შეხვედრა "უნიკახასთან" და "ვალენსიასთან". საინტერესო იქნებოდა გიორგი შერმადინის გუნდთან თამაშის ცოცხლად ხილვა, მაგრამ "ანდორას" მალაგაში ვერ გავყვები.

- "უნიკახა" ანდორაში რომ ჩამოვიდა, შერმადინს როგორ შეხვდნენ?

- დიდი დახვედრა მოუწყვეს, აქ, "ანდორას" მაისურით შერმადინის თამაში ყველას ძალიან მოსწონდა და დიდ პატივს სცემს. თუმცა შინ მისი გუნდი გაწიბილებული გავუშვით. მთავარია, რომ გიორგი კარგად მოერგო "უნიკახას", ტრავმის გამო გარკვეული დრო კი გაუცდა, მაგრამ მოედანზე დაბრუნების შემდეგ პირველივე მატჩი მშვენივრად ითამაშა. პლეი ოფის წინ ეს მნიშვნელოვანია.

- თორნიკე შენგელიასაც შეხვდი...

- იგი სეზონს უმაღლეს დონეზე ატარებს. აქ ყველა სერიოზულად ემზადება როგორც ინდივიდუალურად შენგელიას, ასევე მისი "ბასკონიას" წინააღმდეგ სათამაშოდ. ჩემი აზრით, იგი ესპანეთის ჩემპიონატის საუკეთესო კალათბურთელის ტიტულს იმსახურებს. იმედი მაქვს, რომ ხმების რაოდენობით ყველას აჯობებს.

- ნაკრების თამაშებს ტელევიზიით ადევნებდი თვალს...

- გულდასაწყვეტია, როცა გუნდს სჭირდები და ვერ ეხმარები. თუმცა სპორტი ტრავმის გარეშე არ არსებობს. ცუდად დაემთხვა - ევროლიგელების არგამოშვებას რამდენიმე კალათბურთელის ტრავმა მოჰყვა. ამის მიუხედავად საქართველოს ნაკრებმა საინტერესო კალათბურთი უჩვენა და ავსტრიაში ეფექტურადაც მოიგო. გერმანიასთან კი, ასაკობრივ ნაკრებებში ასპარეზობისას ხშირად მითამაშია და ყოველთვის ძლიერი გუნდი ჰყავს. ასე იყო ამჯერადაც, მიუხედავად იმისა, რომ ევროლიგელები არ ჰყავდა. ძალიან მაინტერესებს მსოფლიოს შესარჩევის ბოლო ორი შეხვედრა, განსაკუთრებით სერბეთთან მატჩი...

545
მკითხველის კომენტარები / 0 /
მსგავსი ამბები
რუბრიკის სხვა სიახლეები