ბორჯღალოსნების მეტოქე: კანადა მაორებით იწყებს

ნოემბრის ტესტებზე საქართველოს ნაკრების მეტოქის, კანადის ეროვნული გუნდის უელსელმა თავკაცმა კინგსლი ჯოუნზმა იმ 28 მორაგბის ვინაობა დაასახელა, რომლებიც ჯერ ახალზელანდიელ მაორებს დაუპირისპირდებიან და შემდეგ ევროპაში გამოემგზავრებიან.

შეგახსენებთ, რომ კინგსლი ჯოუნზი კანადის ნაკრების თავკაცად ახლახან დაინიშნა და მისი ხელმძღვანელობით გუნდს ჯერ არ უთამაშია. მან ნოემბრის ტესტებზე დახმარებისთვის თანამემამულე ჯეისონ სტრეიჯი იხმო, რომელიც უელსის ახალგაზრდული ნაკრების მთავარი მწვრთნელია.

საგულისხმოა, რომ კინგსლი ჯოუნზი ერთი ხანობა რუსეთის ნაკრებსაც წვრთნიდა. მისი ხელმძღვანელობისას ამ გუნდს აშკარად რეგრესი ჰქონდა.

პირველი, რაც ჯოუნზმა გააკეთა, გუნდის ახალი კაპიტნის დანიშვნა იყო. "ნეკერჩხლის ფოთლებს" ამიერიდან ვეტერანი ცხრა ნომერი ფილ მაკი წარუძღვება.

"ფილ მაკი კანადის ნაკრების კაპიტანი იქნება მაორებთან დაპირისპირებისას და ნოემბრის ტესტებზე. მან ეს ნამდვილად დაიმსახურა. მან ბევრი რამ გააკეთა კანადური რაგბისთვის, როგორც ეროვნულ, ისე შვიდკაცა რაგბის ნაკრებში თამაშისას. ის სამაგალითო სპორტსმენია და მას მოთამაშეები პატივს სცემენ. ჩემთვის ის ნამდვილი ლიდერია და მოუთმენლად ველი მასთან საქმიანი ურთიერთობის დაწყებას." - თქვა კინგსლი ჯოუნზმა.

კანადელთა ახალი კაპიტანი უკვე ათ წელიწადზე მეტია, რაც ეროვნულ და შვიდკაცა რაგბის ნაკრებებში ასპარეზობს. მისი დებიუტი 2009 წელს ირლანდიის ნაკრებთან მატჩში შედგა. ის გუნდის ერთ-ერთი ლიდერი იყო 2015 წელს ინგლისში გამართულ მსოფლიოს თასზე.

"ცხადია, ეს ჩემთვის დიდი პატივია. როცა ქვეყნის ნაკრებში თამაშობ, ყველა მატჩი მნიშვნელოვანია. მიხარია, მაგრამ პასუხისმგებლობის ტვირთსაც ცხადად ვგრძნობ." - თქვა ფილ მაკმა.

კანადის ნაკრები, გამორიცხული არ არის, 2019 წლის მსოფლიოს თასზეც ჩვენი მეტოქე გახდეს. ეს გუნდი მომავალ წელს პლეი ოფში ურუგვაის ეროვნულ ნაკრებს დაუპირისპირდება და გამარჯვების შემთხვევაში, ჩვენს ჯგუფში ამოყოფს თავს.

კანადის ნაკრები
რეი ბარკლი, კაილი ბეილი, იუბერ ბაიდენსი, ენდრიუ კოე, დასტინ დობრავსკი, ჯუზეპე დუ ტუა, ენდრიუ ფერგუსონი, კაილი გილმორი, მეთ იტონი, ერიკ ჰოვარდი, კონორ კისი, რაიან კოტლევსკი, მარტიალ ლაგენი, ჯოშ ლარსენი, ბენ ლესაგი, კაინოა ლოიდი, ენტონი ლუკა, ფილ მაკი, დენ მური, მაიკ ნიუვენჰაუზენი, შონ ოლირი, პატრიკ პერფრი, რობი პუვი, ლუკას რამბალი, ჯორდან სანდოვერი, ბრუკ სალერი, მეთ ტირნი, ჯასტის სიარსი.

ყოველდღიური სპორტული გაზეთი "ლელო"
505
მკითხველის კომენტარები / 0 /
მსგავსი ამბები
რუბრიკის სხვა სიახლეები