ბექა მიქელთაძე: ქეცბაია მირეკავდა,  პრობლემის მოგვარებაშიც  დამეხმარა... მაგრამ  მერე რაღაც შეიცვალა 

ბექა მიქელთაძემ “ლელოსთან” დაადასტურა, რომ ფამაგუსტის “ანორთოსისიდან” წამოვიდა.

21 წლის ფორვარდი ამ გუნდში 2018 წელს “რუსთავიდან” გადავიდა, თუმცა გულშემატკივრებმა თბილისის “დინამოდან” გაიცნეს, რომლის ფორმითაც 2015-17 წლებში თამაშობდა, ხოლო 2017 წელს ეროვნული ლიგის საუკეთესო ბომბარდირებს შორის მოხვდა.

საქართველოს ახალგაზრდული ნაკრების ყოფილ კაპიტანთან საუბრისას ამ მოულოდნელი ნაბიჯის მიზეზით დავინტერესდით, რადგან ფამაგუსტელთა კლუბი თემურ ქეცბაიამ რომ ჩაიბარა, მას შემდეგ გუნდში ქართულ დიასპორის მომრავლებას ველოდით...

- “ანორთოსისიდან” თქვენი წამოსვლა მოულოდნელი აღმოჩნდა...

- რაღა დაგიმალოთ და, ჩემთვისაც მოულოდნელი იყო. კლუბში ხელმძღვანელობა შეიცვალა, მთავარ მწვრთნელად თემურ ქეცბაია მოვიდა და მე წამოსვლა მომიხდა.

- რა იყო მიზეზი?

- ეს ჩემთვისაც ბოლომდე გაუგებარია.

- გამოდის, რომ თქვენი დატოვება ქეცბაიას არ უნდოდა?

- არა მგონია. თემური მირეკავდა, ჩემი ამბით ინტერესდებოდა და როცა ფინანსური პრობლემები გაჩნდა, ერთი თვის ხელფასის აღებაში დამეხმარა... მაგრამ მერე რაღაც შეიცვალა. 

- კვიპროსული მედიის ცნობით, პირობების გაუმჯობესება მოითხოვეთ და რადგან ვერ შეთანხმდით, კლუბი ამიტომ დატოვეთ...

- არაფერი მსგავსი არ მომითხოვია! პირიქით, რა ხელფასიც მქონდა, ჩემთვის, 21 წლის ფეხბურთელისთვის, ისიც მისაღები იყო. ქეცბაია რომ დაინიშნა, გამიხარდა, ვფიქრობდი, მასთან პროფესიონალად ჩამოვყალიბდებოდი... ფულზე მეტად ეს მაფიქრებდა და არა მგონია, ჩემი წამოსვლა მისი ინიციატივა ყოფილიყო... მაგრამ ახლა ამაზე ბევრი ფიქრი აღარ ღირს და არც ვნანობ, რადგან კვიპროსისდან წამოსვლის შემდეგ ბევრი რამ შეიცვალა. 

- კონკრეტულად?

- უპირველესად ის, რომ ახალ მენეჯერთან დავიწყე თანამშრომლობა. მან მოლაპარაკებები სწრაფად დაიწყო და უკეთესი ვარიანტები გამომიჩნდა. მითხრა, რომ ჩემით ოთხი რუსული და სამი ევროპული კლუბია დაინტერესებული. 

- რომელიმე ვარიანტი კონკრეტულია?

- უახლოეს პერიოდში გაირკვევა, სად ვითამაშებ.

- ახლა თავისუფალი აგენტი ხართ თუ დაინტერესებულმა კლუბმა “ანორთოსისს” კომპენსაცია უნდა გადაუხდოს?

- არანაირი კომპენსაცია გადასახდელი არ არის! მე თავისუფალი აგენტი ვარ.

- კვიპროსში კარიერა მაინცდამაინც წარმატებით ვერ აგეწყოთ...

- იმიტომ, რომ ფლანგის შემტევ ნახევარმცველად მათამაშებდნენ, რაც ჩემი პოზიცია არ არის. თბილისის “დინამოდან” წამოსვლის ერთ-ერთი მიზეზი ესეც იყო, ცენტრალური თავდამსხმელი ვარ და თავს კარგად სწორედ ამ ამპლუაში ვგრძნობ. 

- თბილისის “დინამოზე” დღემდე ნაწყენი ხართ?

- პირიქით, არ დაგიმალავთ, უსიამოვნო განცდა დამრჩა, გუნდიდან უხერხულად რომ წამოვედი. ეს სხვანაირად უნდა მომხდარიყო. უმადური ნამდვილად არ ვარ - “დინამომ” ბევრი მომცა და ამისთვის რომან ფიფიასა და კლუბს საჯაროდ მადლობას ვუხდი. და თუ ჩემი წამოსვლით უხერხულობა გამოვიწვიე, ამას ნამდვილად განვიცდი. 

ყოველდღიური სპორტული გაზეთი "ლელო"
2156
მკითხველის კომენტარები / 0 /
მსგავსი ამბები
რუბრიკის სხვა სიახლეები
;