ბექჰემებს პრობლემები აქვთ - ეპილეფსია, ობსესიურ-კომპულსური აშლილობა, მაზოჰიზმი...

ბექჰემებმა შექმნეს იდეალური და წარმატებული ოჯახის მაგალითი. დევიდი - ყოფილი ფეხბურთელი, რომელმაც უდიდესი კაპიტალი ქარიზმატული გარეგნობით დააგროვა. ვიქტორია - პოპულარული ექს-მომღერალი, რომელმაც სარფიანად დააბანდა ფული მოდის ბიზნესში. ბავშვები - პოტენციური ვარსკვლავები მომგებიანი გვარით. ისინი მთელი ოჯახით რეგულარულად ესწრებიან სხვადასხვა ღონისძიებას, ტურნირებზე მხარს უჭერენ ერთმანეთს და ინტერვიუებისას კომპლიმენტებს არ იშურებენ ერთმანეთის მისამართით.

მაგრამ პოპულარობისა და სიმდიდრის უკან სერიოზული პრობლემები იმალება. ვარსკვლავური წყვილი ფსიქიკური დაავადებებით იტანჯება. მათმა მემკვიდრეებმა კი მიიღეს არა მხოლოდ სტატუსი და ფული, მაგრამ პათოლოგიები მშობლებისგან.

დევიდ ბექჰემმა ამის შესახებ აღიარება 2006 წელს გააკეთა ITV1-ის არხზე. მაშინ ფეხბურთელმა მოყვა, რომ ობსესიურ-კომპულსური აშლილობა აქვს - ეს არის მდგომარეობა, როცა ადამიანი აკვიატებული აზრების მსხვერპლი ხდება. „ყველა ნივთს სწორ ხაზზე ვაწყობ, ან ვაკვირდები იმას, რომ მათი რაოდენობა ლუწი იყოს. თუ მე Pepsi-ის ქილებს მაცივარში ერთ რიგად ვაწყობ და ერთი ზედმეტი აღმოჩნდება, მას კარადაში მივუჩენ ადგილს“, - აღწერა ბექჰემმა ობსესიურ-კომპულსური აშლილობის სიმპტომები.

„რეალში“ ის არ ამხელდა ავადმყოფობას, მაგრამ „მანჩესტერ იუნაიტედში“ პარტნიორებმა იცოდნენ დიაგნოზის შესახებ. „იუნაიტედის“ სქელკანიანმა ბიჭებმა მაშინვე აქციეს ნევროზი ხუმრობის ობიექტად. შეკრებებზე პოლ სქოულზი, რაიან გიგზი და ძმები ნევილები მეგობრული საუბრის საბაბით სტუმრობდნენ დევიდს ნომერში. და თანაგუნდელების წასვლის შემდეგ, ბექჰემმა ჯერ ყურადღება მიაქცია მიმოფანტულ ჭუჭყიან ჟურნალებს, შემდეგ შეამჩნია არეულობა კარადებსა და სხვა ოთახებში. „ისინი ჩემს გარდერობში იქექებოდნენ, ამიტომაც შარვლები და ფეხსაცმელები ყველგან იყო მიმოფანტული. ასე ხუმრობდნენ ისინი“, - იხსენებდა ბექჰემი.

აშლილობის დროებით დასამორჩილებლად, დევიდი იყენებდა Lego-ს კონსტრუქტორებს, მაგიდის თამაშებს ან კულინარიას - ამგვარი საქმიანობები ეხმარებოდა კონცენტრაციასა და მოდუნებაში. მსოფლიოს 2006 წლის ჩემპიონატის წინ, ფეხბურთელმა დაიჩივლა, რომ არ შეუძლია ავადმყოფობის დამარცხება და მკურნალობა დაიწყო. ინგლისის კიდევ ერთი ლეგენდა პოლ გასკოინი ასევე შეეჩეხა ამ ავადმყოფობას უკვე მოწიფულ ასაკში და მისგან მედიკამენტებით მკურნალობდა. აბებმა ის ბოლომდე ვერ მოარჩინეს, მხოლოდ შეამცირეს აკვიატებული გამეორებები: ათის ნაცვლად, გასკოინი ნივთებს სამჯერ ეხებოდა.

გერმანიის მსოფლიოს ჩემპიონატის წინ, იმავე ინტერვიუში ბექჰემმა ახსენა ტატუ-დამოკიდებულება. ის სიამოვნებას იღებდა კანში შეყვანილი ნემსისგან. 44 წლის ასაკისთვის დევიდმა 50 ტატუ დააგროვა და გაჩერებას არ აპირებს. ის უკვე თავს მიადგა.

ცოლი იცინის დევიდის უცნაურობებზე, როცა ყოფილი ფეხბურთელი არჩევს ტანსაცმელს სახლის ავეჯის ფერების გათვალისწინებით ან ყიდულობს Calvin Klein-ის 30 ტრუსს ყოველ ორ კვირაში. მაგრამ ვიქტორიასაც განუვითარდა აკვიატებული მდგომარეობის ერთ-ერთი ფორმა. YouTube-ის პირდაპირ ეთერში მან განაცხადა: „მე მიზოფობი ვარ. ყველაფერი, რაც ჩემს გარშემოა, სტერილურად სუფთა უნდა იყოს. მე ყველაფრის დეზინფიცირებას ვახდენ. ამას ჩემი ქმარი ჭკუიდან გადაჰყავს. მაგრამ მთელი პარადოქსი იმაში მდგომარეობს, რომ ვერ ვიტან წესრიგის დამყარებას, დევიდი კი ამაზე, უბრალოდ, შეშლილია. მას აგიჟებს ის უწესრიგობა, რომელსაც მუდმივად ვქმნი გარშემო“.

