'ბიოლოგიური ბომბის' ამბავი. ვალენსია ატალანტას მწვრთნელის პასუხისმგებლობის დაყენებას ითხოვს

დიდი აჟიოტაჟი მოჰყვა "ატალანტას" მწვრთნელ ჯან პიერო გასპერინის ინტერვიუს, სადაც მან თქვა, რომ "ვალენსიასთან" ჩემპიონთა ლიგის საპასუხო მატჩზე გამგზავრების წინ კორონავირუსის სიმპტომებს გრძნობდა, თუმცა ამის თაობაზე არავისთვის უთქვამს.

გასპერინის ინტერვიუს უმალ გამოეხმაურნენ ესპანეთში და შესაბამისი წერილით მიმართეს უეფას. მოკლედ, ლამისაა, ესპანეთში კორონავირუსის მასობრივად გავრცელება გასპერინის დაჰბრალდეს. ისე კი, ფაქტია, რომ ერთ ინფიცირებულს უამრავი ადამიანის დასნებოვნება შეუძლია...

სხვათა შორის, "ატალანტა"-"ვალენსიას" მატჩზე პირველად არ ატეხილა აჟიოტაჟი. ამ გუნდებს შორის პირველ თამაშს, რომელიც მილანში გაიმართა, ბერგამოდან ჩასული 40 ათასი გულშემატკივარი დაესწრო. ვარაუდობენ, რომ ეს მატჩი იყო ერთგვარი "ბიოლოგიური ბომბი", რომელმაც უდიდესი როლი ითამაშა იტალიის ჩრდილოეთ რეგიონში კორონავირუსის კატასტროფულ გავრცელებაში.

ცნობილია, რომ სწორედ ლომბარდიის რეგიონის ეს ორი ქალაქი (ბერგამო და მილანი) დაზარალდა განსაკუთრებულად. რაც შეეხება გასპერინის, მის პასუხისმგებლობაზე ვალენსიის რეგიონის ჯანდაცვის ხელმძღვანელმა ანა ბორსელომ ილაპარაკა:

"ეს არის გაუგონარი უპასუხისმგებლობა. მან იცოდა, რომ ავად იყო და მაინც ამხელა რისკზე წავიდა. ის არ უნდა ჩამოსულიყო ვალენსიაში. ამიტომაც ჩატარდა ეს მატჩი უმაყურებლოდ, რადგან "მესტალია" დიდი რისკის არეალი იყო", - ამბობს ბორსელო, "ვალენსია" კი ელოდება უეფასა და იტალიის ჯანდაცვის სამინისტროს რეაქციას.

924
მკითხველის კომენტარები / 0 /
მსგავსი ამბები
რუბრიკის სხვა სიახლეები
;