ბოისა, სანიკიძე, კეცელიდისი... ნაცნობი 'არისი'

ჩემპიონთა ლიგაზე საკალათბურთო "დინამოს" მეტოქეა ბერძნული საკალათბურთო კლუბი "არისი".

წილისყრის შემდეგ მთავარი შეკითხვა ასეთია - რა შანსი გვაქვს ბერძნებთან? პასუხის გაცემა ნაადრევია, ჯერ არც "დინამოს" შემადგენლობა ვიცით, არც "არისის". როდესაც გვეცოდინება 12-12 კალათბურთელი, მაშინ უკვე კონკრეტულად შეგვეძლება შანსებზე მსჯელობა.

მანამდე მხოლოდ გუნდის ისტორიისა და საქართველოსთან კავშირის შესახებ დავწეროთ. ელინებში ორი გრანდია - "ოლიმპიაკოსი" და "პანათინაიკოსი". მათ შემდეგ მოდის სამი, მდიდარი ტრადიციების მქონე გუნდი: "არისი", აეკ, პაოკ.

ფინანსურად სტაბილური გარემო არც საბერძნეთშია, შესაბამისად მყარად მხოლოდ "ოლიმპიაკოსი" და "პანათინაიკოსი" დგანან, დანარჩენებს აქვთ ჩავარდნები და შემდეგ აღმავლობები.

ჩემპიონთა ლიგა: \'დინამოს\' მეტოქე ბერძნული \'არისია\'

შესაძლოა, ჩავარდნად მივიჩნიოთ "არისის" მიერ ჩატარებული განვლილი სეზონიც. ამ გუნდმა ხომ საბერძნეთის ჩემპიონატის პლეი ოფში ვერ გააღწია - მეცხრე ადგილზე გავიდა, ორი მოგება დააკლდა მეოთხედფინალამდე. არადა, სალონიკელებს გამოცდილი სპეციალისტი პანაიოტის იანაკისი წვრთნიდა. ასისტენტად ქართველთათვის კარგად ნაცნობი გიორგიოს კეცელიდისი ჰყავდა. შეგახსენებთ, რომ გიორგიოსი საქართველოში 6 წლის წინათ მუშაობდა - "შსს აკადემიასთან" ერთად საქართველოს ჩემპიონი გახდა.

"არისს" საქართველოსთან მხოლოდ კეცელიდისი როდი აკავშირებს - სალონიკის გუნდს 2007-08 წლების სეზონში საქართველოს ნაკრების ყოფილი მწვრთნელი გორდონ ჰერბერტი ხელმძღვანელობდა. სხვათა შორის, 2007 წლის ზაფხულში ჩვენს ეროვნულ გუნდთან ერთად შეკრება დაწყებული ჰქონდა, "არისისგან" წინადადება რომ მიიღო და საქართველოს ნაკრები ბერძნულ კლუბზე გაცვალა.

ის სეზონი ვლადიმერ ბოისამ რუსულ "პრიმორიეში" დაიწყო, თებერვალში კი ჰერბერტის მიწვევით სწორედ "არისში" გადავიდა. 2007-08 წლების სეზონის დასრულებასთან ერთად ბოისამაც დატოვა გუნდი და ჰერბერტმაც.

მანამდე, 2006-07 წლების სეზონში სალონიკის გუნდს საქართველოს ნაკრების ახლანდელი დამრიგებელი ილიას ზუროსი წვრთნიდა.

2016 წელს, მას შემდეგ, რაც ვიქტორ სანიკიძემ მონტენეგროსთან შორეული სამქულიანით საქართველოს ნაკრები ევროპის ჩემპიონატზე მეოთხედ გაიყვანა, "არისთან" გააფორმა ხელშეკრულება. უკვე საკმაოდ გამოცდილი ქართველი გუნდს კარგად მოერგო, ლიდერად იქცა, გვეგონა, რომ წარმატებული სეზონი უნდა ჰქონოდა... მაგრამ საბერძნეთის ჩემპიონატის პირველსავე ტურში მუხლის მყესი გაუწყდა და ოპერაციის შემდეგ თამაში ვეღარ განაახლა. შარშან კი კარიერის დასრულების შესახებ გამოაცხადა.

ის სეზონი სალონიკელებმა მეოთხე ადგილზე დაასრულეს, შემდეგ, რაც დაემართათ უკვე მოგახსენეთ - იანაკისის ხელმძღვანელობით პლეი ოფში ვერ გავიდნენ. ასეთ რამეს კი, ამბიციური გუნდების მწვრთნელებს პრეზიდენტები არასოდეს ჰპატიობენ.

იანაკისის ნაცვლად ვანგელის ანგელოუ დაინიშნა. მას თურქული "ეფესის" მთავარ მწვრთნელადაც უმუშავია. 2009 წელს კი "ტრიკალას" ხელმძღვანელობდა, რომლის ღირსებასაც გიორგი ცინცაძე იცავდა. "ბუ" "ტრიკალაში" დიდხანს არ დარჩენილა - უკრაინულ "დონეცკში" გადავიდა, რადგან ანგელოუს "ტრიკალა" მთლიანად ამერიკელებზე იყო აწყობილ-დამოკიდებული.

ამ სეზონში რა გუნდი იქნება, ამას მას შემდეგ შევიტყობთ, რაც ბატონი ვანგელისი "არისს" დააკომპლექტებს.

1661
მკითხველის კომენტარები / 0 /
მსგავსი ამბები
რუბრიკის სხვა სიახლეები
;