ბოლნისის 'სიონის' შემტევი ჯაბა უგულავა: ევროპალიგის ზონაში  რომ მოვხვდეთ, ამაში  წარმოუდგენელს  ვერაფერს ვხედავ

საქართველოს ეროვნული პირველი წრის ერთ-ერთი საუკეთესო ფეხბურთელი უდავოდ ჯაბა უგულავა გახლავთ. ბოლნისის “სიონის” 29 წლის შემტევმა 10 შეხვედრაში 8 გოლი შეაგდო და ამ მაჩვენებლით სათავეში უდგას ბომბარდირთა დავას.

წლებია, უგულავა “სიონში” თამაშობს და ამ გუნდის ერთ-ერთი ლიდერიცაა, თუმცა ბევრი არ ელოდა, რომ დასრულდებოდა პირველი წრე და გოლეადორთა სათავეში სწორედ ის იქნებოდა.

“ლელომ” ჯაბა უგულავასთან ვრცელი ინტერვიუ ჩაწერა. ის ძალიან კარგი რესპონდენტია. მკითხველს მასთან შეხვედრა უთუოდ დააინტერესებს...

- დავიწყოთ იმით, თუ როგორ აფასებთ “სიონის” თამაშს საქართველოს ეროვნული ლიგის მიმდინარე გათამაშებაში?

- მთლიანობაში, მგონი, ნორმალურად ვითამაშეთ. სხვა თუ არაფერი, თბილისის “დინამოსა” და ქუთაისის “ტორპედოს” დამარცხება შევძელით. ეს ნამდვილად არ არის პატარა ამბავი. რა თქმა უნდა, თავისუფლად შეიძლებოდა, მეტი ქულაც მოგვეგროვებინა, მაგრამ უნდა მივიღოთ ის შედეგი, რომელიც ამ მომენტისთვის გვაქვს. ყველა ხედავდა, რომ გუნდი თითოეულ მატჩში ბოლომდე იხარჯებოდა. მაგრამ ჩვენ დღეს არ გვაქვს იმის ფუფუნება, რომ შემადგენლობის როტაცია მოხდეს ხოლმე. ალბათ, სადღაც გადაღლის მომენტიც იყო, თუ ზოგიერთ მატჩში ისე ვერ ვითამაშეთ, როგორც გულშემატკივარს სურდა.

- თბილისის “დინამოს” მოუგეთ, მაგრამ გულახდილად ვთქვათ - ბევრი არ ელოდა “ტორპედოსთან” გამარჯვებას. ქუთაისელებს საქართველოში ერთ-ერთი საუკეთესო შემადგენლობა ჰყავთ. მაინც, რის ხარჯზე სძლიეთ მრისხანე მეტოქეს?

- გეტყვით, როგორც იყო. იცით, რომ “ტორპედომდე” “სიონმა” ბოლნისში ბოლო 2 საშინაო მატჩი წააგო. გულშემატკივარი ყველგან მომთხოვნია და ძალიან სურს თავისი გუნდის წარმატება, მაგრამ ბოლნისში ამ მხრივ განსაკუთრებული სიტუაციაა. ჩვენ ვხედავდით გარკვეულ გულდაწყვეტას ჩვენს ქომაგებს შორის. შევიკრიბეთ ბიჭები და ვთქვით, რომ თავი უნდა გადაგვედო და ეს თამაში უსათუოდ მოგვეგო!.. რა თქმა უნდა, ეს გამარჯვება ყველა ჩვენგანის დამსახურებაა - სამწვრთნელო შტაბიდან დაწყებული, კლუბის თანამშრომლებით დამთავრებული.

- გარედან ისე ჩანს, რომ წელს გუნდების დონე ძალიანაა გათანაბრებული. ეთანხმებით ამ შეფასებას?

- ნამდვილად ვეთანხმები და ამის დამადასტურებელია ის თამაშები, რომელიც მიმდინარე ჩემპიონატში უკვე არაერთი იყო. ვერავინ იტყვის, რომელი გუნდი რომელს მოუგებს. აგერ, თუნდაც “სიონის” მაგალითზე ვთქვათ. ნამდვილად არავინ მიიჩნევდა ჩვენს გუნდს ფავორიტად თბილისის “დინამოსა” და “ტორპედოსთან” შეხვედრებში, მაგრამ იმ თამაშების მოგება შევძელით და ეს ბევრ რამეზე მეტყველებს.

- რა არის “სიონის” მიზანი მიმდინარე სეზონში?

- ჩვენ ყველა შეხვედრაში მოსაგებად გავდივართ მინდორზე. ჩემი აზრით, ფეხბურთელმა და გუნდმა მუდამ მაღალი მიზნები უნდა დაისახოს. მაგალითად, ევროპალიგის ზონაში რომ მოვხვდეთ, ამაში წარმოუდგენელს ნამდვილად ვერაფერს ვხედავ.

- ბევრი არ ელოდა, რომ ეროვნული ლიგის პირველი წრის დასრულების შემდეგ ბომბარდირთა დავაში თქვენ იქნებოდით ლიდერი...

- თავდამსხმელი ვარ და გოლების გატანა ჩემი მოვალეობაა. ყველა შემტევს აქვს კარიერაში მონაკვეთი, როცა კარგად მისდის თამაში და ჩემს შემთხვევაშიც ალბათ ასეა... რა გითხრათ სხვა, ცდას და მონდომებას არ დავაკლებ, რომ მომავალშიც გავიტანო გოლები.

- მაინც, რამდენი გოლი უნდა გაიტანოთ, რომ სეზონის ბოლოს კმაყოფილი დარჩეთ?

- ამას ახლა მართლა ვამბობ: ჩემთვის ნაკლები მნიშვნელობა აქვს, რამდენ გოლს გავიტან ამ სეზონში. მთავარია, გუნდმა მოიგოს. ჩვენი წარმატების ერთ-ერთი მთავარი საიდუმლო ის არის, რომ “სიონი” ერთი დიდი ოჯახია. დამიჯერეთ, არ ვაქცევ პირად სტატისტიკას დიდ ყურადღებას და კიდევ ერთხელ ვიმეორებ: ჩემთვის მთავარია, “სიონმა” მოიგოს.

- ...და მაინც, ვერ დავიჯერებთ, რომ ჩემპიონატის საუკეთესო ბომბარდირობაზე არ ფიქრობთ. პირველი წრის შემდეგ თუ მოხდა ეს, რატომ არ უნდა იყოს შესაძლებელი სეზონის ბოლოსაც?

- რომელი თავდამსხმელი არ ფიქრობს ბომბარდირობაზე და მეც ვერ ვიტყვი ტყუილს - დიახ, არც მე ვარ გამონაკლისი. ვნახოთ, სეზონის ბოლოს რა და როგორ იქნება...

- თქვენ მიერ გატანილი 8 გოლიდან რომელს გამოარჩევდით?

- ასე ვერ გამორჩევ... ყველა გოლი მნიშვნელოვანია, რადგან გუნდის წარმატებას განაპირობებს და საერთო შრომის შედეგია. გოლი როცა გაგაქვს, იქ არანაკლები წვლილი შეაქვთ შენს პარტნიორებსაც... რა გითხრათ... თუ მაინც გამორჩევაა, ალბათ იმ გოლს გამოვყოფ, “ტორპედოსთან” გამარჯვება რომ მოგვიტანა.

ყოველდღიური სპორტული გაზეთი "ლელო"
1530
მკითხველის კომენტარები / 0 /
მსგავსი ამბები
რუბრიკის სხვა სიახლეები
;