ბიჭი ფერმერთა ოჯახიდან, რომელმაც მოხიბლა ფერგი ვინ, სად და როგორ აღმოაჩინა მაურისიო პოჩეტინო...

...ხორხე გრიფას ბუენოს აირესში დიდი სასახლე აქვს. ეს 83 წლის კაცი ლეგენდარული პიროვნებაა არგენტინული ფეხბურთისთვის. ის საკუთარ სახლში ინახავს თავისი წარსული დიდების ყველა ამსახველ ექსპონატს...

...ერთ-ერთი ფოტო თარიღდება 1959 წლით. მაშინ გრიფა “კოპა ამერიკაზე” თამაშობდა არგენტინის ნაკრების შემადგენლობაში. და მაინც, გრიფას დიდება უკავშირდება არა იმდენად მის საფეხბურთო კარიერას, რამდენადაც სელექციონერის საოცარ ნიჭს.

სწორედ მან აღმოუჩინა არგენტინას ისეთი ფეხბურთელები, როგორებიც არიან გაბრიელ ბატისტუტა, კარლოს ტევესი, ხორხე ვალდანო და სხვა ვარსკვლავები.

80-იან წლებში გრიფამ დიდებული დუეტი შექმნა მარსელო ბიელსასთან ერთად “ნიუელს ოლდ ბოიზში”. ახლა ბიელსა “ლიდსის” დამრიგებელია, მაშინ კი “ნიუელსის” საფეხბურთო აკადემიის დირექტორი გახლდათ. სწორედ გრიფასა და ბიელსას სახელებს უკავშირდება მაურისიო პოჩეტინოს აღმოჩენა.

“ჩვენ ჩავედით პატარა ქალაქში, რომელსაც ჰქვია სანტა იზაბელი, - ყვება გრიფა, - სამწვრთნელო კურსებს ვატარებდით და მივიღეთ ინფორმაცია, რომ იყო იქ პატარა ბიჭი, სახელად მაურისიო პოჩეტინო. მაშინ ბიელსას ვუთხარი, რომ ჯერ არ დავბრუნდებოდით როსარიოში, რადგან უნდა ჩავსულიყავით იქ, სადაც პოჩეტინოების ოჯახი ცხოვრობდა.

მაურისიოს მამა, ექტორ პოჩეტინო, ფერმერი გახლდათ. როცა ადგილზე მივედით, ღამის 2 საათი იყო. ფანჯარაზე დავაკაკუნე. გამოიხედა პოჩეტინოს დედამ. მან მიცნო და შინ შეგვიპატიჟა. გავაბით საუბარი. ისეთ თემებზეც ვილაპარაკეთ, რომელიც საერთოდ არ მაინტერესებდა, მაგრამ რას ვიზამდი - პირდაპირ ფეხბურთზე ლაპარაკს ვერ დავიწყებდი”...

მოკლედ, ვიზიტის შედეგი გახლდათ ის, რომ გრიფამ და ბიელსამ ნახეს საწოლ ოთახში 14 წლის ბიჭი - მაურისიო. დაინახა თუ არა გრიფამ მისი ფეხები, ეგრევე წამოიძახა: “რა სასწაული ფეხებია! მომავალი დიდი ფეხბურთელის ფეხები!”.

ვინ წარმოიდგენდა მაშინ, რომ ის პატარა ბიჭი, რომელსაც ეძინა ძალიან მოკრძალებულ ოთახში, მსოფლიოს ერთ-ერთი საუკეთესო მწვრთნელი გახდებოდა. მის გადაბირებას მოისურვებდნენ “რეალი” და “მანჩესტერ იუნაიტედი”, ის კი წარმატებით იმუშავებდა “ტოტენჰემში”, რომელიც მისი დიდი მეცადინეობით ბოლო წლებში პრემიერლიგის გრანდებს გაუტოლდა...

პოჩეტინო “იუნაიტედში” - ეს სავსებით რეალურია. ის ლონდონურ კლუბში 2014 წლიდან მუშაობს და მას მერე პერმანენტულად ისმის ხმები “წითელი ეშმაკების” დაინტერესების თაობაზე. ახლა ეს ინტერესი კიდევ უფრო მძაფრია. ბევრი მიიჩნევს, რომ ზაფხულში სწორედ პოჩეტინო შეცვლის “მანჩესტერის” მთავარი მწვრთნელის პოსტზე ოლე გუნარ სოლსკიაერს.

