ბექა ვაჩიბერაძე ლატვიაში რიგა-ს ღირსებას დაიცავს

ბექა ვაჩიბერაძე "რიგას ფს"-ის ფეხბურთელია. 21 წლის საყრდენი ნახევარმცველი ლატვიაში ორიოდე დღის წინ გაემგზავრა, სამედიცინო შემოწმება გაიარა და ვირსლიგის (უმაღლესი ლიგა) კლუბთან კონტრაქტი გააფორმა.

როგორც ვაჩიბერაძის ოჯახში გვითხრეს, ხელშეკრულება ერთწლიანია და იქ რამდენიმე პუნქტი უშუალოდ ფეხბურთელის მოთხოვნით ჩაიწერა - ნახევარი წლის განმავლობაში ქართველით რომელიმე კლუბი თუ დაინტერესდება, ტრანსფერის გამოსასყიდად "რიგას ფს"-ის მხოლოდ 50 ათას ევროს გადაუხდის და ფეხბურთელს წაიყვანს.

კლუბი კი იტოვებს უფლებას, სეზონის დასრულების შემდეგ ევროპალიგის საგზურს თუ მოიპოვებს, ხელშეკრულება გაახანგრძლივოს, ოღონდ, მხოლოდ გაუმჯობესებული პირობებით.

ოჯახშივე გვითხრეს, რომ ვაჩიბერაძეს ჰქონდა შანსი, წასულიყო ჰოლანდიის "ეინდჰოვენში", ბელგიის "ზულტე ვარეგემსა" და ბერძნულ "ოლიმპიაკოსში". ეს უკანასკნელი ახლაც აქტიურობდა. მაგრამ ბექამ მოულოდნელად არჩევანი ლატვიურ კლუბზე გააკეთა.

როგორც გვითხრეს, მან "რიგას ფს"-ის მთავარი მწვრთნელისგან, ანდრეის კალნინშისგან მიიღო გარანტია, რომ მუდმივი სათამაშო დრო ექნებოდა. ის

ვაჩიბერაძეს ესპანეთიდან წამოსვლის შემდეგაც, ჯერ კიდევ ზაფხულში დაუკავშირდა, რადგან დონეცკის "შახტარიდან" იცნობდა და მისი ტრანსფერით დაინტერესებული იყო, ბექამ კი ბევრად სახელოვან ევროპულ კლუბებში სკამზე ჯდომას ვირსლიგაში თამაში ამჯობინა.

მას წინ აქვს ბევრი ქართველის მაგალითი, რომლებიც ევროპულ ლიგებში არ ათამაშეს.

შეგახსენებთ, რომ ქუთაისში დაბადებულ-გაზრდილი ვაჩიბერაძე 15 წლიდან უკრაინაში თამაშობდა. დონეცკის "შახტარის" 19-წლამდელთა გუნდის რიგებში 2015 წელს უეფას ახალგაზრდული ლიგის ფინალშიც ითამაშა.

იყო უკრაინის 17, 19 და 21-წლამდელთა ნაკრებების წევრი. 2015-17 წლებში ესპანეთში, კერძოდ, "რეალ ბეტისის" დუბლშემადგენლობაში გამოდიოდა, ზაფხულიდან კი უგუნდოდ იყო.

შეგახსენებთ, რომ ის უკრაინის 21-წლამდელთა ნაკრების ყოფილი კაპიტანია. თუმცა ნოემბერში საქართველოს სახელით თამაშის სურვილი გამოთქვა და 12 დეკემბერს მშობლიური ქვეყნის მოქალაქეობაც აღიდგინა.

"რიგას ფს"-მა 2017 წელს ლატვიის ჩემპიონატში ევროპალიგის საგზურისთვის ბოლო ტურამდე იბრძოლა - 35 ქულა დააგროვა, როგორც "ვენტსპილსმა", მაგრამ, ურთიერთშეხვედრებში უარესი შედეგის გამო, ერთი საფეხურით დაბლა, მე-5 ადგილზე აღმოჩნდა, ხოლო მეორე-მესამეადგილოსნებს, "ლიეპაიასა" და "რიგას", მხოლოდ 2 ქულით ჩამორჩა.

ამ გუნდში ორი ქართველია: საქართველოს ნაკრების კანდიდატი, 25 წლის ლაშა შერგელაშვილი, რომელიც იქ შარშან "სამტრედიადან" გადავიდა, მეორე კი თბილისის "ლოკომოტივის" ყოფილი საყრდენი ნახევარმცველი, 30 წლის გიორგი დიაკვნიშვილი, ვინც ამ გუნდში 2016 წლიდან გამოდის.

ამ ტრანსფერიდან ასეთი სურათი გამოიკვეთა - ვაჩიბერაძე ლატვიაში ფორმის აღსადგენად მიდის და იმედი აქვს, რომ ნახევარი წლის შემდეგ სხვა კლუბში გადავა. თუ სად, ეს ჯერ საკითხავია.

ესპანური "რეალ ბეტისიდან" ზაფხულში წამოსულმა და უთამაშებელმა ბევრად უკეთეს შემოთავაზებებზე უარი ამიტომაც თქვა. იმედია, ვაჩიბერაძის გათვლა გაამართლებს და ლატვიაში ფორმას აღიდგენს.

ყოველდღიური სპორტული გაზეთი "ლელო"
1557
მკითხველის კომენტარები / 0 /
მსგავსი ამბები
რუბრიკის სხვა სიახლეები
;