ერთი თვის შემდეგ, ვიქტორიამ ყველა გააკვირვა კიდევ ერთი აღიარებით. მან თავად დაუსვა საკუთარ თავს დისლექსიის დიაგნოზი - ეს არის კითხვის დარღვევა, რომელსაც შეიძლება თან უძღოდეს წერისა და დათვლის პრობლემები. Spice Girls-ის სოლისტმა აღიარა, რომ იგივე თავისებურება გენეტიკურად გადაედო მის ოთხივე შვილს.

დისლექსია ხშირად ართულებს სწავლის პროცესს, რადგან ჭირს ინფორმაციის ათვისება. როგორც ჩანს, უფროს ვაჟ ბრუკლინს შეხვდა ეს და მიატოვა კოლეჯის პირველი კურსი. ოფიციალური მიზეზი ასე ჟღერდა: ცნობილმა ფოტოგრაფმა ჯონ რანკინმა შესთავაზა უმცროს ბექჰემს ასისტენტის როლი, რასაც ის მაშინვე დათანხმდა. გაზეთ The Sun-ის ინსაიდერების სიტყვებით, ბრუკლინი აქაც ჩაფლავდა - გადაღების საბაზო ცოდნა საერთოდ არ გააჩნდა.

თუმცა, ბავშვების მეტყველების პრობლემებზე ასევე შეიძლებოდა გავლენა მოეხდინა აღზრდის არასწორ მეთოდებს. პაპარაცებმა 2015 წელს დააფიქსირეს დევიდი და ოთხი წლის ქალიშვილი ჰარპერი. გოგონას პირში საწოვარა ედო. ჩვეულებრივ, ბავშვები ორი წლის ასაკიდან აგდებენ საწოვარას - მისი შემდგომი გამოყენება მეტყველების განვითარების დარღვევასა და კბილების დაზიანებას იწვევს.

ITV-სა და BBC Radio-ს წამყვანი სიუ ატკინსი 15 წელიწადზე მეტია დაკავებულია აღზრდის საკითხებით და კომენტარი გაუკეთა ბექჰემების შეცდომას: „ეს შეიძლება იყოს ბოლო ბავშვის სინდრომი, რადგან ჰარპერი ოჯახში ყველაზე უმცროსია. თუ ბავშვი ძალიან დიდი ხანი ხმარობს საწოვარას, რთულია მისთვის ამ ნივთის წართმევა. გარდა ამისა, ეს იოლი ვარიანტია მშობლებისთვის, რადგან საწოვარათი ბავშვები მშვიდად და ჩუმად არიან. ეს იგივეა, რომ მათ iPad მისცეთ. ზოგიერთი მშობელი იყენებს საწოვარას, როგორც იოლ ხერხს ბავშვის დასაწყნარებლად და ის ხელს უშლის მეტყველების განვითარებას, რადგან ისინი უნდა ლაპარაკობდნენ. ეს აყოვნებს სიტყვიერი მარაგის შეგროვებას“.

ყველაზე ცუდი დიაგნოზი დაუსვეს შუათანა რომეოს. 2006 წელს, ჟურნალისტებმა ვიქტორია ბავშვთან ერთად გამოიჭირეს და ფოტოები გადაუღეს იმ დროს, როცა ბიჭს ეპილეფტიკური შეტევა ჰქონდა. „თავი დაანებეთ! მას ეპილეფსია აქვს! გეყოფათ ამის კეთება!“ - უყვიროდა ვიქტორია ბექჰემი ფოტოგრაფებს. ამ ინციდენტის შემდეგ, Splash News-ის ხელმძღვანელმა კევინ სმიტმა პირობა დადო, რომ მისი თანამშრომლები არასოდეს დააყენებენ რისკის ქვეშ ბიჭის სიცოცხლეს.

ეპილეფსიისას აუცილებელია წამლების მუდმივი მიღება და მშვიდი ცხოვრების რითმი, მაგრამ ბიჭმა მაინც იპოვნა ადგილი სპორტისთვის. 2015 წელს, რომეომ ლონდონის ბავშვთა მარათონი გაირბინა, სადაც მას ოჯახმა დაუჭირა მხარი მაისურებით, რომლებზეც ეწერა - Team Romeo. გარდა ამისა, მან დატოვა „არსენალის“ აკადემია ჩოგბურთის სასარგებლოდ. მსოფლიოს ყოფილი მესამე ჩოგანი და „დიდი სლემის“ ტურნირების სამგზის ნახევარფინალისტი გრიგორ დიმიტროვი მის მაღალ პოტენციალს აღნიშნავს: „როცა ლონდონში ჩამოვდივარ, ყოველთვის ვცდილობ ვიპოვნო დრო მასთან ვარჯიშებისთვის. ის საკმაოდ გონებამახვილი და ნიჭიერია. ამიტომაც, თუ რომეო გააგრძელებს მუშაობას, შორს წავა. მე ვაფასებ საქმისადმი ერთგულებას“.

ბექჰემები იშვიათად აფიშირებენ ოჯახურ პრობლემებს, მაგრამ ისინი შეიძლება კარგ მაგალითად იქცნენ მსგავსი დიაგნოზის ადამიანებისთვის. ფული ყოველთვის არ არის აბსოლუტური ჯანმრთელობის გარანტია, სამაგიეროდ, მხარდაჭერა, ურთიერთგაგება და საყვარელი საქმით კეთება - სირთულეებთან წარმატებით გამკლავების გარანტიაა.

928
მკითხველის კომენტარები / 0 /
მსგავსი ამბები
რუბრიკის სხვა სიახლეები
;