ამ აზრზეა სერ ალექს ფერგიუსონიც და ასე ფიქრობს “იუნაიტედის” ვიცე-თავმჯდომარე და ფაქტობრივი მმართველი - ედ ვუდვორდიც. მათ უნდათ, რომ “მანჩესტერ იუნაიტედმა” ძველებურად შემტევი ფეხბურთი ითამაშოს და გაახაროს გულშემატკივარი, რომელიც ოდითგანვე ასეთ ფეხბურთსაა შეჩვეული.

არავინ იცის, როგორ განვითარდებოდა პოჩეტინოს საფეხბურთო სვე, მშობლებს რომ არ დაეჯერებინათ გრიფასა ფა ბიელსასთვის და პოჩეტინო არ წასულიყო მარ დელ პლატაში გამართულ საერთაშორისო ტურნირზე.

“გუნდი, რომელშიც პოჩეტინო თამაშობდა, ჩემპიონი გახდა, - ეს ისევ გრიფას სიტყვებია, - მამამისი მარ დელ პლატაში 3 დღის შემდეგ ჩამოვიდა. მე მას გავუწოდე ქაღალდი. ეს იყო კონტრაქტი. ვუთხარი, რომ ეს ხელშეკრულება მისმა შვილმა ალალად დაიმსახურა. 14 წლის პოჩეტინო გადავიდა “ნიუელს ოლდ ბოიზში”. მან დატოვა ოჯახი და 1978 წელს, ორ ძმასთან ერთად, პატარა შავ-თეთრ ტელევიზორში უყურა მსოფლიოს ჩემპიონატზე არგენტინის ეროვნული ნაკრების ტრიუმფს...

როსარიო დიდი ინდუსტრიული ქალაქია. იქ ბევრი მიგრანტი ცხოვრობს. თავის დროზე, პოჩეტინოების ოჯახიც იტალიიდან ჩამოვიდა არგენტინაში. ეს იყო 1954 წელს. თავდაპირველად, მაურისიო ჩაირიცხა “როსარიოს” ახალგაზრდულ აკადემიაში. ის იქ შეხვდა ვინმე მიკი დ’აგოსტინოს. ბიჭები დამეგობრდნენ. დღეს დ’აგოსტინო “ტოტენჰემში” პოჩეტინოს ასისტენტია.

არგენტინის ნაკრების ყოფილმა მცველმა რობერტო სენსინიმ პოჩეტინოსთან ერთად ითამაშა მსოფლიოს 2002 წლის ჩემპიონატზე. ის “ოლდ ბოიზშიც” მაურისიოს თანაგუნდელი გახლდათ, “ჩვენ იდეალურ პირობებში სულაც არ ვიყავით. იყო ხოლმე შემთხვევები, როცა უხეშ საწოლებზე გვიწევდა დაძინება, გვციოდა ან გვშიოდა”.

“ჩვენ ვცხოვრობდით სახლში, სადაც იყო ერთი დიდი მისაღები და ერთი საწოლი ოთახი, რომელშიც ყველას გვეძინა, - იხსენებს პოჩეტინო, - იყო ხოლმე შემთხვევები, როცა 30 ფეხბურთელიც კი გროვდებოდა, მაგრამ ჩვენ ეს გულს არ გვიტეხდა, რადგან ძალიან გვინდოდა ფეხბურთის თამაში”.

16 წლის პოჩეტინო “ნიუელსის” მთავარ გუნდში გადავიდა. მაშინ კლუბს აღმავლობის ხანა ედგა - ბოლო 14 წელიწადში მოიგო პირველი საშინაო ტიტული და მიაღწია “კოპა ლიბერტადორესის” ფინალს.

ყველას ახსოვს პირველი წვრთნები. მაშინ პოჩეტინო 17 წლის იყო და თამაში უწევდა ერთ-ერთ ყველაზე სახელგანთქმულ (მთავარ მწვრთნელად იმუშავა არგენტინის ნაკრებსა და “ბარსელონაში”) პროფესიონალ ტატა მარტინოსთან, ვინც პოჩეტინოზე მთელი 10 წლით უფროსი გახლდათ.

ერთ ეპიზოდში მოხდა შეჯახება. “მე შენ მოგკლავ, ბავშვო”! - უთხრა მაშინ მარტინომ პოჩეტინოს. მწვრთნელმა კი ახალგაზრდა ფეხბურთელი გაკიცხა - გუნდის ლიდერს ხისტად როგორ ეთამაშეო! მარტინომ იქვე დასძინა - 3 მეტრის დისტანციაზე არასოდეს მომიახლოვდე, თორემ რაც მოგივა, შენს თავს დააბრალეო!..

“მე კარგად მახსოვს ის ეპიზოდი. განსაკუთრებული არაფერი ყოფილა, მაგრამ ძალიან კარგად გამოჩნდა პოჩეტინოს ხასიათი. იმთავითვე ჩანდა, რომ ის არავისთვის არაფრის დამთმობი არ იყო”, - იგონებს სენსინი.

მწვრთნელ ხოსე იუდიკას მოეწონა ახალგაზრდა ფეხბურთელი და მთავარ გუნდში აიყვანა. პოჩეტინო “ოლდ ბოიზისთვის” უმნიშვნელოვანესი მოთამაშე გახდა მას შემდეგ, რაც 1990 წელს ეს არგენტინული კლუბი მარსელო ბიელსამ ჩაიბარა.

სწორედ ბიელსამ შეაყვარა პოჩეტინოს 4-3-3 ტაქტიკური სქემა, რომელსაც ის დღესაც წარმატებით იყენებს “ტოტენჰემში”:

“როცა ბიელსამ ჩაიბარა გუნდი, მან მითხრა, რომ უნდა ეყიდა ორი ცენტრალური მცველი. მე მას პირდაპირ ვუთხარი, რომ ამის არანაირი აუცილებლობა არ არსებობდა, რადგან ჩვენ გვყავდა ფერნანდო გამბოა და პოჩეტინო”, - იხსენებს გრიფა.

“პოჩეტინომ არაერთ მწვრთნელთან იმუშავა და მათგან ბევრი რამ ისწავლა, მაგრამ, ჩემი აზრით, მარსელო ბიელსამ ყველაზე დიდი კვალი დაამჩნია მას. ბიელსას ხელში პოჩეტინომ ფეხბურთის ყველა საიდუმლო გაიგო”, - ამბობს სენსინი.

ერთხელაც, ბიელსასა და პოჩეტინოს შორის კინაღამ შავმა კატამ გაირბინა. ეს იყო მაშინ, როცა მაურისიო “ესპანიოლში” წავიდა სათამაშოდ. ბიელსა მის დარჩენას ამაოდ ითხოვდა. მარსელომ მაინც აპატია შეგირდს და წაიყვანა 2002 წლის მუნდიალზე. იქ პოჩეტინომ ვერ გაიბრწყინა. “ჩვენ ჩავყვინთეთ”, - ამბობს მაურისიო და თან იხსენებს ინგლისთან მატჩს.

პოჩეტინოს ევროპული კარიერა “ესპანიოლში” დაიწყო. მერე იყო “პარი სენ-ჟერმენი” და “ბორდო”, რასაც მოჰყვა დაბრუნება “ესპანიოლში”. პოჩეტინომ სწორედ ბარსელონაში გადაწყვიტა დასახლება.

პოჩეტინო ღრმად მორწმუნე კათოლიკეა. რელიგიურობა მას დედისგან მოსდგამს. ქალბატონი ამელია ბავშვობიდანვე აჩვევდა ღმერთის სიყვარულს და მისდამი პატივისცემას. მაურისიოსთვის უცხოა რაიმე საქმის სანახევროდ კეთება. ის ყოველთვის ბოლომდე ითხოვს დახარჯვას ფეხბურთელებისგან და თავადაც ასევე იქცევა.

მის წარმატებაში დიდია ასისტენტების დამსახურება. “მას დიდებული სამწვრთნელო შტაბი ჰყავს”, - ამბობს “ტოტენჰემის” ფანების კიდევ ერთი კერპი არგენტინელი ოსვალდო (ოზი) არდილესი.

“ის დიდებული მწვრთნელია. კლუბში პოჩეტინო ყველას აბედნიერებს. შეიძლება, ჩვენ შორის არის განსხვავება. მე ქალაქელი ბიჭი ვარ და არ შემიძლია, ასეთივე წარმატებით ვილაპარაკო ცხენებზე, მაგრამ ჩვენ ორივენი ვსაუბრობთ ფეხბურთის ენაზე”, - ამთავრებს არდილესი.

ყოველდღიური სპორტული გაზეთი "ლელო"
989
მკითხველის კომენტარები / 0 /
მსგავსი ამბები
რუბრიკის სხვა სიახლეები
;